ଖଡ଼ିଆଳ,୧୧।୧୨(ଡି.ଏନ.ଏ.): ପଥର ଖାଦାନଗୁଡିକୁ ଗାଇଡ଼ ଲାଇନ ନ ମାନି ନିୟମ ଉଲ୍ଲଘଂନ କରି ମାଫିଆ ହାତକୁ ଟେକି ଦେଇଥିବା ଅଭିଯୋଗ ହୋଇଛି। ଐତିହାସିକ କୀର୍ତିରାଜି ଲୀନ ହେବା ସାଙ୍ଗକୁ ପରିବେଶ ପ୍ରଦୂଷଣ ବଢୁଛି। ଏହାକୁ ନେଇ ବାରମ୍ବାର ଅଭିଯୋଗ କଲେ ହେଁ ରାଜସ୍ବ ବିଭାଗ ଓ ଜିଲା ପ୍ରଶାସନ ନିରବଦ୍ରଷ୍ଟା ସାଜିଛନ୍ତି। ଏମିତି କି କ୍ରଶର ମାଲିକ ଓ ଏକ କମ୍ପାନୀ ସହ ଖଡ଼ିଆଳ ରାଜସ୍ବ ବିଭାଗର ସଲାସୁତୁରା ରହିଥିବା ଅଭିଯୋଗ ହେଉଛି। ପରିବେଶ ଓ ପ୍ରଦୂଷଣ ନିୟମ ଉଲ୍ଲଘଂନ କରି ପଥରକ୍ୱାରୀରୁ ପଥର ଉତ୍ତୋଳନ ପାଇଁ ଅନୁମତି ଦେଇଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ଆସିଛି ନୂଆପଡ଼ା ଜିଲା ଖଡ଼ିଆଳ ତହସିଲର ଋଷିଗାଁରୁ। ଗାଁର ଚତୁଃପାର୍ଶ୍ୱରେ ପଥରକ୍ୱାରୀଗୁଡିକ ରହିଥିବାରୁ ଗାଁରେ ରହିବା ଏକ ପ୍ରକାର ଦୁର୍ବିସହ ହୋଇଯାଇଥିବା ଗ୍ରାମବାସୀ କହିଛନ୍ତି। ବିଶେଷକରି ଗାଁକୁ ଲାଗି ରହିଥିବା ପଥରକ୍ୱାରୀ ଓ ଏକ କମ୍ପାନୀର କ୍ରସର ଉଚ୍ଚ ସମ୍ପନ୍ନ ବିସ୍ଫୋରଣ ଯୋଗୁ ଘରଗୁଡିକ ଫାଟି ଆଁ କଲାଣି। ଗାଁର ପରିବେଶ ଦୂଷିତ ହେବା ସହ ପଥରଗୁଣ୍ଡ ଉଡି ବିଭିନ୍ନ ପ୍ରକାର ଶ୍ୱାସ ରୋଗ ଦେଖାଦେଉଛି। ଦିନରାତି କ୍ରସର ମେସିନ ଚାଲୁଥିବାରୁ ପିଲାଙ୍କ ପାଠପଢିବାରେ ବ୍ୟାଘାତ ଦେଖାଦେଇଛି। ଏହି କ୍ରସର ବନ୍ଦ ପାଇଁ ଗ୍ରାମବାସୀ ବାରମ୍ବାର ପ୍ରଶାସନକୁ ଜଣାଇଥିଲେ ହେଁ ପ୍ରଶାସନ ନିରବ ରହିଥିବା ଗ୍ରାମବାସୀ ଅଭିଯୋଗ କରିଛନ୍ତି। ଖଡ଼ିଆଳ ତହସିଲ ଅଧୀନରେ ଥିବା ଋଷିଗାଁ ଯୋଗୀମଠ ଓଡିଶା ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇଛି ସତ। ହେଲେ ବର୍ତ୍ତମାନ ଖଡ଼ିଆଳ ତହସିଲ ବିଭାଗର ଖାମଖିଆଳି ନୀତି ଯୋଗୁ ଐତିହାସିକ ଯୋଗୀମଠ ଲୀନ ହେବାର ଆଶଙ୍କା ଦେଖାଦେଇଛି। ପଥର ମାଫିଆଙ୍କ କବ୍ଜାରେ ଏବେ ଋଷିପୀଠ ଥିବା ବେଳେ ସେମାନଙ୍କୁ ପୂର୍ଣ ସହଯୋଗ କରୁଛି ଖଡ଼ିଆଳ ରାଜସ୍ବ ବିଭାଗ। ଦିନରାତି ପଥର ଖାଦାନ ଚାଲୁଥିବାରୁ ଧୂଳିଗୁଣ୍ଡରେ ସ୍ଥାନୀୟ ଜୀବନଯାପନ ଅସ୍ତବ୍ୟସ୍ତ ହୋଇପଡିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଗୋଟିଏ ପଟେ ସରକାରୀ ଧାର୍ଯ୍ୟ ପରିସୀମା ଓ ଗଭୀରତା ସବୁରେ ପଥରମାଫିଆ ରାଜସ୍ବ ବିଭାଗକୁ ଭକୁଆ ବନେଇ ଶହଶହ ଗୁଣା ଅଧିକ କ୍ୱାରି ଲୁଟିଚାଲିଛନ୍ତି। ସରକାରୀ ନିୟମର ବେଖାତିର କରି ଦିନରାତି ହଜାର ହଜାର ଗାଡିରେ ପଥର ଚାଲାଣ ହେଉଛି। ଆଉ ଅତି ଆବଶ୍ୟକତା ହେଲେ ଧର୍ମକୁ ଆଖିଠାର ଭଳି ରାଜସ୍ବ ବିଭାଗ ଚଢ଼ାଉ କରି ଅଳ୍ପ କିଛି ଫାଇନ କାଟି ଚୁପ ବସୁଥିବା ଅଭିଯୋଗ ହୋଇଛି। ବିଶେଷକରି ଋଷିଗାଁ ପାଇଁ ଏହି ପଥରକ୍ୱାରିଗୁଡିକ ଅଭିଶାପ ସଦୃଶ ହୋଇଯାଇଛି। ଏହି ପଥର ଖାଦନଗୁଡିକୁ ବନ୍ଦ ପାଇଁ ବାରମ୍ବାର ଅଭିଯୋଗ କରିଥିଲେ ହେଁ ପ୍ରଶାସନ କର୍ଣ୍ଣପାତ କରୁନାହିଁ।
