କାଠମାଣ୍ଡୁ,୬।୩: ନେପାଳ ପ୍ରଧାନମନ୍ତ୍ରୀ ପୁଷ୍ପ କମଲ ଦହଲ ‘ପ୍ରଚଣ୍ଡ’ ନେପାଳ କଂଗ୍ରେସ ସହ ପୁରୁଣା ସହଭାଗିତାକୁ ଭାଙ୍ଗି ଏକ ନୂତନ ସରକାର ଗଠନ କରିଛନ୍ତି। ପୂର୍ବତନ ପ୍ରଧାନମନ୍ତ୍ରୀ କେ.ପି. ଶର୍ମା ଓଲିଙ୍କ ନେତୃତ୍ୱରେ ନେପାଳର ଦ୍ୱିତୀୟ ବୃହତ୍ତମ ଦଳ କମ୍ୟୁନିଷ୍ଟ ପାର୍ଟି (ୟୁନିଫାଏଡ୍ ମାର୍କ୍ସବାଦୀ-ଲେନିନ୍ବାଦୀ) ସହ ପୁଷ୍ପ କମଲ ଏକ ନୂତନ ମେଣ୍ଟ ଗଠନ କରଛନ୍ତି। ଏହା ପରେ ତିନିଜଣ ମନ୍ତ୍ରୀ ଶପଥ ଗ୍ରହଣ କରିଛନ୍ତି।
ସୋମବାର ଏହି ମେଣ୍ଟ ଗଠନ ପରେ ନେପାଳର ୪ ଦଳ ୮ ପଏଣ୍ଟ ଚୁକ୍ତି କରିଛନ୍ତି, ଏହି ପଏଣ୍ଟ ଆଧାରରେ ସରକାରଙ୍କୁ ଆଗକୁ ନିଆଯିବ। ଚୁକ୍ତିନାମା ଅନୁଯାୟୀ, ଚାରିଟି ଦଳ ଜାତୀୟ ବିଧାନସଭା ବାଚସ୍ପତି ନିର୍ବାଚନରେ ମାଓବାଦୀ କେନ୍ଦ୍ର ପ୍ରାର୍ଥୀଙ୍କୁ ସମର୍ଥନ କରୁଥିବାବେଳେ ଉପବାଚସ୍ପତିଙ୍କୁ ୟୁଏମ୍ଏଲ୍ ପକ୍ଷରୁ ଅଣାଯିବ। ଚୁକ୍ତିନାମାର ଅନ୍ୟ ପଏଣ୍ଟଗୁଡିକ ମଧ୍ୟରେ ଦେଶରେ ଫେଡେରାଲାଇଜିମ୍କୁ ପ୍ରଭାବଶାଳୀ କରିବା ଏବଂ ଶାନ୍ତି ସମ୍ବନ୍ଧୀୟ କାର୍ଯ୍ୟ ସମାପ୍ତ କରିବା ପାଇଁ ଆଇନ, ଆଇନରେ ସଂଶୋଧନ ଅନ୍ତର୍ଭୁକ୍ତ ରହିଛି।
ମେଣ୍ଟଭୁକ୍ତ ଦଳଗୁଡ଼ିକ ମନ୍ତ୍ରଣାଳୟର ବିଭାଜନ ଉପରେ ପାରସ୍ପରିକ ସହମତି ହାସଲ କରିପାରି ନାହାନ୍ତି।
ନୂତନ ମିଳିତ ସରକାର ଗଠନ ହେବାର ୨୪ ଘଣ୍ଟା ପରେ ମଧ୍ୟ କ୍ୟାବିନେଟ ସଦସ୍ୟଙ୍କୁ ମନ୍ତ୍ରୀ ପଦ ବଣ୍ଟନ କରିବାରେ ପ୍ରଧାନମନ୍ତ୍ରୀ ପ୍ରଚଣ୍ଡ ବିଫଳ ହୋଇଛନ୍ତି। ପୂର୍ବ ସରକାରରେ ନେପାଳୀ କଂଗ୍ରେସ ସହିତ ମତଭେଦ ହେବାର କାରଣ ମଧ୍ୟ କ୍ଷମତାର ବିଭାଜନ ଥିଲା। କାରଣ କଂଗ୍ରେସ ସଭାପତି ଦେଓବା ଚାହୁଁଥିଲେ ଯେ ଦଳର ବରିଷ୍ଠ ନେତା ତଥା ନବ ନିର୍ବାଚିତ ବିଧାୟକ କୃଷ୍ଣ ସୀତୌଲାଙ୍କୁ ଜାତୀୟ ସଭାର ସଭାପତି କରାଯିବାକୁ ଚାହୁଁଥିବାବେଳେ ପ୍ରଚଣ୍ଡ ଏହି ପଦବୀ ନିଜ ଦଳ ଅଧିନରେ ରଖିବାକୁ ଚାହୁଁଥିଲେ।
ବିନା ବିଭାଜନରେ ୟୁଏମ୍ଏଲ୍ରୁ ପଦ୍ମ ଗିରି, ସିପିଏନ୍ରୁ ହିଟ ବାହାଦୂର ତମାଙ୍ଗ ଏବଂ ରାଷ୍ଟ୍ରୀୟ ସ୍ବତନ୍ତ୍ର ପାର୍ଟିର ଡୋଲ ପ୍ରସାଦ ଆର୍ୟଲ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ବିଭାଜନରେ କୌଣସି ସହମତି ହୋଇପାରି ନ ଥିବାରୁ ନେପାଳର ପ୍ରଧାନମନ୍ତ୍ରୀ ପ୍ରତିରକ୍ଷା ମନ୍ତ୍ରୀ, ବୈଦେଶିକ ମନ୍ତ୍ରୀ ଏବଂ ଗୃହମନ୍ତ୍ରୀ ସମେତ ୨୫ ମନ୍ତ୍ରଣାଳୟକୁ ନିଜ ପାଖରେ ରଖିଛନ୍ତି। ବୁଧବାର ସୁଦ୍ଧା କ୍ୟାବିନେଟ ସମ୍ପ୍ରସାରଣ ସମାପ୍ତ ହେବ ବୋଲି ଆଶା କରାଯାଉଛି।
