ଦୁନିଆର ଯେକୌଣସି ସ୍ଥାନକୁ ସଂଯୋଗ କରିବାରେ ରାସ୍ତା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଲୋକମାନେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ କେବଳ ରାସ୍ତା ଦେଇ ଯାତାୟାତ କରିଥାନ୍ତି। କିନ୍ତୁ ଦୁନିଆର ଏମିତି ଏକ ଗାଁ ଅଛି, ଯେଉଁଠି ଆଦୌ ସଡ଼କ ପଥ ନାହିଁ। ତେଣୁ ଏହି ଗାଁରେ ଲୋକମାନେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯିବା ପାଇଁ କେବଳ ଜଳପଥ ଉପରେ ନିର୍ଭର କରିଥାନ୍ତି।
ଏପରି ଏକ ଗାଁ ହେଉଛି ନେଦରଲାଣ୍ଡର ‘ଗିର୍ଥାନ’। ଏହି ଗାଁ ଦେଖିବାକୁ ବହୁତ ସୁନ୍ଦର। ଏହାର ପ୍ରାକୃତିକ ପରିବେଶ ଅତ୍ୟନ୍ତ ମନଲୋଭା। କିନ୍ତୁ ଏହି ଗାଁର ସ୍ବତନ୍ତ୍ର ବୈଶିଷ୍ଟତା ପାଇଁ ଏହା ସମଗ୍ର ବିଶ୍ୱରେ ପ୍ରସିଦ୍ଧି ଲାଭ କରିପାରିଛି। ଏହି ଗାଁକୁ ଗୋଟିଏ ହେଲେ ରାସ୍ତା ନାହିଁ। ଏଥିପାଇଁ ଏହାକୁ ନେଦରଲାଣ୍ଡର ଭେନିସ୍ ମଧ୍ୟ କୁହାଯାଏ। ଯେହେତୁ ଏଠାରେ ରାସ୍ତା ନାହିଁ, ଏହି କାରଣରୁ ଲୋକମାନେ କୌଣସି ଗାଡ଼ିମୋଟର କିଣନ୍ତି ନାହିଁ। ସମସ୍ତେ କେବଳ ବୋଟ୍ ବା ଡଙ୍ଗା ହିଁ କିଣିଥାନ୍ତି। ଦୂରଦୂରାନ୍ତରୁ ଲୋକମାନେ ଏହି ଗାଁ ପରିଦର୍ଶନ କରିବାକୁ ଆସନ୍ତି ଏବଂ ଏହି ସ୍ଥାନର ସୌନ୍ଦର୍ଯ୍ୟ ଉପଭୋଗ କରନ୍ତି।
ଗାଡ଼ିମୋଟର ଚାଲୁ ନ ଥିବାରୁ ଗାଁରେ ପ୍ରଦୂଷଣର କୌଣସି ଚିହ୍ନ ନାହିଁ। ଏଠାରେ ଅନେକ କାଠ ପୋଲ ରହିଛି। ଯାହା ତଳେ ଡଙ୍ଗାଗୁଡ଼ିକ ଯିବା ବେଳେ ଚମତ୍କାର ଦୃଶ୍ୟ ଦେଖିବାକୁ ମିଳେ। ଗାଁରେ ସମୁଦାୟ ୧୮୦ଟି ପୋଲ ଅଛି। ଏହି ଗାଁର ମୋଟ୍ ଜନସଂଖ୍ୟା ପ୍ରାୟ ୩ ହଜାର। ଯଦିଓ ଅଧିକାଂଶ ମୋଟର ଡଙ୍ଗା ଏଠାରେ ଚାଲିଥାଏ, କିନ୍ତୁ ପ୍ରତ୍ୟେକ ପରିବାରର ନିଜସ୍ବ ଡଙ୍ଗା ଅଛି। ଶୀତଦିନେ ଏହି ସ୍ଥାନରେ ବରଫ ଜମା ହୋଇଥାଏ। ଯେଉଁଥିପାଇଁ ଲୋକମାନେ ବରଫ ସ୍କେଟିଂକୁ ଉପଭୋଗ କରନ୍ତି।
