ରସୁଲପୁର,୨।୪(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳର ଚାଷୀ ପନିପରିବା, ତୈଳବୀଜ, ଡାଲିଜାତୀୟ ଓ ଆଖୁ ଭଳି ଅର୍ଥକରୀ ଫସଲ ଚାଷକୁ ଗୁରୁତ୍ୱ ଦିଅନ୍ତି। ଏହି ଅଞ୍ଚଳରେ ତୈଳବୀଜ ଜାତୀୟ ଫସଲ ମଧ୍ୟରୁ ଚିନାବାଦାମ ଚାଷ ଅଧିକାଂଶ କ୍ଷେତରେ କରାଯାଇଥାଏ। ଚଳିତବର୍ଷ ବ୍ଲକ ଅଞ୍ଚଳର ପ୍ରାୟତଃ ଶତକଡା ୫୦ଭାଗରୁ ଊର୍ଦ୍ଧ୍ୱ ଅର୍ଥାତ ୫ହଜାର ହେକ୍ଟରରୁ ଊର୍ଦ୍ଧ୍ୱ ଜମିରେ ଚିନାବାଦାମ ଚାଷ କରାଯାଇଥିଲା। ଚାଷୀ ହେକ୍ଟର ପିଛା ୨୫ରୁ ୩୦ କୁଇଣ୍ଟାଲ ଚିନାବାଦାମ ଅମଳ କରିବେ ବୋଲି ଲକ୍ଷ୍ୟ ରଖିଥିଲେ। କିନ୍ତୁ ଆଶାନୁରୂପକ ଚିନାବାଦାମ ଅମଳ ହୋଇପାରି ନାହିଁ। ଏଭଳି ଘଟିବା ପଛରେ ପ୍ରତିକୂଳ ପାଗକୁ ଚାଷୀ ଦାୟୀ କରୁଛନ୍ତି। ଅନିୟମିତ ବର୍ଷା ଯୋଗୁ ସହଜରେ ବେଉଷଣ ହୋଇପାରିଲା ନାହିଁ। ଢିପ ଜମିରେ ଫସଲ ଅପେକ୍ଷାକୃତ ଭଲ ହୋଇଥିବା ବେଳେ ଖାଲୁଆ ଜମିରୁ ଚିନାବାଦାମ ଅମଳ କମିଯାଇଛି ବୋଲି ଚାଷୀମାନେ କହିଛନ୍ତି। ଚାଷୀଙ୍କ ଅଭିଯୋଗକୁ ବ୍ଲକ କୃଷି ବିଭାଗ ମଧ୍ୟ ସ୍ବୀକାର କରିଛି। ପୂର୍ବବର୍ଷ ଅପେକ୍ଷା ଏଥର ଅମଳ କମିଛି। ଏଯାଏ ଅମଳ କାର୍ଯ୍ୟ ସରିନି। ବର୍ଷା ପରେ ଲଗାଯାଇଥିବା ବାଦାମ ଅମଳ ହୋଇପାରିନାହିଁ। କୃଷି ବିଭାଗର ଆକଳନ ଅନୁସାରେ ଚିନାବାଦାମ ଚାଷ ମାର୍ଚ୍ଚରେ ଶେଷ ହୋଇଯିବା କଥା। ହେଲେ ଚଳିତବର୍ଷ ବୁଣାବୁଣି ସମୟରେ ବର୍ଷା ହେବାରୁ ତଳିଆ କ୍ଷେତରେ ଚାଷ ବିଳମ୍ବରେ କରାଯାଇଥିଲା। ଏହାର ଅମଳ ହେବାରେ ବିଳମ୍ବ ହେଉଛି। ଏଭଳି ସ୍ଥିତିରେ ଗ୍ରୀଷ୍ମ ପ୍ରବାହ ଆରମ୍ଭ ହୋଇଯାଇଛି। ଯାହାକି ଚିନାବାଦାମ ଅମଳକୁ ପ୍ରଭାବିତ କରୁଛି। ଖରା ଦାଉରୁ ବାଦାମ ଅମଳ କରିଲା ବେଳକୁ ଚାଷୀଙ୍କୁ ଅଧିକ ଖର୍ଚ୍ଚାନ୍ତ ହେବାକୁ ପଡୁଛି। ବର୍ଷାରେ ବାଦାମ କ୍ଷେତ ଟାଣ ହୋଇଯାଇଥିବାରୁ ଅମଳ ସହଜ ହେଉନାହିଁ। ବାଦାମ ଅମଳ ସମୟରେ ଅଧିକାଂଶ ଫଳ ମାଟିରେ ଫସି ରହିଯାଉଛି। ଶତପ୍ରତିଶତ ଅମଳ ପାଇଁ ଚାଷୀଙ୍କୁ ବିଲରେ ପାଣି ଛିଞ୍ଚତ୍ବାକୁ ପଡୁଛି। ଏହି ଜରିଆରେ ଚାଷୀଙ୍କୁ ଅଧିକ ଖର୍ଚ୍ଚାନ୍ତ ହେବାକୁ ପଡୁଛି। ମାତ୍ର ବିକ୍ରି ସମୟରେ ବଜାର ଦର ଚାଷୀକୁଳକୁ ସୁହାଉନାହିଁ। ଚାଷୀ ବାଦାମ ବିହନ ୮୫ରୁ ୯୦ଟଙ୍କା ଦରରେ କିଣୁଥିବା ବେଳେ ଉପତ୍ାଦିତ ଦ୍ରବ୍ୟକୁ ଶାଗମାଛ ଦରରେ ବିକ୍ରି କରୁଛନ୍ତି। ଗତ ମାସ ପ୍ରଥମ ସପ୍ତାହରେ ଚିନାବାଦାମର ବଜାର ଦର ୬୫ଟଙ୍କା ଥିଲା। ଏହି ଦର କ୍ରମଶଃ ହ୍ରାସ ପାଇବାରେ ଲାଗିଛି। ଏବେ ବାଦାମ କେଜି ପିଛା ଦର ୫ଟଙ୍କାରୁ ଊର୍ଦ୍ଧ୍ୱ ଖସି ଆସିଲାଣି। ଯାହାକୁ ନେଇ ଚାଷୀ ଚିନ୍ତାରେ ପଡ଼ିଛନ୍ତି। ଏଭଳି ସ୍ଥିତିରେ ସରକାରୀ ଯୋଜନା ଚାଷୀଙ୍କୁ ସହାୟକ ହୋଇପାରୁ ନାହିଁ। ସରକାର ଠିକ୍ ସମୟରେ ବାଦାମ ମଣ୍ଡି ଖୋଲିବାରେ ବିଫଳ ହେଉଛନ୍ତି। ଏଥିଯୋଗୁ ଚାଷୀ ଖୋଲାବଜାରରେ ବାଦାମ ବିକ୍ରି କରିବାକୁ ବାଧ୍ୟ ହେଉଛନ୍ତି ବୋଲି କୁହାଯାଉଛି। ଏହାଛଡ଼ା ଖୋଲା ବଜାରରେ କାରବାର ସମୟରେ ଚାଷୀ କଳାବଜାରକାରୀଙ୍କ ଦ୍ୱାରା ଶୋଷଣର ଶିକାର ହେଉଥିବା ଅଭିଯୋଗ ଆସୁଛି। ଧାର୍ଯ୍ୟ ମୂଲ୍ୟଠାରୁ କମ୍ରେ ବାଦାମ ବିକ୍ରି ହେଉଥିବା ବେଳେ କଟ୍ନୀଛଟ୍ନୀର ଶିକାର ହେଉଛନ୍ତି ଚାଷୀ। ତେବେ କ୍ଷତି ଭରଣାରେ ଚାଷୀ ଆଗଭର ହେବାକୁ ନବନିର୍ମାଣ କୃଷକ ସଂଗଠନ ଦାବି କରିଛି। ମଣ୍ଡିର ବାଦାମ ଦରକୁ ବଜାର ଦରଠାରୁ ଉଚ୍ଚା ରଖିବା ସହ ପ୍ରକୃତ ଚାଷୀଙ୍କଠାରୁ ବାଦାମ କିଣିବାକୁ ପ୍ରସ୍ତାବ ରଖିଛି ସଂଗଠନ। ଏଦିଗରେ ରସୁଲପୁର ବ୍ଲକ କୃଷି ଅଧିକାରୀ ବିଶ୍ୱଜୟୀ ମିଶ୍ର କହିଛନ୍ତି, ଚଳିତବର୍ଷ ବାଦାମ ଅମଳ ଆଶାନୁରୂପକ ହୋଇପାରି ନାହିଁ। ପ୍ରତିକୂଳ ପାଗ ଯୋଗୁ ବାଦାମ ଚାଷ ପ୍ରଭାବିତ ହୋଇଛି। ତେବେ ବ୍ଲକ ଅଞ୍ଚଳରେ ମଣ୍ଡି ଖୋଲିବା ନେଇ ଆଲୋଚନା ଚାଲିଛି। ଏଥର ମଣ୍ଡିରେ ବାଦାମ ଦର କେତେ ରହିଛି ତା’ ଜିଲାସ୍ତରୀୟ କୃଷି ଅଧିକାରୀଙ୍କ ବୈଠକରୁ ସ୍ପଷ୍ଟ ହୋଇପାରିବ ବୋଲି ସେ ପ୍ରକାଶ କରିଛନ୍ତି।
