ଛତ୍ରପୁର,୧ା୧୦(ସନ୍ତୋଷ ପାଢ଼ୀ/ଦିଲ୍ଲୀପ ସାମଲ): ଗଞ୍ଜାମ ଜିଲା ଛତ୍ରପୁର ତହସିଲ ଅଧୀନ ଆର୍ଯ୍ୟପଲ୍ଲୀ ରାଜସ୍ବ ଗ୍ରାମର ଲୋକେ ପଟ୍ଟା ଦାବିରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନ ୨୧ ଦିନରେ ପହଞ୍ଚିଛି। ତେବେ ଅନଶନରେ ବସିଥିବା ଲୋକଙ୍କୁ ଛତ୍ରପୁର ଥାନା ପୋଲିସ ଉଠାଇ ଛତ୍ରପୁର ଥାନାକୁ ନେଇଯାଇଛି। ଏହାକୁ ଲୋକେ ତୀବ୍ର ବିରୋଧ କରି ନାରାବାଜି କରିଥିଲେ। ଏପରିକି ନ୍ୟାୟ ପାଇଁ ହାଇକୋର୍ଟର ଆଶ୍ରୟ ନେବେ ବୋଲି ଗଣମାଧ୍ୟମକୁ କହିଛନ୍ତି। ଭାରତୀୟ ବିକାଶ ପରିଷଦ ଓ ଆର୍ଯ୍ୟପଲ୍ଲୀ ପଞ୍ଚାୟତର ଲୋକେ ଏହି ଅନଶନରେ ସାମିଲ ହୋଇଛନ୍ତି।
ଏମାନଙ୍କ ପକ୍ଷରୁ କୁହାଯାଇଛି,୧୯୭୫ଠାରୁ ଆର୍ଯ୍ୟପଲ୍ଳୀ ପଞ୍ଚାୟତର ସାନ ଆର୍ଯ୍ୟପଲ୍ଲୀ, ବଡ଼ ଆର୍ଯ୍ୟପଲ୍ଲୀ, କେ.ଆର୍ଯ୍ୟପଲ୍ଲୀ ଓ କତୁରୁ ଗାଁ ର ୧୮୦୦ ପରିବାରର ପଟ୍ଟା ଜିଲା ପ୍ରଶାସନ ଏଯାବତ ଦେଇନାହାନ୍ତି। ପଟ୍ଟା ଦାବିରେ ଭାରତୀୟ ବିକାଶ ପରିଷଦ ପକ୍ଷରୁ ୨୦୨୨ ଫେବୃୟାରୀ ୧୫, ମେ ୨୫ , ଜୁନ ୧୭ ଓ ୨୦୨୩ ଫେବୃୟାରୀ ୬ ତାରିଖରେ ତହସିଲଦାର ଓ ଜିଲାପାଳଙ୍କ କାର୍ଯ୍ୟାଳୟଙ୍କ ସମ୍ମୁଖରେ ପ୍ରତିବାଦ ଓ ଘେରାଉ କରାଯାଇଥିଲା। ଏହାସତ୍ତ୍ୱେ ଏହାର ସମାଧାନ ନ ହେବାରୁ ୧୧ ତାରିଖରୁ ଜିଲାପାଳଙ୍କ କାର୍ଯ୍ୟାଳୟ ଆଗରେ ଆମରଣ ଅନଶନ କରାଯାଇଥିଲା।
