ନୂଆଦିଲ୍ଲୀ,୨୭ ।୧୧: ଦକ୍ଷିଣ ଆଫ୍ରିକାରେ ଦେଖାଦେଇଥିବା କରୋନାର ନୂଆ ଭାରିଏଣ୍ଟ ଓମିକ୍ରୋନର ଭୟାବହତାକୁ ଦେଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଅଧିକାରୀଙ୍କ ସହ ଦୁଇ ଘଣ୍ଟା ଧରି ଏକ ବୈଠକରେ ଆଲୋଚନା କରିଥିଲେ । ମୋଦି କହିଥିଲେ ଅନ୍ତର୍ଜାତୀୟ ବିମାନ ସେବାରେ ଯେଉଁ ଢିଲା ଦିଆଯାଉଛି ତାକୁ ପୁଣିଥରେ ସମୀକ୍ଷା କରାଯାଉ । ଏହାସହ ନୂଆ ଭାରିଏଣ୍ଟକୁ ନେଇ ସେ ଚିନ୍ତା ପ୍ରକଟ କରିବା ସହ ବିଦେଶରୁ ଆସୁଥିବା ଯାତ୍ରୀଙ୍କ ଉପରେ କଡା ନଜର ରଖିବାକୁ ମଧ୍ୟ ମୋଦି କହିଛନ୍ତି । ଯେଉଁ ଦେଶରେ ଏହି ନୂଆ ଭାରିଏଣ୍ଟ ଦେଖାଯାଇଛି ସେଠାରୁ ଆସୁଥିବା ଯାତ୍ରୀଙ୍କ ଉପରେ ଅଧିକ ଧ୍ୟାନ ଦେବାକୁ ସେ କହିଛନ୍ତି । ଏହି କରୋନା ମହାମାରୀକୁ ଦୂରେଇବା ଓ ନୂଆ ଭାରିଏଣ୍ଟ ଠାରୁ ଦୂରେଇ ରହିବାକୁ କେନ୍ଦ୍ର ସରକାରଙ୍କ ଅଧିକାରୀମାନେ ରାଜ୍ୟ ସରକାରଙ୍କ ସହ ମିଶି କାମ କରନ୍ତୁ । ଏହାସହ ନୂଆ ଭାରିଏଣ୍ଟକୁ ଚିହ୍ନିବା ପାଇଁ ରାଜ୍ୟରୁ ଜିଲା ସ୍ତର ପର୍ଯ୍ୟନ୍ତ ସଚେତନତା ସୁନିଶ୍ଚିତ କରିବାକୁ ସେ ନିର୍ଦ୍ଦେଶ ଜାରି କରିଛନ୍ତି । ଏହାସହ କରୋନା ସଂକ୍ରମଣ ଓ ଯାଞ୍ଚ ଉପରେ ବି ଗୁରୁତ୍ୱ ଦିଆଯାଉ । ସୂଚନାଯୋଗ୍ୟ, ଦକ୍ଷିଣ ଆଫ୍ରିକାରେ ଦେଖାଯାଇଥିବା ନୂଆ ଭାରିଏଣ୍ଟକୁ ଦେଖି ବିଭିନ୍ନ ଦେଶ ସେମାନଙ୍କ ବିମାନ ସେବା ବନ୍ଦ କରିବା ଆରମ୍ଭ କରିଛନ୍ତି । ଭାରତ ମଧ୍ୟ ଏହାକୁ ସେଇ ସତର୍କ ରହିବାକୁ କହିଛି ଓ ଦକ୍ଷିଣ ଆଫ୍ରିକାରୁ ଆସୁଥିବା ଯାତ୍ରୀଙ୍କ ଉପରେ ଅଧିକ ଧ୍ୟାନ ଦେବାକୁ କୁହାଯାଇଛି ।
