ନୂଆଦିଲ୍ଲୀ,୨ା୧୧: ଗୁଜରାଟର ମୋର୍ବିରେ ରବିବାର ବ୍ରିଟିଶ ଅମଳର ଝୁଲାପୋଲ ଭୁଶୁଡ଼ିବା ଘଟଣାର ବିଚାର ବିଭାଗୀୟ ତଦନ୍ତ ପାଇଁ ସୁପ୍ରିମକୋର୍ଟରେ ମଙ୍ଗଳବାର ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାଖଲ ହୋଇଛି। ମାଛୁ ନଦୀ ଉପରେ ନିର୍ମିତ ପ୍ରାୟ ୧୫୦ ବର୍ଷ ପୁରୁଣା ବ୍ରିଜ୍ରେ କେଉଁ କାରଣରୁ ଦୁର୍ଘଟଣା ଘଟି ୧୩୪ ଜଣଙ୍କ ମୃତ୍ୟୁ ଘଟିଲା ତାହାର ତଦନ୍ତ ଲାଗି ଏକ ନ୍ୟାୟିକ କମିଶନ ଗଠନ କରାଯାଉ। ସୁପ୍ରିମକୋର୍ଟଙ୍କ ଜଣେ ଅବସରପ୍ରାପ୍ତ ବିଚାରପତି ଉକ୍ତ ପ୍ୟାନେଲର ଅଧ୍ୟକ୍ଷତା କରନ୍ତୁ ବୋଲି ଆଇନଜୀବୀ ବିଶାଳ ତିଓ୍ବାରୀ ନିଜ ପିଟିଶନରେ ଉଲ୍ଲେଖ କରିଛନ୍ତି। ଏଥିରେ ସେ ବ୍ରିଜ୍ ଭୁଶୁଡ଼ିବା ଘଟଣା ପାଇଁ ସରକାରୀ ବିଫଳତାକୁ ଦାୟୀ କରିଛନ୍ତି। ଗତ ଦଶନ୍ଧିରେ ଦେଶରେ ପରିଚାଳନାଗତ ତ୍ରୁଟି, କର୍ତ୍ତବ୍ୟରେ ଅବହେଳା, ରକ୍ଷଣାବେକ୍ଷଣର ଅଭାବ ଆଦି ଯୋଗୁ ଅନେକ ସ୍ଥାନର ଅଘଟଣ ଘଟି ବହୁ ଲୋକ ମୃତାହତ ହୋଇଛନ୍ତି, ଯାହାକୁ ଏଡ଼ାଯାଇ ପାରିଥାଆନ୍ତା ବୋଲି ଏଥିରେ କୁହାଯାଇଛି। ସିଜେଇ ୟୁ.ୟୁ. ଲଲିତଙ୍କ ଖଣ୍ଡପୀଠ ନଭେମ୍ବର ୧୪ରେ ଏହାର ଶୁଣାଣି କରିବେ।
