ଭୁବନେଶ୍ୱର,୨୦।୮(ସୂର୍ଯ୍ୟକାନ୍ତ ବେହେରା)ଚଢ଼ାଉବେଳେ ଧଉଳି ଥାନା ପୋଲିସ୍ ଟିମ୍ ଉପରେ ଅପରାଧୀ ଗ୍ୟାଙ୍ଗ୍ର ସଂଘବଦ୍ଧ ଆକ୍ରମଣ ହୋଇଛି। ଲିଙ୍ଗିପୁର ୩୧/୧୧ କେଭି ସବ୍ଷ୍ଟେଶନ ନିକଟରେ ଏହି ଘଟଣା ଘଟିଛି। ଏଥିରେ ଏସ୍ଆଇ ସନ୍ତୋଷ କୁମାର ଭୋଳ ଓ ଏଏସ୍ଆଇ ପ୍ରବୀର କୁମାର ଲେଙ୍କା ଆହତ ହୋଇଛନ୍ତି। ତେବେ ପୋଲିସ ଆତ୍ମରକ୍ଷା କରିବା ସହ ସେମାନଙ୍କୁ କାବୁ କରିବା ସମୟରେ ଧସ୍ତାଧସ୍ତିରେ ଜଣେ ଅଭିଯୁକ୍ତଙ୍କ ମୁଣ୍ଡ ଫାଟିଥିବା ଜଣାପଡିଛି। ତେବେ ଉଭୟଙ୍କ ମଧ୍ୟରେ ଦୀର୍ଘ ସମୟ ଧରି ଛକାପଞ୍ଝା ଭିତରେ ପୋଲିସ ୪ଜଣ ଅଭିଯୁକ୍ତଙ୍କୁ କାବୁ କରିଥିବାବେଳେ ଜଣେ ଘଟଣାସ୍ଥଳରୁ ଖସି ପଳାଇଛନ୍ତି। ଧରାପଡିଥିବା ଅଭିଯୁକ୍ତ ହେଲେ କେନ୍ଦ୍ରାପଡାର କାଳନ୍ଦୀ ପାତ୍ର, ଧଉଳିର ଅଭିଷେକ ନାୟକ, ପୁରୀର ସିଦ୍ଧାନ୍ତ ମିଶ୍ର ଓ ଖୋର୍ଦ୍ଧାର ସୁଜିତ ମହାରଣା। ସେମାନଙ୍କଠାରୁ ଗୋଟିଏ ବାଇକ, ଚାପଡ, ହାମର ଆଦି ମାରଣାସ୍ତ୍ର ଜବତ ହୋଇଛି। ଏନେଇ ପୋଲିସ ଏକ ମାମଲା ନଂ.୧୬୪/୨୩ ରୁଜୁ କରିବା ସହ ସମସ୍ତ ଅଭିଯୁକ୍ତଙ୍କୁ ଗିରଫ କରି ଅଧିକ ଖୋଳତାଡ଼ କରିଛି।
ଶୁକ୍ରବାର ରାତିରେ କେତେଜଣ ଅପରାଧୀ ଜାତୀୟ ରାଜପଥରେ ଲୁଟ୍ ଓ ଧଉଳି ଲିଙ୍ଗପୁର ଅଞ୍ଚଳରେ ବଡ଼ ଧରଣର ଡକାୟତି କରିବାକୁ ଯୋଜନା କରୁଥିବା ନେଇ ପୋଲିସ ଖବର ପାଇଥିଲା। ଏହାପରେ ଏସ୍ଆଇ ସନ୍ତୋଷ ତାଙ୍କ ଟିମ୍ ସହ ଘଟଣାସ୍ଥଳରେ ଚଢ଼ାଉ କରିଥିଲେ। ଏହି ସମୟରେ ଅପରାଧୀମାନେ ପୋଲିସ ଉପରକୁ ଆକ୍ରମଣ କରିବାରୁ ଉଭୟଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ହୋଇଥିଲା। ଏହି ସମୟରେ ଅଭିଯୁକ୍ତମାନେ ରମେଶଙ୍କ ମୁଣ୍ଡକୁ ଏକ ହାମରରେ ଆକ୍ରମଣ କରିବା ସହ ଅନ୍ୟ ଜଣେ ପୋଲିସ କର୍ମଚାରୀଙ୍କୁ କାମୁଡି ଦେଇଥିଲେ। ଫଳରେ ଉପସ୍ଥିତ ଥିବା ଅନ୍ୟ ପୋଲିସ କର୍ମଚାରୀମାନେ ଥାନାକୁ ଖବର ଦେବା ସହ ଅପରାଧୀଙ୍କୁ କାବୁ କରିବାକୁ ଚେଷ୍ଟା କରିଥିଲେ। ଏହା ଭିତରେ ଥାନାରେ ଆଉ ଏକ ଟିମ୍ ସେଠାରେ ପହଞ୍ଚତ୍ବା ପରେ ଅପରାଧୀମାନଙ୍କୁ ଚାରିପଟୁ ଘେରିଯାଇଥିଲେ। ଡକାୟତି ଗ୍ୟାଙ୍ଗ ଓ ପୋଲିସ କର୍ମଚାରୀଙ୍କ ମଧ୍ୟରେ ବହୁ ସମୟ ଧରି ଧସ୍ତାଧସ୍ତି ପରେ ୪ଜଣଙ୍କୁ କାବୁ କରାଯାଇଥିଲା। ତେବେ ଅନ୍ଧାରର ସୁଯୋଗ ନେଇ ଅନ୍ୟ ଜଣେ ଖସି ଯାଇଥିବାରୁ ତାଙ୍କୁ ଧରିବାକୁ ପୋଲିସ ଉଦ୍ୟମ ଚଳାଇଥିବା ସୂଚନା ମିଳିଛି।
