ଯାଜପୁର ଅଫିସ,୧୯ା୧୧: ଯାଜପୁର ଜିଲାରେ ଗ୍ରାମାଞ୍ଚଳକୁ ପାଇପ୍ ଜଳ ଯୋଗାଣ ପାଇଁ ବିଭିନ୍ନ ଯୋଜନାରେ ଗତ ୨ ଆର୍ଥିକ ବର୍ଷର ଅକ୍ଟୋବର ସୁଦ୍ଧା ୬୪୪.୧୩ କୋଟି ଟଙ୍କା ଖର୍ଚ୍ଚ ହୋଇସାରିଛି। ସେଥିମଧ୍ୟରୁ ଓଏମ୍ବିଏଡିସି (ଓଡିଶା ମିନେରାଲ ବିୟରିଂ ଏରିଆ ଡେଭଲପମେଣ୍ଟ କର୍ପୋରେଶନ)ରେ ୭୮.୭୮ କୋଟି, ବସୁଧା ଯୋଜନାରେ ୩୫.୭ କୋଟି, ଜେଜେଏମ୍ (ଜଳ ଜୀବନ ମିଶନ)ରେ ୭୫.୨୪ କୋଟି ଏବଂ ଆର୍ଆଇଡିଏଫ୍ (ରୁରାଲ ଇନଫାଷ୍ଟ୍ରକ୍ଚର ଡେଭଲପମେଣ୍ଟ ଫଣ୍ଡ) ୨୭୦.୬୪ କୋଟି ଟଙ୍କା ଖର୍ଚ୍ଚ ହୋଇଛି। ଏହି କ୍ରମରେ ରାଜ୍ୟ ସରକାର ଶତାଧିକ ପିଡବ୍ଲ୍ୟୁଏସ୍ ଓ ମେଗା ପିଡବ୍ଲ୍ୟୁଏସ୍ ପ୍ରକଳ୍ପକୁ ମଞ୍ଜୁର କରିଛନ୍ତି। ହେଲେ ଜିଲାରେ ଅତ୍ୟାଧିକ ଠିକାଦାରୀ ରାଜନୀତି ଯୋଗୁ ଖର୍ଚ୍ଚ ତୁଳନାରେ ପ୍ରକଳ୍ପର ଅଗ୍ରଗତି ଅତି ନୈରାଶ୍ୟଜନକ ରହିଛି। ଏବେ ବି ଶତାଧିକ ପ୍ରକଳ୍ପ ଅଧାପନ୍ତରିଆ ଅବସ୍ଥାରେ ପଡିରହିଛି। ଯେଉଁ କେତେକ ପ୍ରକଳ୍ପ ସମ୍ପୂର୍ଣ୍ଣ ହୋଇଛି ସେଥିରେ ନିର୍ଦ୍ଧାରିତ ଲୋକମାନେ ପାନୀୟ ଜଳ ପାଇ ପାରୁ ନ ଥିବା ଅଭିଯୋଗ ହେଉଛି।
ଜିଲାର ପ୍ରାୟ ୮୫ ପ୍ରତିଶତ ଗ୍ରାମାଞ୍ଚଳ ବାସିନ୍ଦା ଏଯାଏ ପାଇପ ଜଳ ଯୋଗାଣ (ପିଡବ୍ଲ୍ୟୁଏସ୍) ଜରିଆରେ ସ୍ବଚ୍ଛଜଳ ପାଇବାରୁ ବଞ୍ଚିତ ହୋଇଛନ୍ତି। ଜିଲାର ୧୦ ଟି ବ୍ଲକରେ ୩,୭୮,୬୪୫ ପରିବାର ବାସ କରୁଛନ୍ତି। ସେହି ପରିବାରଗୁଡିକର ଜନସଂଖ୍ୟା ୧୭,୩୧,୯୫୦। ଏହି ପରିବାରଗୁଡିକ ମଧ୍ୟରୁ ପ୍ରାୟ ୪ ହଜାର ପରିବାରଙ୍କୁ ପାଇପ୍ ଦ୍ୱାରା ଜଳ ଯୋଗାଣ କରାଯାଇଛି। ବାକି ପରିବାର ନଳକୂପ ଓ ବିଭିନ୍ନ ଉସତ୍ରୁ ପାନୀୟ ଜଳ ସଂଗ୍ରହ କରୁଛନ୍ତି। ଅବଶିଷ୍ଟ ପରିବାରଗୁଡିକୁ ୨୦୨୨ ସୁଦ୍ଧା ପାଇପ୍ ମାଧ୍ୟମରେ ଜଳଯୋଗାଣ କରିବାକୁ ଧାର୍ଯ୍ୟ କରାଯାଇଛି। ଏଥିପାଇଁ ଆର୍ଆଇଡିଏଫ୍, ଓଏମ୍ବିଏଡିସି, ବସୁଧା ଓ ଜଳ ଜୀବନ ମିଶନ ଯୋଜନାରେ ପାଇପ୍ ଜଳ ଯୋଗାଣ ପ୍ରକଳ୍ପ କାର୍ଯ୍ୟକାରୀ ହେଉଛି। ଗତ ୧୫ ତାରିଖରେ ଜଳଜୀବନ ମିଶନ ଯୋଜନାରେ ୬ଟି ପ୍ରକଳ୍ପକୁ ମଞ୍ଜୁର ମିଳିଛି। ଏଥିରେ ବରୀ ବ୍ଲକର ଅରିଲୋ ପାଇଁ ୧.