ବ୍ରହ୍ମପୁର ଅଫିସ,୧୯ା୮: ଗୋପାଳପୁର ନିର୍ବାଚନମଣ୍ଡଳୀରେ ଏବେ ଠେଲାପେଲା ରାଜନୀତି ଆରମ୍ଭ ହୋଇଛି। ଏହାକୁ ବିଭିନ୍ନ ମହଲ ଓ ରାଜନୀତି ବିଶ୍ଳେଷକଙ୍କ ପକ୍ଷରୁ ସମାଲୋଚନା କରାଯାଇଛି। ନିଜ ନିର୍ବାଚନମଣ୍ଡଳୀରୁ ବିଧାୟକଙ୍କୁ ଘଉଡ଼ାଇବାକୁ କିଏ ଅଧିକାର ଦେଇଛି ସେନେଇ ଚର୍ଚ୍ଚା ଜୋର ଧରିଛି। ଏହା ସୁସ୍ଥ ଗଣତନ୍ତ୍ରର ପରିପନ୍ଥୀ ହୋଇଥିବା ମତ ପ୍ରକାଶ ପାଇଛି। ଯେଉଁ ଶାସକ ବିଜେଡି କର୍ମୀ ଏହି କାଣ୍ଡ ଘଟାଇଛନ୍ତି ସେମାନେ ଏଭଳି ହୀନ କାର୍ଯ୍ୟରୁ ନିବୃତ୍ତ ହେବା ଉପରେ ଗୁରୁତ୍ୱ ଦିଆଯାଇଛି। ସୂଚନାଯୋଗ୍ୟ, ୨୦୦୯ରୁ ୨୦୧୯ ମଧ୍ୟରେ ହୋଇଥିବା ୩ ନିର୍ବାଚନରେ ଲଗାତର ନିର୍ବାଚିତ ହୋଇଥିଲେ ବିଜେଡି ପ୍ରାର୍ଥୀ ଡ. ପ୍ରଦୀପ ପାଣିଗ୍ରାହୀ। ସେ ହ୍ୟାଟ୍ରିକ ବିଧାୟକ ହୋଇଥିଲେ। ୨୦୧୭ରୁ ଗତ ସାଧାରଣ ନିର୍ବାଚନ ପର୍ଯ୍ୟନ୍ତ ସେ ଗଞ୍ଜାମ ଜିଲା ବିଜେଡି ସଭାପତି ଦାୟିତ୍ୱରେ ଥିଲେ। ଘଟଣାଚକ୍ରରେ ତାଙ୍କୁ ୨୦୨୦ ଡିସେମ୍ବରରେ ଦଳରୁ ବହିଷ୍କାର କରାଯାଇଥିଲା। କେବଳ ସେତିକି ନୁହେଁ କେତେକ ମାମଲାରେ ଛନ୍ଦି ହୋଇ ସେ ଦୀର୍ଘଦିନ ବିଚାରାଧୀନ ବନ୍ଦୀ ଥିଲେ। ଦଳରୁ ବିତାଡ଼ିତ ହେବା ପରେ ସେ ଗତ ଡିସେମ୍ବର ୧୯ରେ ନିର୍ବାଚନମଣ୍ଡଳୀର ଖଜୁରିଆ ନିକଟରେ ହୋଇଥିବା କର୍ମୀ ସମାବେଶକୁ ଯାଇ କଡ଼ା ବିରୋଧର ସମ୍ମୁଖୀନ ହୋଇଥିଲା। ବହିଷ୍କାର ପଦକ୍ଷେପକୁ ପୂର୍ଣ୍ଣ ସମର୍ଥନ ସହ ନିନ୍ଦା ପ୍ରସ୍ତାବ ଗୃହୀତ ହୋଇଥିଲା। ଯେଉଁମାନେ ପାଣିଗ୍ରାହୀଙ୍କ ଦ୍ୱାରା ବିଭିନ୍ନ ଭାବରେ ଉପକୃତ ଓ ଥଇଥାନ ହୋଇଥିଲେ ସେମାନେ ହିଁ ମୁଖ୍ୟ ଭୂମିକା ନେଇଥିଲେ। ଅପରପକ୍ଷରେ ଦଳରୁ ବହିଷ୍କାର ଓ ଗିରଫ ଏବଂ କୋର୍ଟର ସର୍ତ୍ତମୂଳକ ଜାମିନରେ ମୁକୁଳିବା ପରେ ସେ ଦେଢ଼ ବର୍ଷରୁ ଅଧିକ ସମୟ ନିର୍ବାଚନମଣ୍ଡଳୀକୁ ଆସୁ ନ ଥିଲେ କିମ୍ବା ବିଜେଡି ଓ ଏହାର ଶୀର୍ଷ ନେତୃତ୍ୱଙ୍କ ବିରୋଧରେ ପାଟି ଖୋଲୁ ନ ଥିଲେ। ସ୍ବାଧୀନତାର ୭୫ ବର୍ଷ ପୂର୍ତ୍ତି ପାଳନ ଅବସରରେ ନିର୍ବାଚନମଣ୍ଡଳୀର କେତେକ ସ୍ଥାନରେ ବିଭିନ୍ନ ଅନୁଷ୍ଠାନ ପକ୍ଷରୁ ଆୟୋଜିତ ପତାକା ଉତ୍ତୋଳନ କାର୍ଯ୍ୟକ୍ରମରେ ଯୋଗଦେବାକୁ ଗତ ସୋମବାର ଆସିଥିଲେ। କମଳାପୁର ଛକରେ ପହଞ୍ଚତ୍ବା ପରେ ତାଙ୍କୁ ଗୋ-ବ୍ୟାକ୍ ନାରା ଦିଆଯାଇଥିଲା। ସେଠାରେ ପାଟିତୁଣ୍ଡ, ହୋହଲ୍ଲା ଓ ଠେଲାପେଲା ହୋଇଥିଲା। ପୋଲିସ ଥାଇ ମଧ୍ୟ ଏହା ରୋକାଯାଇ ପାରି ନ ଥିଲା। ବିଧାୟକଙ୍କୁ ବିରୋଧ କରିବାକୁ ଦଳର ଆଦୌ ନିର୍ଦ୍ଦେଶ ନ ଥିବା ଆଲୋଚନା ପ୍ରସଙ୍ଗରେ ଜିଲା ବିଜେଡି ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ କହିଛନ୍ତି। ତେବେ କାହା ଇଙ୍ଗିତରେ ଏଭଳି କରାଗଲା ସେନେଇ ରାଜନୈତିକ ସମୀକ୍ଷକ ଦ୍ୱନ୍ଦ୍ୱରେ ପଡ଼ିଛନ୍ତି।
