ମୋରବି,୨।୧୧ : ମୋରବି ଝୁଲାପୋଲ ଦୁର୍ଘଟଣାରେ ୧୩୫ ଜଣଙ୍କର ମୃତ୍ୟୁ ଘଟିଛି। ତେବେ ପୋଲ ହଠାତ ଭୁଶୁଡି ପଡିଥିବା ଭାବିବା ଭୁଲ। ଏହି ଯନ୍ତ୍ରଣାଦାୟକ ଦୁର୍ଘଟଣା ନେଇ ଦୁଇ ବର୍ଷ ପୂର୍ବେ ଚେତାବନୀ ଦିଆଥିଲା। କିନ୍ତୁ ବେପରୁଆ ଅଧିକାରୀମାନେ ଏହାକୁ ଅଣଦେଖା କରିଥିଲେ।
ଗଣମାଧ୍ୟମ ରିପୋର୍ଟ ଅନୁଯାୟୀ, ପୋଲର ରକ୍ଷଣାବେକ୍ଷଣ ଏବଂ ମରାମତି ଦାୟିତ୍ୱ ନେଇଥିବା ଓରେଭା କମ୍ପାନୀ ପକ୍ଷରୁ ଜାନୁଆରୀ ୨୦୨୦ ତାରିଖର ଚିଠି ସାମ୍ନାକୁ ଆସିଛି। ଏହି ଚିଠି ମୋରବି ଜିଲା କଲେକ୍ଟରଙ୍କୁ ଲେଖାଯାଇଥିଲା। ଏଥିରେ କୁହାଯାଇଥିଲା ଯେ ଅସ୍ଥାୟୀ ମରାମତି କରି ଆମେ ପୋଲକୁ ଖୋଲିଦେବୁ। ଏହି ଚିଠି ପରେ ମଧ୍ୟ ଅଧିକାରୀମାନେ ଚୁପ ରହିଲେ ଏବଂ ଏତେ ବଡ଼ ଦୁର୍ଘଟଣା ଘଟିଲା ।
ଜାନୁୟାରୀ ୨୦୨୦ର ଏହି ଚିଠିରେ ଏଭଳି ଘଟଣା ସାମ୍ନାକୁ ଆସିଛି ଯାହା ସୂଚାଇ ଦେଉଛି ଯେ ସେତୁ ପାଇଁ ଚୁକ୍ତିନାମାକୁ ନେଇ କମ୍ପାନୀ ଏବଂ ଜିଲା ପ୍ରଶାସନ ମଧ୍ୟରେ ଲଢ଼େଇ ଜାରି ରହିଥିଲା। ପୋଲର ରକ୍ଷଣାବେକ୍ଷଣ ପାଇଁ ଓରେଭା ଗ୍ରୁପ ସ୍ଥାୟୀ ଚୁକ୍ତି ଚାହୁଁଥିବା ଚିଠିରେ ଦର୍ଶାଯାଇଛି। ସ୍ଥାୟୀ ଚୁକ୍ତି ନହେବା ପର୍ଯ୍ୟନ୍ତ ପୋଲ ଉପରେ ଅସ୍ଥାୟୀ ମରାମତି ଜାରି ରଖିବେ ବୋଲି କମ୍ପାନୀ କହିଥିଲା।
ଏହାସହ ଏହା ମଧ୍ୟ କୁହାଯାଇଛି ଯେ ଓରେୱା ଫାର୍ମ ବ୍ରିଜର ମରାମତି ପାଇଁ ସାମଗ୍ରୀ ଅର୍ଡର କରିବ ନାହିଁ ଏବଂ କମ୍ପାନୀର ଦାବି ପୂରଣ ହେବା ପରେ କାର୍ଯ୍ୟ ଶେଷ ହେବ।
ସମସ୍ତ ଅବହେଳା ପରେ ମଧ୍ୟ ଓରେଭା ଗ୍ରୁପକୁ ଜିଲା ପ୍ରଶାସନ ସ୍ଥାୟୀ ଟେଣ୍ଡର ପ୍ରଦାନ କରିଥିଲା। ଜାନୁୟାରୀ ୨୦୨୦ରେ ଜାରି ହୋଇଥିବା ଏହି ଚିଠି ପରେ ମଧ୍ୟ ଓରେଭା ଗ୍ରୁପ ସହିତ ପୋଲର ପରିଚାଳନା ଏବଂ ରକ୍ଷଣାବେକ୍ଷଣ ପାଇଁ ୧୫ ବର୍ଷ ପାଇଁ ଚୁକ୍ତିନାମା ସ୍ବାକ୍ଷରିତ ହୋଇଥିଲା। ମାର୍ଚ୍ଚ ୨୦୨୨ ରେ ମୋରବି ମ୍ୟୁନିସିପାଲିଟି କର୍ପୋରେଶନ ଏବଂ ଅଜନ୍ତା ଓରେଭା କମ୍ପାନୀ ମଧ୍ୟରେ ଚୁକ୍ତିନାମା ସ୍ବାକ୍ଷରିତ ହୋଇଥିଲା। ଏହି ଚୁକ୍ତି ୨୦୩୭ ପର୍ଯ୍ୟନ୍ତ ବୈଧ ଥିଲା।
ଦୁର୍ଘଟଣା ପରେ ମୋରବି ମ୍ୟୁନିସିପାଲିଟି ଏହି ଦୁର୍ଘଟଣାକୁ ସମ୍ପୂର୍ଣ୍ଣ ରୂପେ ଏଡାଇ ଦେଇଥିଲା। ମିଡିଆ ରିପୋର୍ଟ ଅନୁଯାୟୀ ମ୍ୟୁନିସିପାଲିଟି ଅଧିକାରୀ ସନ୍ଦୀପ ସିଂ କହିଛନ୍ତି ଯେ ଓରେଭା ଗ୍ରୁପ ଚୁକ୍ତିନାମାର ଉଲ୍ଲଂଘନ କରିଛି। କମ୍ପାନୀ ପୌରସଂସ୍ଥାକୁ ନ ଜଣାଇ ପାଞ୍ଚ ମାସ ମଧ୍ୟରେ ପୋଲ ଖୋଲିଥିଲେ। ସେ କହିଛନ୍ତି ଯେ ପୋଲ ସମ୍ପର୍କରେ ତାଙ୍କ ପକ୍ଷରୁ କୌଣସି ଏନ୍ଓସି ପ୍ରମାଣପତ୍ର ମଧ୍ୟ ଦିଆଯାଇ ନାହିଁ।
