ଥୁଆମୂଳ ରାମପୁର,୨୦।୧(ଦୁର୍ଗା କୀର୍ତ୍ତି): କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନା ଉପରେ ଯୋଜନା କରୁଥିଲେ ମଧ୍ୟ ଅପହଞ୍ଚ ଅଞ୍ଚଳରେ ନେଟୱର୍କ ସମସ୍ୟାର ସୁଧୁରି ପାରୁନାହିଁ l ଯେଉଁ ଯୋଜନାକୁ ସାଧାରଣ ଲୋକ ଅନଲାଇନ ମାଧ୍ୟମରେ କରିବାକୁ ପଡେ ତାହା ନେଟୱାର୍କ ନ ଥିବା ଯୋଗୁ କିଛି ସରକାରଙ୍କ ଯୋଜନାରେ ଲାଭ ପାଇ ପାରୁନାହାନ୍ତି କିମ୍ବା ନେଟୱର୍କ ନ ଥିବାରୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଗାଁ ଗାଁକୁ ବିଏସଏନଏଲ ନେଟୱର୍କ ଏବଂ କିଛି ଅଞ୍ଚଳରେ ଜିଓ ଟାୱାର ନାମକୁ ମାତ୍ର ଖୁଣ୍ଟ କରାଯାଇ ଥିଲେ ବି ବର୍ତ୍ତମାନ ଅନେକ ଗାଁରେ ନୂତନ ନେଟୱର୍କ ଚାଲୁ କରାଯାଇ ନାହିଁ । ଏଥିପାଇଁ ପ୍ରଶାସନ ଓ ରାଜନେତାଙ୍କୁ ଗୁହାରି କରିବା ସହ ଟେଲିକମ ବିଭାଗକୁ ଯୋଗାଯୋଗ କଲେ ମଧ୍ୟ ବର୍ଷେରୁ ଊର୍ଦ୍ଧ୍ୱ ହେବ ନେଟୱର୍କ ଚାଲୁ କରୁନାହାନ୍ତି l ତେଣୁ ସାଧାରଣ ଜନତା ଅନେକ ପ୍ରକାର ଯୋଜନା ଲାଭ ପାଇପାରୁ ନଥିବା ବେଳେ ଇ – କେୱାଇସି ଅପଡେଟ୍ କରିବା ପାଇଁ ହଇରାଣ ହରକତ ହେଉଛନ୍ତି। ଏପରିକି ପାହାଡ଼ ଉପରେ ଚଢି ଘଣ୍ଟା ଘଣ୍ଟା ଧରି ନେଟଓ୍ବର୍କକୁ ଅପେକ୍ଷା କରୁଛନ୍ତି। ଏମିତିକି କୁନି କୁନି ଛୁଆ ଠାରୁ ଆରମ୍ଭ କରି ବୃଦ୍ଧା ପର୍ଯ୍ୟନ୍ତ ଏହି ଦୁର୍ଦ୍ଦଶା ଭୋଗୁଛନ୍ତି। ଆଜିକାର ଦୁନିଆ ୫ଜି , ୬ଜି ଆଡ଼କୁ ଗତି କରୁଥିବା ବେଳେ ଏବେ ମଧ୍ୟ ଅନେକ ଅଞ୍ଚଳରେ ଇଣ୍ଟରନେଟ ସେବା ପହଞ୍ଚି ପାରୁନାହିଁ। ଏଭଳି ବିଚିତ୍ର ଚିତ୍ର ଦେଖିବାକୁ ମିଳିଛି ଥୁଆମୂଳ ରାମପୁର ବ୍ଲକର ଆଦର୍ଶ ଗ୍ରାମପଞ୍ଚାୟତ ସିନ୍ଧିପଦର ଠାରୁ ଆରମ୍ଭ କରି କେରପାଇ , ସିଲେଟ, ନାକରୁଣ୍ଡି, ତଳ ନାଗି, ବିରିକୋଟ, ବଡ଼ଛାତ୍ରଙ୍ଗ ଅଭଳି ଅନେକ ଦୁର୍ଗମ ପଞ୍ଚାୟତରେ। ଏହାକୁ କେବେ ସମାଧାନ କରିବେ ପ୍ରଶାସନ ସେନେଇ ପ୍ରଶ୍ନ ଉଠୁଛି। ବିରିକୋଟ, ଗଦ୍ରାମସ୍କା, ଶୁକସାନ, ବଲାଙ୍ଗୀ, ତେନ୍ତୁଳିପଡା, ସେମେଲୀ ପଦର, ବୁତୁମନିଖୋଲ ଭଳି ଅନେକ ଗାଁ ରହିଛି l ନେଟୱର୍କ ସମସ୍ୟାକୁ ନେଇ ବାରମ୍ବାର ଗଣ ଗଣମାଧ୍ୟମରେ ଖବର ପ୍ରସାର ହେଲେ ବି କିଛି ସୁଫଳ ମିଳୁନାହିଁ। ଟେଲିକମ ବିଭାଗ ଜାଣିଶୁଣି ନିରବ ଦ୍ରଷ୍ଟା ସାଜିଛି। ତୁରନ୍ତ ଯେତେ ବିଏସଏନଏଲ ନେଟୱର୍କ ଅଛି ତାକୁ ଚାଲୁ କରିବା ପାଇଁ ସାଧାରଣରେ ଦାବି ହେଉଛି l ଏ ନେଇ ଜିଲା ବିଏସଏନଏଲ ଅଧିକାରୀ କୁଞ୍ଜବିହାରୀ ନାଏକଙ୍କୁ ପଚାରିବାରୁ ସେ କହିଛନ୍ତି, ବହୁତ ଶୀଘ୍ର ଚାଲୁ କରାହେବା ସହ ଯେଉଁ ଯେଉଁ ଅଞ୍ଚଳରେ ଆଗରୁ ଟାୱାର ଲାଗିଛି ହେଲେ ନେଟୱର୍କର ସମସ୍ୟା ଅଛି ତାହା ମଧ୍ୟ ଅଳ୍ପଦିନରେ ସମାଧାନ କରାଯିବ l
