ନୂଆଦିଲ୍ଲୀ,୩୧।୧: ଡିଟରଜେଣ୍ଟରେ ଥିବା ଏନ୍ଜାଇମ୍ ଗୋଟିଏ ଥର ବ୍ୟବହୃତ ବାୟୋପ୍ଲାଷ୍ଟିକ୍କୁ ରିସାଇକ୍ଲିଂ (ପୁନଃ ଚକ୍ରଣ) କରିବାରେ ସହାୟକ ହୋଇପାରିବ। ଏଥିପାଇଁ ବୈଜ୍ଞାନିକମାନେ ଏକ ଗୁରୁତ୍ୱପୂର୍ଣ୍ଣ ପଦ୍ଧତି ବିକଶିତ କରିଛନ୍ତି। ସେଲ୍ ରିପୋର୍ଟସ ଫିଜିକାଲ ସାଇନ୍ସ ପତ୍ରିକାରେ ଉକ୍ତ ପଦ୍ଧତି ସମ୍ପର୍କରେ ବର୍ଣ୍ଣନା କରାଯାଇଛି। ରିପୋର୍ଟ ଅନୁଯାୟୀ ମାତ୍ର ୨୪ ଘଣ୍ଟା ମଧ୍ୟରେ ଉକ୍ତ ଏନ୍ଜାଇମ୍ ବାୟୋପ୍ଲାଷ୍ଟିକ୍ଗୁଡ଼ିକୁ ଡିପଲିମେରାଇଜ୍ ବା ବିଘଟନ କରିପାରିବ। ବାୟୋପ୍ଲାଷ୍ଟିକ୍ ସାମଗ୍ରୀଗୁଡ଼ିକୁ କମ୍ପୋଷ୍ଟରେ ପରିଣତ କରିବା ପାଇଁ ବ୍ୟବହୃତ ଔଦ୍ୟୋଗିକ ପ୍ରକ୍ରିୟାରେ ୧୨ ସପ୍ତାହ ସମୟ ଲାଗୁଥିବାବେଳେ ନୂତନ ପ୍ରକ୍ରିୟାରେ ବାୟୋପ୍ଲାଷ୍ଟିକ୍ ପଲିଲାକ୍ଟିକ୍ ଏସିଡ୍ (ପିଏଲ୍ଏ) ତୁରନ୍ତ ସମ୍ପୂର୍ଣ୍ଣ ଡିଗ୍ରେଡେଶନ ହୋଇଥାଏ। ଅର୍ଥାତ୍ ନୂତନ ପ୍ରକ୍ରିୟା ୮୪ ଗୁଣ ଦ୍ରୁତ କାର୍ଯ୍ୟ କରିଥାଏ ବୋଲି ଗବେଷକମାନେ କହିଛନ୍ତି। ବୈଜ୍ଞାନିକମାନଙ୍କର ଏହି ନୂଆ ଆବିଷ୍କାର ଏକକ ବ୍ୟବହୃତ ପିଏଲ୍ଏ ପ୍ଲାଷ୍ଟିକ୍ ରିସାଇକ୍ଲିଂ ଦିଗରେ ଏକ ବଡ଼ ସମାଧାନ ହେବାକୁ ଯାଉଛି। ବାୟୋପ୍ଲାଷ୍ଟିକ୍କୁ ୯୦ ଡିଗ୍ରୀ ସେଲ୍ସିୟସ୍ ତାପମାତ୍ରାରେ ଅଧିକ ୨୪ ଘଣ୍ଟା ରଖିଲେ, ସେଗୁଡ଼ିକ ବିଘଟିତ ହୋଇ ରାସାୟନିକ ବିନ୍ୟାସ ବ୍ଲକ୍ରେ ପରିଣତ ହୋଇଥାଏ ବୋଲି ଲଣ୍ଡନର କିଙ୍ଗସ୍ କଲେଜର ବୈଜ୍ଞାନିକମାନେ କହିଛନ୍ତି। ସେମାନଙ୍କ କହିବା ଅନୁଯାୟୀ ବାୟୋପ୍ଲାଷ୍ଟିକ୍ ବିଘଟିତ ହୋଇ ମନୋମର ବା ଏକକ ଅଣୁରେ ପରିଣତ ହେବା ପରେ ତାହାକୁ ପୁନର୍ବାର ବିଭିନ୍ନ ପ୍ରକାର ପୁନଃ ବ୍ୟବହାରଯୋଗ୍ୟ ଉଚ୍ଚ ମାନର ପ୍ଲାଷ୍ଟିକ୍ରେ ପରିବର୍ତ୍ତନ କରାଯାଇପାରିବ। ବର୍ତ୍ତମାନ ଯେଉଁ ହାରରେ ପ୍ଲାଷ୍ଟିକ ସାମଗ୍ରୀ ଉତ୍ପାଦନ ହେଉଛି, ତାହାକୁ ନଷ୍ଟ କରିବା ସାମର୍ଥ୍ୟ ସ୍ଥାୟୀ ଭାବେ ବଢ଼ିପାରିବ ବୋଲି ଗବେଷକମାନେ କହିଛନ୍ତି। ପ୍ଲାଷ୍ଟିକ୍ ସାମଗ୍ରୀ ପର୍ଯ୍ୟାପ୍ତ ପରିମାଣରେ ଉତ୍ପାଦନ ହେଉଥିବାବେଳେ ସେହି ଅନୁପାତରେ ଏହାକୁ ରିସାଇକ୍ଲିଂ କରିବା ପାଇଁ ଆମ ପାଖରେ ସାମର୍ଥ୍ୟ ନ ଥିବାରୁ ସାରା ବିଶ୍ୱରେ କେବଳ ୨୦୨୩ ବର୍ଷରେ ୬୮ ନିୟୁତ ଟନ୍ରୁ ଅଧିକ ପ୍ଲାଷ୍ଟିକ୍କୁ ପ୍ରାକୃତିକ ପରିବେଶରେ ଛାଡ଼ିଦିଆଯାଇଛି। ଅର୍ଗାନାଇଜେଶନ ଫର୍ ଇକୋନୋମିକ କୋଅପରେଶନ ଆଣ୍ଡ ଡେଭେଲପ୍ମେଣ୍ଟ (ଇଓସିଡି) ସଂଗଠନର ରିପୋର୍ଟ ଅନୁଯାୟୀ ବିଶ୍ୱରେ ପ୍ଲାଷ୍ଟିକ୍ ବର୍ଜ୍ୟ ଉତ୍ପାଦନ ୨୦୬୦ ବେଳକୁ ୩ ଗୁଣ ହୋଇଯିବ। ସେଥିରୁ ଅଧା ଭାଗ ପଡ଼ିରହୁଥିବାବେଳେ ମାତ୍ର ଏକ-ପଞ୍ଚମାଂଶରୁ କମ୍ ରିସାଇକ୍ଲିଂ ହେଉଥିବ ବୋଲି ଉକ୍ତ ସଂସ୍ଥା ଆକଳନ କରିଛି।
