ଭୁବନେଶ୍ୱର,୮।୭ (ବ୍ୟୁରୋ): ଏୟାରଫିଲ୍ଡ ଥାନା ଭୀମଟାଙ୍ଗି ରିିଙ୍କି ଓରଫ ପ୍ରିୟଙ୍କା ପ୍ରିୟଦର୍ଶିନୀ ସାହୁ ହତ୍ୟା ମାମଲାରେ କମିଶନରେଟ ପୋଲିସର ତଦନ୍ତ ଜାରି ରହିଛି। ପ୍ରେମରେ ବିଫଳ ହେବା ପରେ ଅଭିଯୁକ୍ତ ଜଗନ୍ନାଥ ପ୍ରଧାନ ଏଭଳି ଜଘନ୍ୟ ହତ୍ୟାକାଣ୍ଡ ଘଟାଇଛି ନା ଏହାପଛରେ ଅନ୍ୟ କୌଣସି କାରଣ ରହିଛି, ସେ ସମସ୍ତ ଦିଗକୁ ନେଇ ଏୟାରଫିଲ୍ଡ ଥାନାର ସ୍ବତନ୍ତ୍ର ଟିମ୍ ତଦନ୍ତ ଜାରି ରଖିଛି।
ପ୍ରିୟଙ୍କା, ତାଙ୍କ ସ୍ବାମୀ ରାକେଶ ଏବଂ ଅଭିଯୁକ୍ତ ଜଗନ୍ନାଥଙ୍କ ଗ୍ରାମକୁ ମଙ୍ଗଳବାର ସ୍ବତନ୍ତ୍ର ଟିମ୍ ଯିବା ସହ ପରିବାର ଲୋକଙ୍କୁ ପଚରାଉଚରା କରିଥିଲା। ସବୁଠାରୁ ବଡ଼ କଥା ହେଉଛି ରିଙ୍କି ସମେତ ତାଙ୍କର ୩ବର୍ଷର ଶିଶୁଙ୍କୁ ହତ୍ୟା କରିବା ପାଇଁ କାହିଁକି ଯୋଜନା କରିଥିଲା ଏନେଇ ମଧ୍ୟ ପୋଲିସ ତନାଘନା ଚଳାଇଛି। ଅଭିଯୁକ୍ତ ଜଗନ୍ନାଥଙ୍କୁ ହସ୍ପିଟାଲରୁ ଡାକ୍ତର ଡିସ୍ଚାର୍ଜ କରିବା ପରେ ପୋଲିସ ପାଇଥିବା ସମସ୍ତ ତଥ୍ୟ ସମ୍ପର୍କରେ ତାଙ୍କୁ ପଚରାଉଚରା କରିବ। ତା’ପରେ ହତ୍ୟାକାଣ୍ଡର ପ୍ରକୃତ କାରଣ ଜଣାପଡ଼ିବ ବୋଲି ଡିସିପି ଉମା ଶଙ୍କର ଦାଶ କହିଛନ୍ତି। ଏଥିସହ ଫରେନ୍ସିକ ଲାବ୍କୁ ରକ୍ତ ଲାଗିଥିବା ଚିଠି ସହ ଅନ୍ୟାନ୍ୟ ଜବତ ସାମଗ୍ରୀ ପଠାଯାଇଛି। ପ୍ରିୟଙ୍କାଙ୍କ ବ୍ୟବଚ୍ଛେଦ ରିପୋର୍ଟ ମଧ୍ୟ ଅନେକ ଗୁରୁତ୍ୱ ବହନ କରୁଛି। ଯେଉଁଥିରୁ ପ୍ରିୟଙ୍କାଙ୍କୁ ପାଶବିକ ଅତ୍ୟାଚାର କରି ଅଭିଯୁକ୍ତ ଜଗନ୍ନାଥ ଛୁରିରେ ଗଳା କାଟି ହତ୍ୟା କରିଛନ୍ତି ନା ଶ୍ୱାସରୁଦ୍ଧ କରି ଅନ୍ୟ କୌଣସି ଉପାୟରେ ହତ୍ୟା କରିଛନ୍ତି ତାହା ବ୍ୟବଚ୍ଛେଦ ରିପୋର୍ଟ ଆସିବାପରେ ସ୍ପଷ୍ଟ ହେବ। ଜଗନ୍ନାଥ ଓ ପ୍ରିୟଙ୍କାଙ୍କ ମଧ୍ୟରେ ଉତ୍ତମ ସମ୍ପର୍କ ଥିବାବେଳେ ହତ୍ୟା କରିବା ପାଇଁ କାହିଁକି ଯୋଜନା କଲେ। ଉଭୟଙ୍କ ଉପରେ କୌଣସି ବାହ୍ୟ ଚାପ ରହିଥିଲା କି ଏପରି ବିଭିନ୍ନ ଦିଗକୁ ନେଇ ପୋଲିସ ତଦନ୍ତ ଜାରି ରହିଛି। ବିବାହ ପୂର୍ବରୁ ପ୍ରିୟଙ୍କା ଏବଂ ଜଗନ୍ନାଥଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା। ହେଲେ ସେ କାହିଁକି ମାରିଲେ ସେନେଇ ଜାଣି ନ ଥିବା ଜଗନ୍ନାଥଙ୍କ ପରିବାର ଲୋକେ କହିଛନ୍ତି। ଜଗନ୍ନାଥ ସୁସ୍ଥ ହେବାପରେ ପୋଲିସ ତାଙ୍କୁ ଜେରା ନିମନ୍ତେ ସିନ୍ ରିକ୍ରିଏଶନ କରିବାକୁ ଯୋଜନା ରଖିଛି।
ପ୍ରକାଶ ଥାଉକି ଏୟାର ଫିଲ୍ଡ ଥାନା ଅନ୍ତର୍ଗତ ଭୀମଟାଙ୍ଗି ଅଞ୍ଚଳରେ ଗତ ସୋମବାର ସ୍ବାମୀ ରାକେଶ ଘରେ ନ ଥିବାବେଳେ ପ୍ରିୟଙ୍କାଙ୍କୁ ତାଙ୍କ ପୁରୁଷ ବନ୍ଧୁ ଜଗନ୍ନାଥ ଗଳାକାଟି ହତ୍ୟା କରିବାପରେ ନିଜେ ବିଷ ପାନ କରି ଆତ୍ମହତ୍ୟା ଉଦ୍ୟମ କରିଥିଲେ। ଏପରି କି ଘଟଣା ସ୍ଥଳରେ ତଳେ ମରି ପଡ଼ିଥିବା ପ୍ରିୟଙ୍କାଙ୍କ ଫଟୋ ଉଠାଇ ରାକେଶଙ୍କୁ ହ୍ବାଟ୍ସଆପ୍ରେ ପଠାଇଥିଲେ। ଏନେଇ ଖବର ପାଇ ପୋଲିସ ଘଟଣାସ୍ଥଳରୁ ପ୍ରିୟଙ୍କାଙ୍କ ମୃତଦେହ ଉଦ୍ଧାର କରିବା ସହ ଜଗନ୍ନାଥଙ୍କୁ ଗୁରୁତର ଅବସ୍ଥାରେ କ୍ୟାପିଟାଲ୍ ହସ୍ପିଟାଲ୍ରେ ଭର୍ତ୍ତି କରିଥିଲା।