ଲକ୍ଷ୍ନୌ,୩୧।୧:ନବଜାତ ଶିଶୁଙ୍କ ପାଇଁ ମା’ କ୍ଷୀର ପ୍ରଥମ ଆହାର। ଗୁରୁତ୍ୱ ଦୃଷ୍ଟିରୁ ଏହାକୁ ଅମୃତ ଆଖ୍ୟା ଦିଆଯାଇଛି। ଡାକ୍ତରଙ୍କ ମତରେ ମା’ କ୍ଷୀରରୁ ହିଁ ଶିଶୁକୁ ପୋଷକତତ୍ତ୍ୱ ମିଳିଥାଏ, ଯାହା ଶାରୀରିକ ଓ ମସ୍ତିଷ୍କ ବିକାଶରେ ସାହାଯ୍ୟ କରେ। ତେବେ ଏହି ଆହାର ଏବେ ଘାତକ ସାବ୍ୟସ୍ତ ହୋଇଛି। ଲକ୍ଷ୍ନୌର କୁଇନ୍ ମାରି ହସ୍ପିଟାଲ ପକ୍ଷରୁ କରାଯାଇଥିବା ଅଧ୍ୟୟନ ଅନୁସାରେ ମା’ କ୍ଷୀରରେ ପେଷ୍ଟିସାଇଡ୍ (କୀଟନାଶକ) ରହିଛି। ଏଥିଯାଗୁ ଉତ୍ତର ପ୍ରଦେଶର ମହାରାଜଗଞ୍ଜରେ ୧୧୧ ଶିଶୁ ମା’ କ୍ଷୀର ପିଇ ପ୍ରାଣ ହରାଇଛନ୍ତି। ଗର୍ଭବତୀ ମହିଳାଙ୍କ କ୍ଷୀରରେ ପେଷ୍ଟିସାଇଡ୍ ରହିଛି ବୋଲି ଦାବି କରୁଥିବା କୁଇନ୍ ମାରି ହସ୍ପିଟାଲ ପକ୍ଷରୁ କରାଯାଇଥିବା ଅଧ୍ୟୟନରେ ମୋଟ ୧୩୦ ଗର୍ଭବତୀ ମହିଳାଙ୍କୁ ସାମିଲ କରାଯାଇଥିଲା। ସେମାନଙ୍କ ମଧ୍ୟରେ କେତେଜଣ ମାଂସାହାରୀ ଥିବାବେଳେ ଆଉ କେତେକେ ଶାକାହାରୀ ରହିଥିଲେ। ଅଧ୍ୟୟନ ମୁଖ୍ୟ ପ୍ରଫେସର୍ ସୁଜାତା ଦେବ, ଡା. ଅବ୍ବାସ ଅଲି ମେହେନ୍ଦି ଏବଂ ଡା. ନୈନା ଦ୍ୱିବେଦୀଙ୍କ ମତରେ ଉଭୟ ମାଂସାହାରୀ ଓ ଶାକାହାରୀ ଗର୍ଭବତୀଙ୍କ କ୍ଷୀରରେ ପେଷ୍ଟିସାଇଡ୍ ରହିଛି। କିନ୍ତୁ ମାଛ, ମାଂସ ଖାଉଥିବା ଗର୍ଭବତୀଙ୍କ ତୁଳନାରେ କେବଳ ପନିପରିବା ଖାଉଥିବା ମହିଳାଙ୍କ କ୍ଷୀରରେ କମ୍ ପରିମାଣର ପେଷ୍ଟିସାଇଡ୍ ଅଛି। କେମିକାଲ୍ ଫାର୍ମିଂ ଏହାର ମୁଖ୍ୟ କାରଣ ବୋଲି ଅଧ୍ୟୟନରୁ ଜଣାପଡ଼ିଛି। ପନିପରିବା ଏବଂ ଶସ୍ୟ ଉତ୍ପାଦନ କ୍ଷେତ୍ରରେ କୃଷକମାନେ ବିଭିନ୍ନ ପ୍ରକାରର ରାସାୟନିକ ପଦାର୍ଥମାନ ପ୍ରୟୋଗ କରୁଥିବା ଦେଖାଯାଉଛି। ଅନ୍ୟପକ୍ଷେ ସମୟ ପୂର୍ବରୁ ପଶୁମାନଙ୍କ ଶାରୀରିକ ବିକାଶ ପାଇଁ ପେଷ୍ଟିସାଇଡ୍ରେ ତିଆରି ବିଭିନ୍ନ କେମିକାଲ ସପ୍ଲିମେଣ୍ଟ ଇଞ୍ଜେକ୍ସନ୍ ମାଧ୍ୟମରେ ସେମାନଙ୍କୁ ଦିଆଯାଉଛି।
୧୦ ମାସ ଭିତରେ ମହାରାଜଗଞ୍ଜରେ ୧୧୧ ନବଜାତକ ଅଜଣା ରୋଗରେ ପ୍ରାଣ ହରାଇବା ପରେ ଏହା ପଛର କାରଣ ଖୋଜିବା ଲାଗି ଜିଲାପାଳ ନିର୍ଦ୍ଦେଶ ଦେଇଥିଲେ। ଏ ନେଇ ଚିଫ୍ ଡେଭଲପମେଣ୍ଟ ଅଫିସର (ସିଡିଓ)ଙ୍କ ଅଧ୍ୟକ୍ଷତାରେ ତିନିଜଣିଆ ସଦସ୍ୟଙ୍କୁ ନେଇ ଏକ କମିଟି ଗଠନ କରାଯାଇଥିଲା। ପ୍ରଥମେ ଜିଲାରେ ମା’ ଓ ଶିଶୁ ମୃତ୍ୟୁହାର ରିପୋର୍ଟ ନେଇ ଅଧ୍ୟୟନ ଆରମ୍ଭ କରାଯାଇଥିଲା। ପରବର୍ତ୍ତୀ ସମୟରେ କେତେଜଣ ଗର୍ଭବତୀଙ୍କ କ୍ଷୀରକୁ ନେଇ ପରୀକ୍ଷା ନିରୀକ୍ଷା କରିବା ପରେ ଶାକାହାରୀଙ୍କ ତୁଳନାରେ ମାଂସାହାରୀଙ୍କ କ୍ଷୀରରେ ୩ଗୁଣା ଅଧିକ ପେଷ୍ଟିସାଇଡ୍ ଥିବା ଅଧ୍ୟୟନ ରିପୋର୍ଟରୁ ଜଣାପଡ଼ିଛି।
