କଟକ ଅଫିସ,୧୩।୧୦: ଆଚାର୍ଯ୍ୟ ହରିହର ଆଞ୍ଚଳିକ କର୍କଟ କେନ୍ଦ୍ର ଲିନାକ୍ ବିଲ୍ଡିଂର ପ୍ରଥମ ମହଲାରେ ଖୁବ୍ଶୀଘ୍ର ସ୍ଥାପନ ହେବ ପେଟ୍ ସିଟିସ୍କାନ ମେଶିନ। ପବ୍ଲିକ-ପ୍ରାଇଭେଟ୍ ପାର୍ଟନରଶିପ୍ ପିପିପି ମୋଡ୍ରେ ଉକ୍ତ ମେଶିନ ଲଗାଯିବା ପାଇଁ ସ୍ଥିର ହୋଇଛି। ଏଥିପାଇଁ ଟେଣ୍ଡର ପ୍ରକ୍ରିୟା ସରିଛି। ଭିତ୍ତିଭୂମି କାର୍ଯ୍ୟ ମଧ୍ୟ ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ଆସନ୍ତା ଡିସେମ୍ବର ଶେଷ ସୁଦ୍ଧା ଏହି ମେଶିନ କାର୍ଯ୍ୟକ୍ଷମ ହେବାକୁ ଲକ୍ଷ୍ୟ ରଖାଯାଇଛି। ଏହାଦ୍ୱାରା ରୋଗୀଙ୍କୁ ମାଗଣାରେ ଚିକିତ୍ସା ଯୋଗାଇ ଦିଆଯାଇପାରିବ ବୋଲି କର୍କଟ କେନ୍ଦ୍ରର ନିର୍ଦ୍ଦେଶକ ଡ. ଲଲାଟେନ୍ଦୁ ଷଡଙ୍ଗୀ କହିଛନ୍ତି। ଏବେ ପେଟ୍-ସିଟିସ୍କାନ କରିବା ପାଇଁ ରୋଗୀମାନେ ନିର୍ଦ୍ଦିଷ୍ଟ ଘରୋଇ ହସ୍ପିଟାଲ ଉପରେ ନିର୍ଭର କରୁଛନ୍ତି। ଏଥିପାଇଁ ସେମାନଙ୍କୁ ଥରକରେ ୨୦ରୁ ୨୫ହଜାର ଟଙ୍କା ଖର୍ଚ୍ଚ କରିବାକୁ ପଡୁଛି। ମାତ୍ର ଆଚାର୍ଯ୍ୟ ହରିହର କର୍କଟ କେନ୍ଦ୍ରରେ ଏହି ମେଶିନ କାର୍ଯ୍ୟକ୍ଷମ ହେଲେ ରୋଗୀଙ୍କୁ ଆଉ ଖର୍ଚ୍ଚ କରିବାକୁ ପଡିବ ନାହିଁ। ଏହି ବ୍ୟବସ୍ଥାକୁ କାର୍ଯ୍ୟକ୍ଷମ କରିବା ପାଇଁ ଦାୟିତ୍ୱ ନେଇଥିବା କଲେଜଛକସ୍ଥିତ ଆଡ୍ ଆନେକ୍ସର ମାଲିକ ଚିନ୍ମୟ ବଳ କହିଛନ୍ତି, ୯ କୋଟି ଟଙ୍କା ବ୍ୟୟରେ ଏହି ମେଶିନକୁ ଆମେ ଜର୍ମାନୀସ୍ଥିତ ସିମେନ୍ସ କମ୍ପାନୀରୁ ମଗାଇଛୁ । ହେଲେ ସରକାରୀ କଟକଣା ଯୋଗୁ ମେଶିନ ଆସିବାରେ ବିଳମ୍ବ ହେଉଛି। ଏହି ମେଶିନ ଆଣିବା ଓ ଲଗାଇବା ପାଇଁ ଭାରତର ଆଟମିକ୍ ଏନର୍ଜି ରେଗୁଲେଟୋରି ବୋର୍ଡର ଅନୁମତି ଅବଶ୍ୟକ। ଏହି ଚିକିତ୍ସା ବେଳେ ଆବଶ୍ୟକ ହେଉଥିବା ରୋଗୀଙ୍କ ଔଷଧ ପାଇଁ ମଧ୍ୟ ଉକ୍ତ ବୋର୍ଡର ଅନୁମତି ଆବଶ୍ୟକ। ତେବେ କମ୍ପାନୀର ୩ ବର୍ଷର ଅଭିଜ୍ଞତା ଥିବାରୁ ଆମେ ଉଚିତ ସେବା ଯୋଗାଇ ପାରିବୁ। ଏହାଦ୍ୱାରା ରୋଗୀ ମାଗଣାରେ ଚିକିତ୍ସିତ ହେବେ। ଏଥିପାଇଁ ସରକାର ପ୍ରତ୍ୟେକ ରୋଗୀ ପିଛା ୬୭୦୦ ଟଙ୍କା କମ୍ପାନୀକୁ ପଇଠ କରିବେ ବୋଲି ସେ କହିଛନ୍ତି।
କିଛିଦିନ ପୂର୍ବରୁ କର୍କଟ କେନ୍ଦ୍ରରେ ଆରମ୍ଭ ହୋଇଛି ନିଃଶୁଳ୍କ ଏମ୍ଆରଆଇ ଓ ସିଟିସ୍କାନ ପରୀକ୍ଷା। ଲିନାକ୍ କୋଠାର ଦ୍ୱିତୀୟ ମହଲାରେ ଉକ୍ତ ମେଶିନ ସ୍ଥାପନ କରାଯାଇଛି। ୧୦ ହଜାର ବର୍ଗଫୁଟରେ ଲିନାକ୍ ବିଲ୍ଡିଂ ନିର୍ମାଣ କରାଯାଇ ଏହି ସ୍ବତନ୍ତ୍ର ୟୁନିଟ୍ ଖୋଲାଯାଇଛି। ପିପିପି ମୋଡ୍ରେ ଏହି ବ୍ୟବସ୍ଥା କରାଯାଇଛି। କର୍କଟ ରୋଗର ନିରାକରଣ ପାଇଁ ଏମ୍ଆରଆଇ ଓ ସିଟିସ୍କାନ ମେଶିନର ଆବଶ୍ୟକତା ଥିବା ହସ୍ପିଟାଲ କର୍ତ୍ତୃପକ୍ଷ ରାଜ୍ୟ ସରକାରଙ୍କୁ ଜଣାଇଥିଲେ। ଏବେ ପେଟ୍-ସିଟିସ୍କାନ ହେଲେ କର୍କଟ କେନ୍ଦ୍ରରେ ରୋଗୀ ସେବା ଆହୁରି ସହଜ ହେବ।
