କିନ୍ଶାସା/କିଗାଲି,୨୧।୬: ର୍ବାଣ୍ଡା ଏବଂ କଙ୍ଗୋ ମଧ୍ୟରେ ଉତ୍ତେଜନା ବୃଦ୍ଧିକୁ ଦୃଷ୍ଟିରେ ରଖି ଇଷ୍ଟ୍ ଆଫ୍ରିକାନ୍ କମ୍ୟୁନିଟି (ଇଏସି)ର ୭ ଦେଶ ବୁରୁଣ୍ଡି, କଙ୍ଗୋ, କେନିୟା, ର୍ବାଣ୍ଡା, ଉଗାଣ୍ଡା, ସାଉଥ୍ ସୁଦାନ ଏବଂ ତାଞ୍ଜାନିଆ ଚଳିତ ବର୍ଷ ଏକ ଆଞ୍ଚଳିକ ଫୋର୍ସ ଗଠନ କରିଛନ୍ତି। କଙ୍ଗୋ ସହ ଯୁଦ୍ଧ ହେଲେ ଏହି ସମସ୍ୟାର ସମାଧାନ ନିମନ୍ତେ ପଦକ୍ଷେପ ନେବ। କେନିୟା ରାଷ୍ଟ୍ରପତି ଉହୁରୁ କେନ୍ୟାଟ୍ଟା ଏବେ ଏହି ବ୍ଲକ୍ର ଅଧ୍ୟକ୍ଷ ଅଛନ୍ତି। କେନ୍ୟାଟ୍ଟା ର୍ବାଣ୍ଡା ଏବଂ କଙ୍ଗୋ ମଧ୍ୟରେ ଶାନ୍ତି ବଜାୟ ପାଇଁ ରିଜିଓନାଲ ଫୋର୍ସ୍କୁ ପୂର୍ବ କଙ୍ଗୋରେ ମୁତୟନ ନିଷ୍ପତ୍ତି ନେଇଛନ୍ତି। ଏଥିସହ କଙ୍ଗୋର କିଭୁ ଏବଂ ଇଟାରୀ ଅଞ୍ଚଳକୁ ଅସ୍ତ୍ରଶସ୍ତ୍ର ମୁକ୍ତ ଜୋନ୍ ଘୋଷଣା ପାଇଁ ଆହ୍ବାନ ଦେଇଛନ୍ତି। ରବିବାର କେନିୟା ରାଜଧାନୀ ନାଇରୋବିରେ ଅନୁଷ୍ଠିତ ଇଏସି ବୈଠକରେ ଦୁଇ ଦେଶ ମଧ୍ୟରେ ଲାଗି ରହିଥିବା ଉତ୍ତେଜନା ହ୍ରାସ ନିମନ୍ତେ ଆଲୋଚନା ହୋଇଛି। ବୈଠକରେ ପ୍ରଥମ ଥର ପାଇଁ ର୍ବାଣ୍ଡା ରାଷ୍ଟ୍ରପତି ପଲ୍ କାଗାମେ ଏବଂ କଙ୍ଗୋ ପ୍ରତିପକ୍ଷ ଫେଲିକ୍ସ ଶିସେକେଦି ଗୋଟିଏ ମଞ୍ଚରେ ଉପସ୍ଥିତ ରହିବା ସହ ପରସ୍ପର ଉପରେ ଦୋଷାରୋପ କରିଛନ୍ତି।
