ଭୋପାଳ,୨୪।୪: ମଧ୍ୟପ୍ରଦେଶର ରେୱାଠାରେ ଜାତୀୟ ପଞ୍ଚାୟତିରାଜ ଦିବସରେ ଆୟୋଜିତ ପଞ୍ଚାୟତରାଜ ସମ୍ମିଳନୀ କାର୍ଯ୍ୟକ୍ରମରେ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାମିଲ ହୋଇଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ୧୭ ହଜାର କୋଟି ମୂଲ୍ୟର ପ୍ରକଳ୍ପର ମୂଳଦୁଆ ପକାଇଛନ୍ତି। ଏଥିସହ ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ୪ ଲକ୍ଷ ୧୧ ହଜାର ଲୋକଙ୍କୁ ଭର୍ଚୁଆଲ ଗୃହ ପ୍ରବେଶ କରାଇଛନ୍ତି। ଏହା ପରେ ଜନସାଧାରଣଙ୍କୁ ସମ୍ବୋଧିତ କରି କହିଛନ୍ତି, ଦେଶର ୨.୫ ଲକ୍ଷରୁ ଅଧିକ ପଞ୍ଚାୟତକୁ ଜାତୀୟ ପଞ୍ଚାୟତରାଜ ଦିବସର ଅନେକ ଶୁଭେଚ୍ଛା। ଆଜି ୩୦ ଲକ୍ଷରୁ ଅଧିକ ପଞ୍ଚାୟତ ପ୍ରତିନିଧି ମଧ୍ୟ ଆମ ସହିତ ସଂଯୁକ୍ତ ଅଟନ୍ତି। ଏହା ନିଶ୍ଚିତ ଭାବରେ ଭାରତର ଗଣତନ୍ତ୍ରର ଏକ ଶକ୍ତିଶାଳୀ ଚିତ୍ର।
ପ୍ରଧାନମନ୍ତ୍ରୀ ଆହୁରି କହିଛନ୍ତି, ଆମେ ସମସ୍ତେ ଜନସାଧାରଣଙ୍କ ପ୍ରତିନିଧୀ। ଆମେ ସମସ୍ତେ ଏହି ଦେଶ, ଏହି ଗଣତନ୍ତ୍ର ପାଇଁ ଉତ୍ସର୍ଗୀକୃତ। କାର୍ଯ୍ୟର ପରିସର ଭିନ୍ନ ହୋଇପାରେ, କିନ୍ତୁ ଲକ୍ଷ୍ୟ ସମାନ। ସ୍ବାଧୀନତାର ଏହି ଅମୃତକାଳ ଆମ ସମସ୍ତ ଦେଶବାସୀ ଏକ ବିକଶିତ ଭାରତର ସ୍ବପ୍ନ ଦେଖିଛନ୍ତି ଏବଂ ଏହାକୁ ପୂରଣ କରିବା ପାଇଁ ଦିନରାତି କାର୍ଯ୍ୟ କରୁଛନ୍ତି। ଭାରତକୁ ବିକଶିତ କରିବା ପାଇଁ ଭାରତର ଗ୍ରାମଗୁଡିକର ସାମାଜିକ ବ୍ୟବସ୍ଥାର ବିକାଶ କରିବା ଆବଶ୍ୟକ। ଏହି ଚିନ୍ତାଧାରା ସହିତ ଆମ ସରକାର କ୍ରମାଗତ ଭାବରେ ଦେଶର ପଞ୍ଚାୟତ ବ୍ୟବସ୍ଥାକୁ ମଜବୁତ କରିବା ପାଇଁ କାର୍ଯ୍ୟ କରୁଛନ୍ତି।