୩୩ କୋଟି, ଏରଡା ପାଇଁ ୧.୧.୪୯ କୋଟି, କହରଗଣ୍ଡ ଓ ରତଲଙ୍ଗା ପାଇଁ ୧.୭୫ କୋଟି ଭାବେ ମୋଟ ୪.୫୯ କୋଟି ଟଙ୍କା ମଞ୍ଜୁର ହୋଇଛି। ସେହିପରି ବରୀ ବ୍ଲକର କୁମ୍ଭୁକା ପାଇଁ ୧.୩୫ କୋଟି, ଚକ୍ରପୁର ପାଇଁ ୧.୨ କୋଟି ଓ ରାୟପୁର ଏବଂ ପାଳପୁର ପାଇଁ ୧.୯୫ କୋଟି ଟଙ୍କାର ଅନୁଦାନ ମଞ୍ଜୁର ହୋଇଛି। ଏଥିରୁ ଗ୍ରାମ ପଞ୍ଚାୟତ ୧୦ ପ୍ରତିଶତ କିମ୍ବା ୧୦ ଲକ୍ଷ ଟଙ୍କା ବିନିଯୋଗ କରିବ ବୋଲି ଗ୍ରାମ୍ୟ ଜଳଯୋଗାଣ ବିଭାଗ ପକ୍ଷରୁ କୁହାଯାଇଛି। ତେବେ ଓଏମ୍ବିଏଡିିସିରେ ସୁକିନ୍ଦା ବ୍ଲକରେ ଚାଲିଥିବା ଗୋଟିଏ ମେଗା ପ୍ରକଳ୍ପ ୫ ବର୍ଷ ହେଲା ସମ୍ପୂର୍ଣ୍ଣ ହୋଇ ପାରିନାହିଁ। ସେହିପରି ଏଠାରେ ଦ୍ୱିତୀୟ ପ୍ରକଳ୍ପ ମଧ୍ୟ ମନ୍ଥର ଗତିରେ ଚାଲିଥିବା ଅଞ୍ଚଳବାସୀ ପ୍ରକାଶ କରିଛନ୍ତି। ଏଭଳି ଭାବେ ବିଭାଗୀୟ ଅଧିକାରୀଙ୍କ ଅବହେଳା ଓ ଠିକାଦାରୀ ରାଜନୀତି ଯୋଗୁ ଏଯାଏ ଶତାଧିକ ପ୍ରକଳ୍ପ ସମ୍ପୂର୍ଣ୍ଣ ହୋଇ ପାରିନାହିଁ।
ସେହିପରି ପାଇପ୍ ବିଛା ନାମରେ ମଧ୍ୟ ଲକ୍ଷାଧିକ ଟଙ୍କା ଦୁର୍ନୀତି ହୋଇଛି। ନିୟମ ଅନୁଯାୟୀ ଉନ୍ନତମାନର ପାଇପ ନ ଦେଇ ଅତି ନିମ୍ନମାନର ପାଇପ୍ ବ୍ୟବହାର କରାଯାଇଥିବା କେତେଜଣ ଅଞ୍ଚଳବାସୀ ପ୍ରକାଶ କରିଛନ୍ତି। କୋରେଇ ବ୍ଲକର ମଲାରିଆ ଗ୍ରାମରେ ଦୀର୍ଘଦିନ ହେଲା ପାଇପ୍ ଜଳ ଯୋଗାଣ ପ୍ରକଳ୍ପ ଅଚଳ ହୋଇ ପଡିଛି। ସେହିପରି ପଛିକୋଟ ପ୍ରକଳ୍ପ କାମ ୨ ବର୍ଷ ହେଲା ସରୁନି। ଏହି ପ୍ରକଳ୍ପରେ ନିମ୍ନମାନର ପାଇପ୍ ଓ ଅନ୍ୟାନ୍ୟ ନିର୍ମାଣ ସାମଗ୍ରୀ ବ୍ୟବହାର ହେଉଥିବାରୁ ତାହା ଦୀର୍ଘସ୍ଥାୟୀ ହେବ କି ନାହିଁ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସଂକ୍ରାନ୍ତରେ ଯାଜପୁର ଆର୍ଡବ୍ଲୁଏସ୍ଏସ୍ର ନିର୍ବାହୀ ଯନ୍ତ୍ରୀଙ୍କ ମତାମତ ନେବା ପାଇଁ ଫୋନରେ ଯୋଗାଯୋଗ କରାଯାଇଥିଲା। ହେଲେ ସେ ଫୋନ କଲ ଗ୍ରହଣ କରି ନ ଥିଲେ।
