ମୁନିକ: ସମାଜରେ ବିଭିନ୍ନ ପ୍ରକାରର ଲୋକ ବାସ କରିଥାନ୍ତି। ପୁଣି ଜଣଙ୍କର ବ୍ୟକ୍ତିତ୍ୱ ଅନ୍ୟଠାରୁ ଅଲଗା ହୋଇଥାଏ। କାହାର କାହାର ବ୍ୟକ୍ତିତ୍ୱ ଜାଣିବା ପାଇଁ ଗବେଷକ ଦୀର୍ଘ ଅଧ୍ୟୟନ ମଧ୍ୟ କରିଥାନ୍ତି। ତେବେ ଏଣିକି ବ୍ୟକ୍ତିତ୍ୱ ଜାଣିବା ଲାଗି ଅଧିକ ସମୟ ଲାଗିବ ନାହିଁ। ସ୍ମାର୍ଟଫୋନ୍ରେ ଥିବା ଡାଟାରୁ ଏହାକୁ ବ୍ୟବହାର କରୁଥିବା ବ୍ୟକ୍ତିଙ୍କ ବ୍ୟକ୍ତିତ୍ୱ ସହଜରେ ଜାଣିହେବ। ଏନେଇ ଜର୍ମାନୀର ମୁନିକ୍ ସ୍ଥିତ ଲ୍ୟୁଡଓ୍ବିଗ୍ ମ୍ୟାକ୍ସି ମିଲାନ୍ ବିଶ୍ୱ ବିଦ୍ୟାଳୟରେ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ ହୋଇଛି। ସ୍ମାର୍ଟଫୋନ୍ରେ ଥିବା ଡାଟା ଜଟିଳ ଥିଲେ ଏହା ବ୍ୟବହାରକାରୀଙ୍କ ଜଟିଳ ମାନସିକତାକୁ ସୂଚିତ କରିଥାଏ ବୋଲି ମନସ୍ତତ୍ତ୍ୱବିତ୍ ପ୍ରଫେସର ମାର୍କ୍ୟୁସ୍ ବ୍ୟୁହନେର୍ କହିଛନ୍ତି। ଅପରପକ୍ଷରେ ସ୍ମାର୍ଟଫୋନ୍ରେ ଥିବା ଡାଟା ସହଜ ଥିଲେ ଏହା ବ୍ୟବହାରକାରୀଙ୍କ ଖୁସ୍ ମିଜାଜ ଏବଂ ସରଳ ପଣିଆର ସୂଚନା ଦେଇଥାଏ। ଏହି ଅଧ୍ୟୟନରେ ବିଭିନ୍ନ ବର୍ଗର ୬୨୪ ଜଣଙ୍କୁ ଭେଟି ସେମାନଙ୍କର ସ୍ମାର୍ଟଫୋନ୍ରେ ଥିବା ଡାଟାକୁ ଅନୁଧ୍ୟାନ କରିବା ପରେ ରିପୋର୍ଟ ପ୍ରସ୍ତୁତ କରାଯାଇଥିଲା। ତେବେ ସମ୍ପୃକ୍ତ ବ୍ୟକ୍ତିଙ୍କ ବ୍ୟବହାର ସମ୍ବେଦନଶୀଳ ତଥା ସମାଜପ୍ରତି ପ୍ରତିଶ୍ରୁତିବଦ୍ଧ ତାହା ସ୍ମାର୍ଟଫୋନ୍ ଡାଟାରୁ ସହଜରେ ଜାଣି ହୋଇପାରିବ ବୋଲି ବ୍ୟୁହନେର୍ କହିଛନ୍ତି।
