କେନ୍ଦୁଝର,୧ା୧୧(ନରେଶ ଚନ୍ଦ୍ର ପଟ୍ଟନାୟକ): ବୁଧବାର ସନ୍ଧ୍ୟାରେ ଟାଉନ ଥାନା ଅନ୍ତର୍ଗତ ମଣ୍ଡୁଆ ପୋଲ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ପିକ୍ଅପ୍ ଭ୍ୟାନ୍ ସହ ବୁଲେଟ୍ ମୁହାଁମୁହିଁ ହେବା ଫଳରେ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛି। ଖବର ଅନୁସାରେ ବୁଲେଟ୍ରେ ଅନିକେତ ପତି କେନ୍ଦୁଝରରୁ ନରଣପୁର ଆଡ଼କୁ ଯାଉଥିବା ବେଳେ ସେପଟୁ ଦ୍ରୁତଗତିରେ ଆସୁଥିବା ପିକ୍ଅପ୍ ତାଙ୍କୁ ଧକ୍କା ଦେଇଥିଲା। ଫଳରେ ଦୁର୍ଘଟଣା ପରେ ଭ୍ୟାନ୍ଟି ରାସ୍ତା କଡ଼କୁ ଓଲଟି ପଡ଼ିଥିଲା। ଘଟଣାସ୍ଥଳରେ ବୁଲେଟ୍ ଚାଳକ ଅନିକେତ ପତି ଓ ପିକ୍ଅପ୍ ଡ୍ରାଇଭର ଜ୍ୟୋତିରଞ୍ଜନ ଦେହୁରୀଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣକ ପରିଚୟ ମିଳିପାରିନାହିଁ। ଖବର ପାଇ ଘଟଣାସ୍ଥଳରେ ଟାଉନ୍ ପୋଲିସ ପହଞ୍ଚି ମୃତକ ଓ ଗୁରୁତରଙ୍କୁ ଉଦ୍ଧାର କରି କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିବା ବେଳେ ଅଧିକ ତଦନ୍ତ ଜାରି ରଖିଛି। ପ୍ରକାଶ ଯେ, ଉକ୍ତ ସ୍ଥାନରେ ଦ୍ରୁତଗତି ଯୋଗୁ ବହୁ ସମୟର ଦୁର୍ଘଟଣା ଘଟୁଥିବା ବେଳେ ଷ୍ଟ୍ରିଟ୍ଲାଇଟ୍ ଓ ବ୍ୟାରିକେଟ୍ ବ୍ୟବସ୍ଥା ଲଗାଇବା ନେଇ ଦାବି ହୋଇଆସୁଛି। କିନ୍ତୁ ପ୍ରଶାସନ ଅବହେଳା ଯୋଗୁ ଏଭଳି ଘଟଣା ବାରମ୍ବାର ହେଉଥିବା ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି।
