ଜୟପୁର,୨୬ା୮(ନି.ପ୍ର.): ବାହାର ରାଜ୍ୟକୁ ଗଞ୍ଜେଇ ଚାଲାଣ କାରବାରର ପର୍ଦ୍ଦାଫାଶ ହୋଇଛି। ଜୟପୁର ସଦର ପୋଲିସ ଚୋରା ଚାଲାଣରେ ସମ୍ପୃକ୍ତ ଜଣେ ପୋଲିସ ହୋମ୍ଗାର୍ଡଙ୍କ ସମେତ ୬ଜଣଙ୍କୁ ଗିରଫ କରିଛି। ଥାନା ଅଧିକାରୀ ଆଦିତ୍ୟ ମହାକୁଡ ଗଞ୍ଜେଇ ଚୋରା ଚାଲାଣ ସମ୍ପର୍କରେ ସୂଚନା ପାଇ ଗୁରୁବାର ଜୟପୁର ଘାଟିଠାରେ ଚଢ଼ାଉ କରିଥିଲେ। ଟ୍ରକ୍ (ଆର୍ଜେ-୨୫ ଜିଏ-୧୧୨)ରେ ଗଞ୍ଜେଇ ବୋଝେଇ କରାଯାଇ ହରିୟାଣା ଚଲାଣ କରାଯାଉଥିଲା। ଏଥିରେ ସମ୍ପୃକ୍ତ ୨ ଜଣଙ୍କୁ ଗିରଫ କରି ୧ ଟନ୍ ୩ କେଜି ଗଞ୍ଜେଇ ଜବତ କରାଯାଇଥିଲା। ଗିରଫ ଅଭିଯୁକ୍ତମାନେ ହେଲେ ରାଜସ୍ଥାନର ରଜନ ମୀନା (୨୫) ଓ ସୁରେଶ ମୀନା (୨୧) ।
ସେହିପରି ଆମ୍ବାଗୁଡ଼ାର କୋଲ୍ଷ୍ଟୋରଠାରେ ଏକ କୋଇଲା ବୋଝେଇ ଟ୍ରକ୍ (ସିଜି -୦୪-ଏଲ୍ଡି-୭୧୯୯) ଯାଞ୍ଚ ବେଳେ ଗଞ୍ଜେଇ ଚୋରା ଚାଲାଣ ଧରିଥିଲା ପୋଲିସ। କୋଇଲା ଭିତରେ ଗଞ୍ଜେଇ ବୋଝେଇ ହୋଇ ବିଶାଖାଟପାଣାରୁ ରାୟପୁର ଯାଉଥିଲା। ଘଟଣାରେ ସମ୍ପୃକ୍ତ ହୋମ୍ଗାର୍ଡ ବିଦେଶୀ କୁମାର ସାହୁ (୩୮), କୋରାପୁଟର ଡ୍ରାଇଭର ଅଭିରାମ ହରିଜନ (୩୭), ଗଜପତି ଜିଲାର ଡ୍ରାଇଭର ଭବାନୀ ପ୍ରସାଦ ସିଂ (୨୮) ଓ ବିକ୍ରମ ବୈରାଗୀ(୪୦ )ଙ୍କୁ ପୋଲିସ ଗିରଫ କରିଛି। ଟ୍ରକ୍ରୁ ୬୦ଟି ପ୍ୟାକେଟରୁ ୫୭୯ କେଜି ଗଞ୍ଜେଇ ଜବତ ହୋଇଛି। ଉଭୟ ଟ୍ରକ୍ରୁ ଜବତ ଗଞ୍ଜେଇର ବଜାର ମୂଲ୍ୟ ୧ କୋଟି ୬୦ ଲକ୍ଷ ଟଙ୍କା ହେବ। ଅଭିଯୁକ୍ତଙ୍କଠାରୁ ୩ଟି ମୋବାଇଲ, ଏଟିଏମ୍ କାର୍ଡ, ବାଇକ, କେତେକ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରାଯାଇଛି। ବାରିଣୀପୁଟର ରମେଶ ଦୋରା, ମୋହନ ଖରା, କେଶବ ମାଝି ଓ ଢେପଗୁଡ଼ାର ନବରାଜ ଶର୍ମାଙ୍କ ଏହି ଗଞ୍ଜେଇ ଚୋରାଚାଲାଣରେ ସମ୍ପୃକ୍ତି ଥିବା ତଦନ୍ତରୁ ଜଣାପଡ଼ିଛି ବୋଲି ଏସ୍ଡିପିଓ ଅରୂପ ଅଭିଷେକ ବେହେରା କହିଛନ୍ତି।
