କେନ୍ଦୁଝର,୨୧ା୯(ସ୍ବ.ପ୍ର.): ସଦର ରେଞ୍ଜ ଅନ୍ତର୍ଗତ ବସନ୍ତପୁର ନିକଟ ଉକୁଚାବେଡ଼ାଠାରେ ଏକ ୧୧ ଟିକିଆ ହାତୀ ମଙ୍ଗଳବାର ରାତିରେ ଜଙ୍ଗଲରୁ ଆସି ଭୋର୍ ସମୟରେ ଜଙ୍ଗଲକୁ ଫେରି ନ ପାରି ଉକୁଚାବେଡ଼ା ଅଟକି ରହିଛନ୍ତି। ଏହି ୧୧ ଟିକିଆ ଦଳରେ ୩ଟି ଦନ୍ତା ହାତୀ, ୨ଟି ଶିଶୁ ହାତୀ ଏବଂ ୬ଟି ମାଈ ହାତୀ ରହିଛନ୍ତି। ହାତୀ ଘଉଡ଼ାଇବା ପାଇଁ ବନ ବିଭାଗ କର୍ମଚାରୀ ଘଟଣାସ୍ଥଳକୁ ଯାଇଥିବାବେଳେ ସନ୍ଧ୍ୟା ପର୍ଯ୍ୟନ୍ତ ବିଲ ମଧ୍ୟରେ ଅଟକି ରହିଥିବା ଜଣାପଡ଼ିଛି। ହାତୀ ଦେଖିବା ପାଇଁ ଶହ ଶହ ଲୋକ ରୁଣ୍ଡ ହୋଇଥିବାବେଳେ ରାତିରେ କୌଣସି ଅଘଟଣ ଘଟାଇବା ଆଶଙ୍କା କରି ଲୋକମାନେ ଭୟଭୀତ ହୋଇପଡ଼ିଛନ୍ତି। ଉକ୍ତ ସ୍ଥାନରେ ମୋବାଇଲ ସ୍କ୍ବାଡ ରେଞ୍ଜର ବିଦ୍ୟାଧର ସାହୁ,ସଦର ରେଞ୍ଜ ଅଫିସର ବିଜୟ କୁମାର ମହାନ୍ତ, ଫରେଷ୍ଟର ସଦର ପ୍ରଦୀପ କୁମାର ବାରିକ, ଜଙ୍ଗିରା ଫରେଷ୍ଟର ଶରତ ପଟ୍ଟନାୟକ,ନରଣପୁର ଫରେଷ୍ଟର ଶ୍ରୀମନ୍ତ ବେହେରା, ଟାଉନ ଫରେଷ୍ଟଗାର୍ଡ ମିତ୍ରଭାନୁ ନାୟକ ପ୍ରମୁଖ ଉପସ୍ଥିତ ଅଛନ୍ତି। ହାତୀପଲକୁ ଟେକାପଥର ନ ମାରିବା ଏବଂ ଭିଡ଼ ନ କରିବା ପାଇଁ ଲୋକମାନଙ୍କୁ ସଚେତନ କରାଯାଉଛି। ଜନଜୀବନ ଯେପରି କ୍ଷତି ନ ହେବ ତାହା ଉପରେ ବନବିଭାଗ ନଜର ରଖିଛି। ନାଳ ଅପର ପାର୍ଶ୍ୱରେ ଟ୍ରେନ୍ ଲାଇନ୍ ଥିବାରୁ ଏହା ଉପରେ ବନବିଭାଗ ସତର୍କ ନଜର ରଖିଛି। କେନ୍ଦୁଝର ଜିଲାରେ ହାତୀ ଉପଦ୍ରବ ଥମିବାର ନାଁ ଧରୁନାହିଁ। ହାତୀମାନେ ସମଗ୍ର ଜିଲାରେ ଦଳ ଦଳ ହୋଇ ଏଣେ ତେଣେ ବୁଲୁଥିବାରୁ ଲୋକମାନେ ଭୟଭୀତ ରହୁଛନ୍ତି। ହାତୀମାନେ ବ୍ୟାପକ ଧାନଫସଲ, ପନିପରିବା ନଷ୍ଟ କରିବା ସହିତ ଘରବାଡ଼ ଭାଙ୍ଗି ବ୍ୟାପକ କ୍ଷୟକ୍ଷତି ଘଟାଉଛି। ବନ ବିଭାଗ ସେମାନଙ୍କୁ ନିୟନ୍ତ୍ରଣ କରିବାରେ ସଫଳ ହୋଇପାରୁନାହିଁ। ବିଶେଷକରି ହାତୀମାନେ ପଥଭ୍ରଷ୍ଟ ହୋଇ ଏଣେ ତେଣେ ପଳାଉ ଥିବା ବେଳେ ନିଜର ସୁରକ୍ଷା ଦୃଷ୍ଟିରୁ ଲୋକମାନେ ସେମାନଙ୍କୁ ଘେରାଉ କରି ଯିବା ଆସିବାରେ ବାଧା ସୃଷ୍ଟି କରୁଛନ୍ତି। ହାତୀମାନେ ଜଙ୍ଗଲକୁ ସୁରକ୍ଷିତ ଭାବେ ଯାଇ ନ ପାରି ନାଳକଡ଼ ବିଲବାଡ଼ି ଏବଂ ରାସ୍ତାପାର୍ଶ୍ୱରେ ଅଟକି ରହୁଛନ୍ତି।
