ଦୁବାଇ,୧୭।୯: ୨୦୨୦ ସଂସ୍କରଣ ଭଳି ଚଳିତ ଥର ମଧ୍ୟ ମୁମ୍ବାଇ ଇଣ୍ଡିଆନ୍ସ ଆଇପିଏଲ ଟ୍ରଫି ହାସଲ କରିବ। ଚଳିତ ଆଇପିଏଲ ସିଜନର ବଳକା ମ୍ୟାଚ୍ ଆରମ୍ଭ ହେବା ପୂର୍ବରୁ ଏଭଳି ଘୋଷଣା କରିଛନ୍ତି ମୁମ୍ବାଇ ଇଣ୍ଡିଆନ୍ସ ଷ୍ଟାର ଅଲରାଉଣ୍ଡର କିରନ ପୋଲାର୍ଡ।
ଚଳିତ ଥର ଭଳି ଗତ ବର୍ଷ ମଧ୍ୟ ଧିମା ଆରମ୍ଭ କରିଥିଲା ମୁମ୍ବାଇ। କିନ୍ତୁ ଉଚିତ ସମୟରେ ଦଳ ଜିତିବା ଆରମ୍ଭ କରିଥିଲା। “ଗତ ବର୍ଷ ଆମେ ଏଠାରେ ଯାହା କରିଥିଲୁ, ତା’କୁ ଦୋହରାଇବାକୁ ଆଶା ରଖିଛୁ। ଏଠାରେ ଆମ ପାଇଁ ଭଲ ସ୍ମୃତି ରହିଛି” ବୋଲି ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଟୁଇଟ୍ କରାଯାଇଥିବା ଭିଡିଓରେ ପୋଲାର୍ଡ କହିଛନ୍ତି।
ଉଲ୍ଲେଖଯୋଗ୍ୟ, ଡିଫେଣ୍ଡିଂ ଚାମ୍ପିୟନ ମୁମ୍ବାଇ ୨୦୨୧ ଆଇପିଏଲର ପଏଣ୍ଟ ତାଲିକାରେ ୪ର୍ଥ ସ୍ଥାନରେ ରହିଛି। ରୋହିତ ଶର୍ମାଙ୍କ ନେତୃତ୍ୱାଧୀନ ଦଳ ଖେଳିଥିବା ୭ ମ୍ୟାଚ୍ରୁ ୪ଟି ଜିତିଥିବା ବେଳେ ୩ ମ୍ୟାଚ୍ରେ ପରାଜୟର ମୁହଁ ଦେଖିବାକୁ ପଡ଼ିଛି।
