ଉଦୟପୁର, ୨।୭ : ଉଦୟପୁରରେ କହ୍ନେୟା ଲାଲଙ୍କ ହତ୍ୟା ମାମଲାରେ ମୁଖ୍ୟ ଅଭିଯୁକ୍ତ ମହମ୍ମଦ ରିୟାଜ ଅତାରିଙ୍କ ରାଜନୈତିକ ଲିଙ୍କ୍ ଏବେ ସାମ୍ନାକୁ ଆସିଛି। ସୋସିଆଲ ମିଡ଼ିଆରେ ଭାଇରାଲ ହେଉଥିବା ଏକ ଫଟୋରେ ତାଙ୍କୁ ଭାଜପାର ବରିଷ୍ଠ ନେତା ଗୁଲାବଚନ୍ଦ କଟାରିଆଙ୍କ ସହ ଦେଖିବାକୁ ମିଳିଛି। ଏହି ଫଟୋ ୨୦୧୮ ବୋଲି କୁହାଯାଉଛି। ଏହା ବ୍ୟତୀତ ଭାଜପା ସଂଖ୍ୟାଲଘୁ ମୋର୍ଚ୍ଚା ସହ ଜଡିତ ଜଣେ କର୍ମଚାରୀଙ୍କ ପୁରୁଣା ସୋସିଆଲ ମିଡ଼ିଆ ପୋଷ୍ଟ୍ ମଧ୍ୟ ସାମ୍ନାକୁ ଆସିଛି। ଏଥିରେ ସେ ରିୟାଜଙ୍କୁ ଭାଜପା କର୍ମୀ ବୋଲି ଉଲ୍ଲେଖ କରିଛନ୍ତି। ଏବେ ଏହାକୁ ନେଇ ରାଜନୀତି ମଧ୍ୟ ଆରମ୍ଭ ହୋଇଛି।
୨୦୧୯ରେ ଇରଶାଦ ଚେନୱାଲା ଏବଂ ଭାଜପା ସଂଖ୍ୟାଲଘୁ ମୋର୍ଚ୍ଚା ସହ ଜଡିତ କାର୍ଯ୍ୟକର୍ତ୍ତା ମହମ୍ମଦ ତାହିରଙ୍କ ଦ୍ୱାରା ପ୍ରସ୍ତୁତ ସୋସିଆଲ ମିଡିଆ ପୋଷ୍ଟରେ ରିୟାଜ ଦୃଶ୍ୟମାନ ହେଉଛନ୍ତି। ଏକ ଫଟୋରେ, ଇରଶାଦ ଚେନୱାଲା ରିୟାଜଙ୍କୁ ଫୁଲ ମାଳ ପିନ୍ଧାଇ ସ୍ବାଗତ କରୁଛନ୍ତି। ଯେତେବେଳେ ଏ ବିଷୟରେ ପଚରାଗଲା, ଇରଶାଦ ଚେନୱାଲା କହିଛନ୍ତି ଯେ ସେ ମକ୍କା-ମଦିନାରୁ ଫେରିବା ପରେ ଏଭଳି ସମ୍ବର୍ଦ୍ଧନା ପ୍ରଦାନ କରାଯାଇଥିଲା। ଚେନୱାଲା କହିଛନ୍ତି ଯେ ତାଙ୍କୁ ମହମ୍ମଦ ତାହିର ରିୟାଜଙ୍କ ସହ ପରିଚିତ କରିଥିଲେ। ରିୟାଜଙ୍କ ସହ ତାଙ୍କର କୌଣସି ସମ୍ପର୍କ ନାହିଁ।
