ଭୁବନେଶ୍ୱର, ୧୧।୩(ବ୍ୟୁରୋ):ବରଗଡ଼ ବନଖଣ୍ଡ ଅଧୀନ ଭଟଲି ରେଞ୍ଜ ଅନ୍ତର୍ଗତ ଦେଉଚୁଆଁ ସଂରକ୍ଷିତ ଜଙ୍ଗଲରେ ଥିବା ଏକ ପୋଖରୀରେ ଅନେକ ମାଛ ମରି କୂଳରେ ଲାଗିଥିଲେ। ଏଥିସହ ଅନେକ କଙ୍କଡା ଓ ଚିଙ୍ଗୁଡ଼ି ମଧ୍ୟ ମରି କୂଳରେ ପଡ଼ିଥିବା ଦେଖିବାକୁ ମିଳିଥିଲା। ତାହା ବିଷକ୍ରିୟାଜନିତ ମୃତ୍ୟୁ କି ନାହିଁ ଜାଣିବା ପାଇଁ ବରଗଡ଼ ଡିଏଫ୍ଓଙ୍କ ନିର୍ଦ୍ଦେଶରେ ମଲା ମାଛ ଓ ପାଣିର ନମୁନା ଭୁବନେଶ୍ୱର ଓୟୁଏଟିସ୍ଥିତ ସେଣ୍ଟର ଫର ୱାଇଲ୍ଡ ଲାଇଫ୍ ହେଲ୍ଥକୁ ପରୀକ୍ଷା ପାଇଁ ପଠାଯାଇଥିଲା। ସେହି ନମୁନା ସବୁ ପଜିଟିଭ୍ ଆସିଛି। ମାଛ ଓ ପାଣି ନମୁନାରୁ ଅତ୍ୟଧିକ ପରିମାଣର କ୍ଲୋରପାଇରିଫସ ବିଷ ଥିବା ସ୍ପଷ୍ଟ ହୋଇଛି। ଏହି କ୍ଲୋରପାଇରିଫସ ଏକ ଉତ୍କଟ ରାସାୟନିକ କୀଟନାଶକ। ଏହାକୁ ଯେଉଁ ବି ପ୍ରାଣୀ ଖାଇବ ସିଏ ଅଳ୍ପ ସମୟରେ ଛଟପଟ ହୋଇ ମରିବ। ତେଣୁ ଭଟଲିରେ ସେହି ପୋଖରୀର ପାଣି ପିଇ ଅନ୍ୟ କୌଣସି ବନ୍ୟପ୍ରାଣୀ ମରିଥିବେ ଆଶଙ୍କା କରାଯାଉଛି।
ସୂଚନାଯୋଗ୍ୟ, ବିଶ୍ୱସ୍ତସୂତ୍ରରୁ ଖବର ପାଇ ବରଗଡ଼ ଏସିଏଫ୍ ତଦନ୍ତ କଲା ପରେ ପୋଖରୀରେ ବିଷ ମିଶିଥିବା କଥା ପଦାକୁ ଆସିଥିଲା। ହେଲେ ଭଟଲି ରେଞ୍ଜର ଏହି ଘଟଣାକୁ ବାଣ ଫୁଟେଇ ମାଛ ମରା କହି ତଦନ୍ତ କୁ ବିଭ୍ରାନ୍ତ କରିବାକୁ ଚେଷ୍ଟା କରିଥିଲେ। ହେଲେ ବରଗଡ଼ ଡିଏଫ୍ଓଙ୍କ କଡ଼ା ଆଦେଶ ଫଳରେ ଗତ ଫେବୃୟାରୀ ୨୬ରେ ସେହି ଦୂଷିତ ପୋଖରୀରୁ ମଲା ମାଛ ଏବଂ ପାଣି ନମୁନା ଓୟୁଏଟିକୁ ପଠାଯାଇଥିଲା। ନମୂନା ପଜିଟିଭ ଆସିବା ପରେ ଭଟଲି ରେଞ୍ଜ କର୍ମଚାରୀଙ୍କ ସତ ଲୁଚେଇବା କଥା ପୁଣି ଥରେ ଧରା ପଡ଼ିଯାଇଛି। ଏଠାରେ ଉଲ୍ଲେଖଯୋଗ୍ୟ, ୨୦୧୮ରେ ଏହି ଭଟଲି ରେଞ୍ଜର ଏବଂ ତତ୍କାଳୀନ ଡିଏଫ୍ଓ ଏକ ମହାବଳ ବାଘର ମୃତ ଦେହ ଜବତ ହେବା ପରେ ତାହାକୁ କଲରାପତରିିଆ ବାଘ ବୋଲି ମିଛ ରିପୋର୍ଟ ଦେଇଥିଲେ। କିନ୍ତୁ କ୍ରାଇମବ୍ରାଞ୍ଚ ତଦନ୍ତ ହେବାରୁ ସତ ଧରା ପଡ଼ିଯାଇଥିଲା। ଯଦି ସେତେବେଳେ ତତ୍କାଳୀନ ବରଗଡ଼ ଡିଏଫ୍ଓ ଏବଂ ଭଟଲି ରେଞ୍ଜରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥାନ୍ତା ତେବେ ବରଗଡ଼ରେ ଶିକାରୀମାନେ ମଧ୍ୟ ଶିକାର ପାଇଁ ଭୟ କରିଥାନ୍ତେ ବୋଲି ବନ୍ୟ ପ୍ରାଣୀ ବିଶେଷଜ୍ଞ ଶୁଭେନ୍ଦୁ ମଲ୍ଲିକ କହିଛନ୍ତି।
କ୍ଲୋରପାଇରିଫସ ଏକ ଭୟଙ୍କର ବିଷ ଯାହାକି ସେହି ପାଣିକୁ ସମ୍ପୂର୍ଣ୍ଣ ଦୂଷିତ କରିଦେଲା। ଆଉ ସେହି ପୋଖରୀରୁ ପାଣି ବ୍ୟବହାର କରାଯାଇ ପାରିବନି ବୋଲି କହିଛନ୍ତି ଏମ୍ସ ଭୁବନେଶ୍ୱରର ଫରେନ୍ସିକ ଏବଂ ଟକ୍ସିକୋଲୋଜି ବିଭାଗର ଆଡ଼ିଶନାଲ ପ୍ରଫେସର ଡା. ସୁଦୀପ୍ତ ରଞ୍ଜନ ସିଂହ। ସୁଦୀପ୍ତ ଆହୁରି ମଧ୍ୟ କହିଛନ୍ତି ଯେ, ସେହି ପାଣିକୁ ପୁନଶ୍ଚ ବ୍ୟବହାର ଉପଯୋଗୀ କରିବା ପାଇଁ ମଧ୍ୟ କିଛି ରାସାୟନିକ ନାହିଁ। ବରଂ ସମୟ କ୍ରମେ ବିଷର ପ୍ରଭାବ ଧୀରେ ଧୀରେ ନଷ୍ଟ ହେବ। ନିୟମିତ ଅନ୍ତରାଳରେ ସେହି ପୋଖରୀରୁ ପାଣି ନମୁନା ଆଣି ପରୀକ୍ଷା କରିବେ ଏବଂ ଯେତେବେଳେ ନମୁନାରୁ ବିଷ ସାମ୍ପଲ ନେଗେଟିଭ ଆସିବ ତେବେ ଯାଇ ତାହା ବ୍ୟବହାର କରିହେବ। ତାହା ପୂର୍ବରୁ ସେହି ପାଣି ବ୍ୟବହାର ଘାତକ ହେଇପାରେ। ସେହି ପାଣି ପିଇ ଯେଉଁ ଜନ୍ତୁ ମରିଥିବେ ତାଙ୍କୁ ଖାଇଥିବା ପ୍ରାଣୀ ମଧ୍ୟ ବିପଦରେ ପଡ଼ିବେ। ତେଣୁ ସେହି ପାଣିକୁ କୌଣସି ଜୀବଜନ୍ତୁ ବା ମଣିଷ ବର୍ତ୍ତମାନ ପରିସ୍ଥିତିରେ ବ୍ୟବହାର କରିବା ଆଦୌ ଉଚିତ ନୁହେଁ ବୋଲି ଡା. ସୁଦୀପ୍ତ ପରାମର୍ଶ ଦେଇଛନ୍ତି।