ପଟ୍ଟାମୁଣ୍ଡାଇ,୨୬ା୮(ସ୍ବ.ପ୍ର.): କେନ୍ଦ୍ରାପଡ଼ା ଜିଲାର ପ୍ରମୁଖ ଜନବହୁଳ ପୂର୍ଣ୍ଣ ପଟ୍ଟାମୁଣ୍ଡାଇ ଆଦର୍ଶ ଥାନା ୧୯୧୭ ମସିହା ବ୍ରିଟିସ ଅମଳର ଆଜବେଷ୍ଟସ ଘରେ ୧୦୪ ହେଲା ଚାଲିଛି। ଏହି ଥାନା ଅଞ୍ଚଳରେ ଦିନକୁ ଦିନ ମାମଲା ସଂଖ୍ୟା ବଢି ଚାଲିଛି। ଏଥିସହ ଆପରାଧିକ କାର୍ଯ୍ୟକ୍ରମ ମଧ୍ୟ ୈର ବଢିଛି। ପଟ୍ଟାମୁଣ୍ଡାଇ ଥାନା ୨୦୧୮ ନଭେମ୍ବରରେ ଆଦର୍ଶ ଥାନାର ମାନ୍ୟତା ପାଇବା ପରେ ଆବଶ୍ୟକ ପୋଲିସ କର୍ମଚାରୀ ନିଯୁକ୍ତି ପାଇନାହାଁନ୍ତି। ମାମଲା ବଢି ଚାଲିଥିବା ବେଳେ ତଦନ୍ତ କରିବା, କେସ୍ ରୁଜୁ କରି ତାହାର ଆନୁଷଙ୍ଗିକ କାଗଜପତ୍ର ପ୍ରସ୍ତୁତ କରିବାକୁ କର୍ମଚାରୀଙ୍କର ଅଭାବ ଦେଖାଦେଇଛି। ଲୋକମାନଙ୍କ ପକ୍ଷରୁ ଏତଲା ହେଉଥିବା ବେଳେ ଏହା ମାସ ମାସ ଧରି ପଡି ରହୁଛି। ଯାହାକି ସମଗ୍ର ଅଞ୍ଚଳ ଅପରାଧ ପ୍ରବଣ ହେବାରେ ଲାଗିଛି ା ଆଦର୍ଶ ଥାନାରେ ୨ଜଣ ଇନ୍ସପେକ୍ଟର, ୫ଜଣ ସବ୍ଇନ୍ସପେକ୍ଟର, ୧୦ଜଣ ଏଏସ୍ଆଇ, ୩୪ ଜଣ ହାବିଲଦାର, କନଷ୍ଟେବଳ ଓ ୪୨ ଜଣ ହୋର୍ମଗାର୍ଡ ରହିବା କଥା। ଏହି ଥାନା ପାଇଁ ବିଭିନ୍ନ ମାମଲାର ତଦନ୍ତ, ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କରିବାକୁ ୨ଟି ଭ୍ୟାନ୍ ଓ ୩୦ଟି ବାଇକ୍ ଆବଶ୍ୟକ। ମାତ୍ର ଏବେ ୨ଜଣ ଇନ୍ସପେକ୍ଟର, ୪ଜଣ ସବ୍ଇନ୍ସପେକ୍ଟର, ୪ଜଣ ଏଏସ୍ଆଇ, ଜଣେ ହାବିଲଦାର, ୧୯ ଜଣ କନଷ୍ଟେବଳ, ୩୩ ଜଣ ହୋମ୍ଗାର୍ଡ, ୨ଟି ଭ୍ୟାନ୍ ଓ ୨ଜଣ ଡ୍ରାଇଭର ଅଛନ୍ତି। ମାତ୍ର ୨ଟି ବାଇକ୍ ରହିଛି। ଫଳରେ ବିଭିନ୍ନ ମାମଲା ଓ ଘଟଣାର ତଦନ୍ତ କରିବାରେ ବିଳମ୍ବ ହେଉଛି। ଏ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