ତାହିର ଜଣେ କ୍ୟାମେରାମ୍ୟାନ ଏବଂ ଭାଜପା ସମର୍ଥକ ବୋଲି ଚର୍ଚ୍ଚା ହେଉଛି। ତାଙ୍କ ପ୍ରୋଫାଇଲ ଫଟୋରେ ଭାଜପାର ପଗଡି ଦୃଶ୍ୟମାନ ହେଉଛି। ତାହିର ତାଙ୍କ ପୋଷ୍ଟରେ ରିୟାଜଙ୍କୁ ଭାଜପା କର୍ମୀ ବୋଲି କହିଛନ୍ତି। ତାହିର ଏହି ପୋଷ୍ଟରେ ଲେଖିଛନ୍ତି ଉମରାର ଜିଆରାଟରୁ ଉଦୟପୁରରେ ପହଞ୍ଚିବା ପରେ ଭାଜପା କର୍ମୀ ହର ଦିଲ ଅଜିଜ, ରିୟାଜ ଅତାରତଙ୍କୁ ସ୍ବାଗତ କରୁୁଛନ୍ତି। ଆଲ୍ଲା ରିୟାଜ ଅତାରି ଭାଇଜାନଙ୍କ ସମସ୍ତ ପ୍ରାର୍ଥନା ଗ୍ରହଣ କରନ୍ତୁ, ଆମେନ ।
ଏହି ପୋଷ୍ଟଟି ତାହିରଙ୍କ ଫେସବୁକ ଆକାଉଣ୍ଟରୁ ୨୫ ନଭେମ୍ବର ୨୦୧୯ ରେ ଅପଲୋଡ୍ କରାଯାଇଥିଲା। ଏଥିରେ ତାହିର ଏବଂ ଚେନୱାଲା ଏବଂ ଅନ୍ୟ ଜଣେ ଭାଜପା ନେତା ରିୟାଜଙ୍କୁ ଫୁଲମାଳ ପିନ୍ଧାଉଥିବାରୁ ଦେଖିବାକୁ ମିଳିଛି। ଏଥି ସହିତ ତାହିର ସହ ଜଡିତ ଅନେକ ପୋଷ୍ଟରେ ରିୟାଜ ଅତାରି ନାମକ ଏକ ଫେସବୁକ ଆକାଉଣ୍ଟ ବିଷୟରେ ଉଲ୍ଲେଖ କରାଯାଇଛି। କିନ୍ତୁ ସେହି ଆକାଉଣ୍ଟ ଏବେ ଆଉ ଦୃଶ୍ୟମାନ ହେଉନାହିଁ। ଏହି ଘଟଣା ପରେ ହତ୍ୟାକାରୀମାନେ ଏହି ଆକାଉଣ୍ଟ ଡିଲିଟ କରିଥିବା ସନ୍ଦେହ କରାଯାଉଛି।
ଏହା ବ୍ୟତୀତ ୨୭ ଅକ୍ଟୋବର ୨୦୧୯ ରେ ତାହିରଙ୍କ ଏକ ପୋଷ୍ଟ ମଧ୍ୟ ସାମ୍ନାକୁ ଆସିଛି। ଏଥିରେ ସେ ବିବାଦୀୟ ମନ୍ତବ୍ୟ ଲେଖିଛନ୍ତି। ରିୟାଜଙ୍କ ସହ ଫଟୋ ସମ୍ପର୍କରେ ବିରୋଧୀ ଦଳର ନେତା ଗୁଲାବଚନ୍ଦ କଟାରିଆ କହିଛନ୍ତି ଯେ ସଂଖ୍ୟାଲଘୁ ମୋର୍ଚ୍ଚାର କିଛି ପୁରୁଣା କାର୍ଯ୍ୟକ୍ରମରେ ଏହି ଫଟୋ ନିଶ୍ଚୟ ନିଆଯାଇଛି। ଇରଶାଦ ଚେନୱାଲା ସଂଖ୍ୟାଲଘୁ ମୋର୍ଚ୍ଚାର ଜଣେ ପୁରୁଣା କର୍ମୀଚ୍। ବାକି ଏହି ଘଟଣାରେ, ଯଦି ମୁଁ କିମ୍ବା ଭାଜପାର କୌଣସି ବ୍ୟକ୍ତି ଜଡିତ ଥାନ୍ତି ତେବେ ତାଙ୍କୁ ଦଣ୍ଡ ଦିଆଯିବା ଉଚିତ।
