ନୂଆଦିଲ୍ଲୀ,୧୭ ।୯: ଭାରତ ସ୍ୱାଧିନତା ପରେ ଯାହାକୁ ହରାଇଥିଲା ତାହା ହେଉଛି ଜଙ୍ଗଲର ଉସେନ ବୋଲ୍ଟ ‘ଚିତା’ । ୧୯୪୮ରେ ଦେଶରେ ଶେଷ ଚିତାକୁ ଦେଖିବାକୁ ମିଳିଥିଲା । ଏହାପରେ ଚିତା ବିଲୁପ୍ତ ହୋଇଯାଇଥିଲେ । ଏବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶାସନ କାଳରେ ଦୀର୍ଘ ୭୪ ବର୍ଷ ପରେ ଚିତା ପୁଣିଥରେ ଭାରତ ଭୂମିରେ ପାଦ ରଖିବାକୁ ଯାଉଛି । ଏହି ଐତିହାସିକ ମୁହୂର୍ତ୍ତରେ ଆଉ ଏକ ଗୁରୁତ୍ୱପୂର୍ଣ୍ଣ କଥା ହେଉଛି ଆଜି ଅର୍ଥାତ୍ ଶନିବାର ୧୭ ସେପ୍ଟେମ୍ବରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୭୨ ବର୍ଷରେ ପଦାର୍ପଣ କରୁଛନ୍ତି ।
ମୋଦି ନାବିବିୟାରୁ ଆସୁଥିବା ୮ ଚିତାଙ୍କୁ ସ୍ୱାଗତ କରିବାକୁ ଉଜବେକିସ୍ତାନରୁ ଫେରି ମଧ୍ୟପ୍ରଦେଶର କୁନୋ ନ୍ୟାଶନାଲ ପାର୍କରେ ପହଞ୍ଚିବେ । ଏହିଠାରେ ହିଁ ବିଦେଶରୁ ଆସୁଥିବା ୮ ଚିତାଙ୍କୁ ରଖାଯିବ ।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି କାର୍ଯ୍ୟସୂଚୀ ଅନୁଯାୟୀ, ମୋଦି ସକାଳ ୯ଟା ୨୦ ମିନିଟରେ ଗ୍ୱାୟାଲିୟର ବିମାନ ବନ୍ଦରରେ ପହଞ୍ଚିବେ । ଏହାପରେ ସେ ଶୟୋପୁର ଜିଲା ସ୍ଥିତ କୁନୋ ନ୍ୟାଶନାଲ ପାର୍କ ଯାତ୍ରା କରିବେ । ଏହାର ଦୂରତା ପ୍ରାୟ ୧୬୫ କିଲୋମିଟର । ଏହାପରେ ସେ ଚିତାଙ୍କୁ ରିଲିଜ କରାଯିବାକୁ ଥିବା ସାଇଟରେ ୧୦ଟା ୩୦ରେ ପହଞ୍ଚିବାର କାର୍ଯ୍ୟକ୍ରମ ରହିଛି ଏହାସହ ଦ୍ୱିତୀୟ ସାଇଟରେ ୧୦ଟା ୪୫ରେ ପହଞ୍ଚି ସେହିଠାରେ ଚିତାଙ୍କୁ ଛାଡିବେ ।
ନାମିବିୟାରୁ ଆସୁଥିବା ୮ ଚିତାଙ୍କ ମଧ୍ୟରେ ୫ଟି ମାଇ ଚିତା ଓ ୩ଟି ପୁରୁଷ ଚିତା ରହିଛନ୍ତି । ଏହି ଚିତା ପୂର୍ବରୁ ଏକ ସ୍ପେଶାଲ ଜମ୍ବୋ ଜେଟରେ ସକାଳ ୬ଟାରେ ଗ୍ୱାୟାଲିୟର ପହଞ୍ଚିଯାଇଥିବେ । ଏହାପରେ ବାୟୁସେନା ହେଲିକପ୍ଟରରେ ଏମାନଙ୍କୁ କୁନୋ ନ୍ୟାଶନାଲ ପାର୍କ ପର୍ଯ୍ୟନ୍ତ ନିଆଯିବ । ପ୍ରଥମେ ସେମାନଙ୍କୁ ଏକ ସ୍ପେଶାଲ ବାଡ ମଧ୍ୟରେ ରଖାଯିବ । ସେମାନେ ଏହି ବାଡରେ କିଛି ସମୟ ପାଇଁ କ୍ୱାରାଣ୍ଟାଇନରେ ରହିବେ । ଏହାପରେ ସେମାନଙ୍କୁ ଖୋଲା ଜଙ୍ଗଲରେ ଛାଡି ଦିଆଯିବ । ମୋଦି ପିଞ୍ଜରାରର ଲିଭର ଟାଣି ଚିତାଙ୍କୁ ଜଙ୍ଗଲରେ ଛାଡିବେ । ଚିତାଙ୍କୁ ଛାଡିବା ପରେ ମୋଦି ସେଠାରେ ଏକ ଇଣ୍ଟରଆକ୍ସନରେ ଭାଗ ନେବେ । ଚିତାଙ୍କୁ ଭାରତ ଆଣିବାକୁ ନେଇ ଗୁରୁବାର ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଆସିଥିବା ବୟାନରେ କୁହାଯାଇଥିଲା କି ମୋଦି ଦେଶରେ ବନ୍ୟଜୀବକୁ ପୁନର୍ଜିବିତ ଓ ବିବିଧ କରିବାର ପ୍ରୟାସର ଏହା ହେଉଛି ଏକ ଅଂଶ । ଭାରତକୁ ପୁଣିଥରେ ଚିତା ବାଘ ଫେରାଇ ଆଣିବା ‘ପ୍ରୋଜେକ୍ଟ ଚିତା’ ବିଶ୍ୱର ସବୁଠାରୁ ବଡ ୱାଇଲ୍ଡ ଲାଇଫ ଟ୍ରାନ୍ସଲୋକେଶନ ପ୍ରୋଜେକ୍ଟ ମଧ୍ୟରୁ ଗୋଟିଏ ।
ଚିତାଙ୍କୁ ଦେଶକୁ ଆଣିବା ଦ୍ୱାରା ଘାସ ଜଙ୍ଗଲ ଓ ଖୋଲା ଜଙ୍ଗଲର ପରିସ୍ଥିତିରେ ସନ୍ତୁଳନ ରକ୍ଷା ହୋଇପାରିବ । ଏହା ଜୈବ ବିବିଧତାକୁ ବି ବଜାୟ ରଖିବ ।
