ନୂଆଦିଲ୍ଲୀ, ୧୭।୮ : ନିର୍ବାଚନ ସମୟରେ ମାଗଣା ସୁବିଧା ତଥା ଜିନିଷ ଯୋଗାଇବା ପାଇଁ ରାଜନୈତିକ ଦଳଗୁଡିକ ପକ୍ଷରୁ ଯୋଜନା ଘୋଷଣା ତଥା ଉପହାର ପ୍ରଦାନକୁ ରୋକା ଯାଇପାରିବ ନାହିଁ। ସୁପ୍ରିମକୋର୍ଟ କହିଛନ୍ତି ଯେ ଆମେ ଏହାକୁ ବନ୍ଦ କରିପାରିବୁ ନାହିଁ। ପ୍ରଧାନ ବିଚାରପତି ଏନ.ଭି ରମନା, ବିଚାରପତି ଜେ.କେ. ମାହେଶ୍ୱରୀ ଏବଂ ହିମା ଖୋଲିଙ୍କ ନେତୃତ୍ୱରେ ଏକ ବେଞ୍ଚ ବୁଧବାର କହିଛନ୍ତି ଯେ ବିନା ମୂଲ୍ୟରେ ଜିନିଷ ଯୋଗାଇବା ପାଇଁ ରାଜନୈତିକ ଦଳ ପକ୍ଷରୁ କରାଯାଉଥିବା ଯୋଜନା ଘୋଷଣାକୁ କୋର୍ଟ ରୋକି ପାରିବେ ନାହିଁ।
ପ୍ରଧାନ ବିଚାରପତି କହିଛନ୍ତି ଯେ ଲୋକଙ୍କ କଲ୍ୟାଣ ପାଇଁ କାର୍ଯ୍ୟ କରିବା ସରକାରଙ୍କ କାମ। ଜନସାଧାରଣଙ୍କ ଟଙ୍କା କିପରି ଖର୍ଚ୍ଚ ହେବ ତାହା ଚିନ୍ତାର ବିଷୟ ବୋଲି କୋର୍ଟ କହିଛନ୍ତି। ଏହି ବିଷୟଟି ବହୁତ ଜଟିଳ। ଏହି ପ୍ରସଙ୍ଗ ଉପରେ ଏବେ ପ୍ରଶ୍ନ ଉଠିଛି ଯେ କୋର୍ଟ ଏହି ପ୍ରସଙ୍ଗରେ କୌଣସି ନିଷ୍ପତ୍ତି ଦେବାକୁ କ୍ଷମତା ରଖିଛନ୍ତି କି? ପ୍ରଧାନ ବିଚାରପତି କହିଛନ୍ତି ଯେ କେଉଁ ଯୋଜନାକୁ ମାଗଣା ଘୋଷଣାରେ ଅନ୍ତର୍ଭୁକ୍ତ କରାଯାଇପାରିବ ଏବଂ କେଉଁଟି ନୁହେଁ, ଏହା ଏକ ଜଟିଳ ପ୍ରସଙ୍ଗ। ପ୍ରଧାନ ବିଚାରପତି କହିଛନ୍ତି, ଆମେ ରାଜନୈତିକ ଦଳଗୁଡ଼ିକୁ ପ୍ରତିଶ୍ରୁତି ଦେବା ବନ୍ଦ କରବା ଲାଗି ରୋକି ପାରିବୁ ନାହିଁ।
ପ୍ରଶ୍ନ ହେଉଛି କେଉଁ ପ୍ରତିଶ୍ରୁତି ସତ୍ୟ ଅଟେ। ଆମେ ମାଗଣା ଶିକ୍ଷାର ପ୍ରତିଶ୍ରୁତିକୁ ଫ୍ରିବିଜ ଭାବରେ ଗ୍ରହଣ କରିପାରିବା କି? ମାଗଣା ପାନୀୟ ଜଳ ଏବଂ କିଛି ୟୁନିଟ ବିଦ୍ୟୁତ ଯୋଗାଇବା ମଧ୍ୟ ଫ୍ରିବିଜ ଭାବରେ ବିବେଚନା କରାଯାଇପାରିବ କି? କିମ୍ବା ଉପଭୋକ୍ତା ସାମଗ୍ରୀ ଏବଂ ଇଲେକ୍ଟ୍ରୋନିକ୍ସ ସାମଗ୍ରୀର ବଣ୍ଟନକୁ କଲ୍ୟାଣ ଯୋଜନାରେ ଅନ୍ତର୍ଭୁକ୍ତ କରାଯାଇପାରିବ କି ବୋଲି କୋର୍ଟ ପ୍ରଶ୍ନ କରିଛନ୍ତି।
ଅଦାଲତ କହିଛନ୍ତି ଯେ ବର୍ତ୍ତମାନ ଜନସାଧାରଣଙ୍କ ଟଙ୍କା ଖର୍ଚ୍ଚ କରିବାର ସଠିକ ଉପାୟ କ’ଣ ହୋଇପାରେ ତାହା ବର୍ତ୍ତମାନ ଚିନ୍ତାର ବିଷୟ। କିଛି ଲୋକ କୁହନ୍ତି ଯେ ଟଙ୍କା ନଷ୍ଟ ହେଉଛି। ଏହା ବ୍ୟତୀତ କିଛି ଲୋକ ମତ ଦେଇଛନ୍ତି ଯେ ଏହା କଲ୍ୟାଣ ମୂଳକ କାର୍ଯ୍ୟ। ଏହି ବିଷୟ ଜଟିଳ ହେବାରେ ଲାଗିଛି। ଆପଣ ଆପଣଙ୍କର ମତାମତ ଦେଇପାରିବେ। ବିତର୍କ ଏବଂ ଆଲୋଚନା ପରେ, ଆମେ ଏହା ଉପରେ ନିଷ୍ପତ୍ତି ନେଇପାରିବା। କେବଳ ପ୍ରତିଶ୍ରୁତି ଆଧାରରେ ରାଜନୈତିକ ଦଳମାନେ ବିଜୟ ପାଆନ୍ତି ନାହିଁ ବୋଲି କୋର୍ଟ କହିଛନ୍ତି।
ଏହା ସହିତ ପ୍ରଧାନ ବିଚାରପତି ମନରେଗାର ଉଦାହରଣ ମଧ୍ୟ ଦେଇଛନ୍ତି। ସେ କହିଛନ୍ତି ଯେ ବେଳେବେଳେ ରାଜନୈତିକ ଦଳ ପ୍ରତିଶ୍ରୁତି ଦିଅନ୍ତି, କିନ୍ତୁ ଏହା ପରେ ମଧ୍ୟ ସେମାନେ ଜିତି ପାରନ୍ତି ନାହିଁ। ଆସନ୍ତା ସପ୍ତାହରେ କୋର୍ଟ ଏହି ମାମଲାର ଶୁଣାଣି କରିବାକୁ ନିଷ୍ପତ୍ତି ନେଇଛନ୍ତି। ଶନିବାର ସୁଦ୍ଧା ଏହି ପ୍ରସଙ୍ଗରେ ଏକ କମିଟି ଗଠନ ନେଇ ମତାମତ ସଂଗ୍ରହ ପରେ ସୋମବାର ଏହାର ଶୁଣାଣି ହେବ ବୋଲି କୋର୍ଟ କହିଛନ୍ତି।
