ନୂଆଦିଲ୍ଲୀ,୧୭ ।୧୧: ବୈଦେଶିକ ମନ୍ତ୍ରଣାଳର ସୂଚନା ଅନୁଯାୟୀ ମଙ୍ଗଳବାର ଆୟୋଜିତ ହେଉଛି ବିକ୍ସ ଶିଖର ସମ୍ମିଳନୀ । ରୁଷିଆ ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ଆମନ୍ତ୍ରଣ କ୍ରମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ୧୨ତମ ବ୍ରିକ୍ସ ସମ୍ମିଳନୀରେ ଯୋଗ ଦେବେ । ଏହି ସମ୍ମିଳନୀର ଆୟୋଜନ ଭର୍ଚୁଆଲ ମାଧ୍ୟମରେ କରାଯିବ । ଏଥିରେ ଚାଇନା ରାଷ୍ଟ୍ରପତି ସି ଜିନପିଂଗ, ବ୍ରାଜିଲ ରାଷ୍ଟ୍ରପତି ଜେୟର ବୋଲସୋନାରୋଓ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁତିନ ଯୋଗ ଦେବାର କାର୍ଯ୍ୟକ୍ରମ ରହିଛି । ଏହି ସମ୍ମିଳନୀ ଏପରି ସମୟରେ ଆୟୋଜନ କରାଯାଇଛି ଯେତେବେଳେ ସମ୍ମିଳନୀରେ ଯୋଗ ଦେଉଥିବା ଦୁଇ ପ୍ରମୁଖ ଦେଶ ମଧ୍ୟରେ ସୀମା ବିବାଦ ଚରମ ସୀମାରେ ପହଞ୍ଚିଛି । ଭାରତ-ଚାଇନା ମଧ୍ୟରେ ଗତ ମେ’ ମାସରୁ ପୂର୍ବ ଲଦ୍ଦାଖ ସୀମାରେ ଉତ୍ତେଜନା ପରିସ୍ଥିତି ଲାଗି ରହିଛି । ଦୁଇ ଦେଶର ସେନାଙ୍କ ମଧ୍ୟରେ ହିଂସା ଭଳି ଘଟଣା ଉପୁଜିଥିବା ବେଳେ କେହି ପଛକୁ ହଟିବାକୁ ରାଜି ହେଉ ନାହାଁନ୍ତି । ଅନ୍ୟପଟେ ପଛକୁ ହଟିବାକୁ ନେଇ ଦିଆଯାଇଥିବା ପ୍ରସ୍ତାବ ଉପରେ କଥାବାର୍ତ୍ତା ଚାଲିଛି । ସୂଚନାଯୋଗ୍ୟ, ନିକଟରେ ନରେନ୍ଦ୍ର ମୋଦି ଓ ସି ଜିନପିଙ୍ଗଙ୍କ ମଧ୍ୟରେ ୧୦ ନଭେମ୍ବରରେ ସାଂଘାଇ ସହଯୋଗ ସଙ୍ଗଠନ(ଏସ୍ ସିଓ)ବୈଠକରେ ସାମ୍ନା ସାମ୍ନି ହୋଇଥିଲା । ଏବେ ବ୍ରିକ୍ସ ସମ୍ମିଳନୀ ପରେ ୨୧ ଓ ୨୨ ନଭେମ୍ବରରେ ଜି-୨୦ ବୈଠକରେ ପୁଣି ଦୁଇ ନେତା ସାମ୍ନା ସାମ୍ନି ହେବାର କାର୍ଯ୍ୟକ୍ରମ ରହିଛି ।