୧୦୪ ବର୍ଷର ପଟ୍ଟାମୁଣ୍ଡାଇ ଆଦର୍ଶ ଥାନାର କଳେବର ପରିବର୍ତ୍ତନ ହେଉନାହିଁ। ଏବେ ବି ମୁଖ୍ୟ ଥାନା ଘର ଆଜବେଷ୍ଟସ୍ ରହିଛି। ବର୍ଷା ହେଲେ ଆଜବେଷ୍ଟସ୍ରୁ ପାଣି ଗଳୁଛି। ପୋଲିସ କର୍ମଚାରୀ ବସିବାକୁ ସ୍ଥାନ ନାହିଁ। କର୍ମଚାରୀଙ୍କ ରହିବାକୁ ମଧ୍ୟ କ୍ୱାର୍ଟର୍ସ ନାହିଁ। ଅଧିକାଂଶ କର୍ମଚାରୀ ଥାନା ବାହାରେ ଭଡା ଘରେ ରହୁଛନ୍ତି। ବହୁ ସମୟରେ ଥନାରେ ଏତଲା ରଖିବାକୁ କର୍ମଚାରୀ ଅଭାବ ଦେଖାଦେଇଛି। ଏହି ଆଦର୍ଶ ଥାନା ପାଇଁ ଆବଶ୍ୟକ ପୋଲିସ କର୍ମଚାରୀ ଯୋଗାଇ ଦେବା ସଙ୍ଗେ ସଙ୍ଗେ ଥାନା ଗୃହକୁ ପକ୍କା ଗୃହରେ ପରିଣତ କରିବା, କର୍ମଚାରୀଙ୍କ ରହିବା ପାଇଁ କ୍ୱାର୍ଟର୍ସ ନିର୍ମାଣ କରିବା ଜରୁରୀ ହୋଇପଡିଛି। ଅପରପକ୍ଷରେ ନୂତନ ଥାନା ନିର୍ମାଣ ପାଇଁ ରାଜସ୍ବ ବିଭାଗ ଅଧୀନରେ ଥିବା ଜାଗା ଗୃହ ବିଭାଗକୁ ହସ୍ତାନ୍ତର କରାଯାଇଥିଲେ ହେଁ ଏ ପର୍ଯ୍ୟନ୍ତ ମାଟି ଝୁଡିଏ ପଡିନାହିଁ। ଅନ୍ୟପକ୍ଷରେ ଥାନା ଅଞ୍ଚଳ ବଡ ହୋଇଥିବାରୁ ଗ୍ରାମାଞ୍ଚଳ ଥାନା ପ୍ରତିଷ୍ଠା ପାଇଁ ବହୁ ଦିନରୁ ଦାବି ହୋଇଆସୁଛି। ଗ୍ରାମାଞ୍ଚଳ ଥାନା ପ୍ରତିଷ୍ଠାରେ ଅହେତୁକ ବିଳମ୍ବ ଯୋଗୁ ପଟ୍ଟାମୁଣ୍ଡାଇକୁ ଆଦର୍ଶ ଥାନାର ମାନ୍ୟତା ପ୍ରଦାନ କରାଯାଇଛି। ପୋଲିସ କର୍ମଚାରୀ ନ ଥିବାରୁ ଅପରାଧୀମାନେ ଅପରାଧ ଘଟାଇ ଅନାୟସରେ ଖସିଯିବାରେ ସକ୍ଷମ ହେଉଛନ୍ତି। ଏ ଦିଗରେ ରାଜ୍ୟ ଘରୋଇ ବିଭାଗ ତୁରନ୍ତ ଦୃଷ୍ଟି ଦେଇ ପଦକ୍ଷେପ ନେଲେ ଶାନ୍ତିଶୃଙ୍ଖଳା ବଜାୟ ରହିପାରିବ ବୋଲି ସାଧାରଣରେ ମତ ପ୍ରକାଶ ପାଇଛି।
