ଏମ୍ଭି ୭୯, ୧୭ା୯(ଭିକି ବାରିକ)ମାଲକାନଗିରି ଜିଲା ପଡ଼ିଆ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ତାଣ୍ଡବାଈ ପଞ୍ଚାୟତ କାର୍ଯ୍ୟାଳୟ ନିକଟରେ ଥିବା ପଞ୍ଚାୟତ ନିର୍ବାହୀ ଅଧିକାରୀଙ୍କ ବାସଗୃହରେ ଜଣେ କ୍ବାକ୍ ସ୍ଥାନୀୟ ଅଞ୍ଚଳର ଲୋକଙ୍କୁ ସ୍ବାସ୍ଥ୍ୟସେବା ଯୋଗାଉଥିବା ଦେଖିବାକୁ ମିଳିଛି। ଏହି କୋଠା ବାହାରେ ଲଗାଯାଇଥିବା ବ୍ୟାନର ଦେଖିଲେ ଗ୍ରାମାଞ୍ଚଳରେ ଥିବା ଏକ କ୍ଲିନିକ୍ ଭଳି ଭ୍ରମ ସୃଷ୍ଟି କରୁଥିବା ବେଳେ କୋଠରି ଭିତରେ ରୋଗୀଙ୍କୁ ଚଟାଣରେ ଶୁଆଇ ସାଲାଇନ୍ ବୋତଲ ଝରକାରେ ବାନ୍ଧି ଦିଆଯାଉଛି। ମେଡିକାଲ କିମ୍ବା ବିଭାଗୀୟ ଅନୁମତି ନ ନେଇ ସ୍ଥାନୀୟ ଲୋକଙ୍କୁ ଭଳିକି ଭଳି ଔଷଧ ଓ ସାଲାଇନ ଦିଆଯାଉଥିବା ବେଳେ ସ୍ଥାନୀୟ ଲୋକେ ଏଥିପାଇଁ ମୋଟା ଅଙ୍କର ଅର୍ଥ ମଧ୍ୟ ପ୍ରଦାନ କରୁଥିବା କହିଛନ୍ତି। ଏଠାରେ ଡାକ୍ତର ଭାବେ ଆନ୍ଧ୍ରପ୍ରଦେଶର ଜଣେ କ୍ବାକ୍ ଦୀର୍ଘଦିନ ଧରି ସ୍ଥାନୀୟ ଅଞ୍ଚଳରେ ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ମୋଟା ଅଙ୍କର ଅର୍ଥ ଆଦାୟ କରୁଥିବା ଜଣାପଡ଼ିଛି।
ଶନିବାର ଏ ନେଇ ଗ୍ରାମବାସୀ ସ୍ଥାନୀୟ ଅଞ୍ଚଳର ଗଣମାଧ୍ୟମ ପ୍ରତିନିଧିଙ୍କୁ ଖବର ଦେବାରୁ ସେଠାରେ ପହଞ୍ଚିବା କ୍ବାକ୍ ଜଣକ ବିଭିନ୍ନ ଆଳ ଦେଖାଇ ସେଠାରୁ ଖସିଯିବାକୁ ଚେଷ୍ଟା କରୁଥିଲେ। ଏ ବାବଦରେ ତାଣ୍ଡବାଈ ପଞ୍ଚାୟତ ନିର୍ବାହୀ ଅଧିକାରୀ ଦେବେନ୍ଦ୍ର ନାୟକଙ୍କୁ ପଚାରିବାରୁ ସେ ନୂତନ ଭାବେ ଯୋଗ ଦେଇଛନ୍ତି । ସମ୍ପୂର୍ଣ୍ଣ ଦାୟିତ୍ୱ ନେଇ ନ ଥିବାରୁ ଘଟଣା ସମ୍ପର୍କରେ ଅବଗତ ନାହାନ୍ତି ବୋଲି କହିଥିଲେ। ତେବେ ଦୀର୍ଘଦିନ ଧରି ଆନ୍ଧ୍ରପ୍ରଦେଶ ଅଞ୍ଚଳର ଜଣେ କ୍ବାକ୍ ପଞ୍ଚାୟତ ନିର୍ବାହୀ ଅଧିକାରୀଙ୍କ ସରକାରୀ ବାସଗୃହରେ ରହି ରୋଗୀ ସେବା କରୁଥିବା ବେଳେ ବିଭାଗ ଏ ଦିଗରେ କିଭଳି କେହି ଜାଣି ପାରୁ ନାହିଁ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
କାଲିମେଳା ଓ ପଡ଼ିଆ ବ୍ଲକର ବିଭିନ୍ନ ସ୍ଥାନରେ କ୍ବାକ୍ ଲୋକଙ୍କୁ ଚିକିତ୍ସା ଯୋଗାଇ ବହୁ ଅର୍ଥ ଆଦାୟ କରୁଥିବା ଦେଖିବାକୁ ମିଳୁଛି। କିନ୍ତୁ ସ୍ବାସ୍ଥ୍ୟ ବିଭାଗ ଏମାନଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ବୁଦ୍ଧିଜୀବୀ ମହଲରେ ଆଲୋଚନା ହେଉଛି। ତାଣ୍ଡବାଈ ପଞ୍ଚାୟତ ସମେତ ଆଖପାଖ ଅଞ୍ଚଳରେ ଏଭଳି କ୍ବାକ୍ଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଲୋକଙ୍କୁ ମେଡିକାଲକୁ ପଠାଇବା ବ୍ୟବସ୍ଥା କଲେ ଗ୍ରାମାଞ୍ଚଳରେ ସ୍ବାସ୍ଥ୍ୟସେବା ସୁଦୃଢ଼ ହୋଇପାରିବ। ଏଥିସହ ତାଣ୍ଡବାଈ ପଞ୍ଚାୟତ ନିର୍ବାହୀ ଅଧିକାରୀଙ୍କ ବାସଗୃହରେ ଲୋକଙ୍କୁ କିଭଳି ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି ତା’ର ତଦନ୍ତ କରିବାକୁ ସାଧାରଣରେ ଦାବି ହେଉଛି।
