ଭୁବନେଶ୍ୱର, ୪।୩(କ୍ରୀଡ଼ା ପ୍ରତିନିଧି): ଭୁବନେଶ୍ୱରରେ ଆରମ୍ଭ ହେବାକୁ ଯାଉଛି ପଠାନ୍ସ କ୍ରିକେଟ ଏକାଡେମୀ। ପଠାନ୍ସ ବ୍ରଦର୍ସ (ଇରଫାନ ଓ ୟୁସୁଫ)ଙ୍କ ନାମରେ ଭାରତର ୨୬ଟି ସ୍ଥାନରେ ଖୋଲି ସାରିଥିବା ‘କ୍ରିକେଟ ଏକାଡେମୀ ଅଫ୍ ପଠାନ୍ସ (କ୍ୟାପ୍)’ର ଭୁବନେଶ୍ୱର ଶାଖା ଚଳିତ ମାସ ୧୦ ତାରିଖରେ ଉଦ୍ଘାଟିତ ହେବ। ଦୃଢ଼ କ୍ରୀଡ଼ା ଭିତ୍ତିଭୂମି ଥିବା ଲୟୋଲା ସ୍କୁଲ ପରିସରରେ ଏହା କାର୍ଯ୍ୟ କରିବ। ଓଡ଼ିଶା କ୍ରିକେଟ ଆସୋସିଏଶନ(ଓସିଏ) କ୍ୟୁରେଟରଙ୍କ ତତ୍ତ୍ୱାବଧାନରେ ଏକାଡେମୀ ପାଇଁ ପିଚ୍ ପ୍ରସ୍ତୁତି କାର୍ଯ୍ୟ ଦ୍ରୁତ ଗତିରେ ଚାଲିଛି। ପ୍ରଶିକ୍ଷାର୍ଥୀମାନଙ୍କୁ ଉଚ୍ଚମାନର ଟ୍ରେନିଂ ସହ ରାଜ୍ୟ ଏବଂ ଦେଶର କ୍ରିକେଟକୁ ଏକ ଭିନ୍ନ ସୋପାନକୁ ନେବା ଏକାଡେମୀର ଲକ୍ଷ୍ୟ ବୋଲି ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ କ୍ୟାପ୍ର ମ୍ୟାନେଜିଂ ପାର୍ଟନର ଅଶୋକ କୁମାର ପ୍ରକାଶ କରିଛନ୍ତି। କ୍ୟାପ୍ର ଭୁବନେଶ୍ୱର ଶାଖାରେ ପ୍ରତି ବର୍ଷ ୨୦୦ ପ୍ରତିଭାଙ୍କୁ ତାଲିମ ଦେବାର ଲକ୍ଷ୍ୟ ରଖାଯାଇଛି। କୋଚିଂ ପଦ୍ଧତି ୩ ପର୍ଯ୍ୟାୟ ବିଶିଷ୍ଟ ରହିବ। ବିଗନର, ଇଣ୍ଟରମିଡିଏଟ୍ ଓ ଆଡଭାନ୍ସ ଲେଭଲ। ଏକାଡେମୀରେ ଭର୍ତ୍ତି ହେବାପାଇଁ ଚାହୁଁଥିବା ପିଲାମାନଙ୍କୁ ଟ୍ରାଏଲ୍ ଦେବାକୁ ପଡ଼ିବ। ଏଥିରୁ ଉକ୍ତ ଖେଳାଳି କେଉଁ ପର୍ଯ୍ୟାୟରେ ଟ୍ରେନିଂ ନେବାପାଇଁ ଉପଯୁକ୍ତ ତାହା ଧାର୍ଯ୍ୟ ହେବ। ୬ରୁ ୨୧ ବର୍ଷ ବୟସ ବର୍ଗରେ ଉଭୟ ବାଳିକା ଓ ବାଳକଙ୍କୁ ଉକ୍ତ ଏକାଡେମୀ ପାଇଁ ଚୟନ କରାଯିବ ବୋଲି ଅଶୋକ କହିଛନ୍ତି। ଲୟୋଲା ସ୍କୁଲ ରେକ୍ଟର ଫାଦର ଅଗଷ୍ଟିନ ଏଜହାକୁନେଲ ଓ ପ୍ରିନ୍ସିପାଲ ଏଫ୍ଆର୍ ଭିକ୍ଟର ଏଫ୍. ମିସ୍କ୍ୱିଥ୍ ସ୍କୁଲର ଦୃଢ଼ କ୍ରୀଡ଼ା ଭିତ୍ତିଭୂମି ସମ୍ପର୍କରେ ବର୍ଣ୍ଣନା କରିବା ସହ ବିଭିନ୍ନ କ୍ରୀଡ଼ା ପାଇଁ ଉନ୍ନତ କୋଚିଂ ଉପରେ ଗୁରୁତ୍ୱାରୋପ କରିଥିଲେ। ୨୦୦୧ରେ ପ୍ରତିଷ୍ଠା ହୋଇଥିବା ଲୟୋଲା ସ୍କୁଲ ଭଲ ପାଠପଢ଼ା ସହ ଉଚ୍ଚସ୍ତରର ସ୍ପୋଟର୍ସ କୋଚିଂ ଉପରେ ଧ୍ୟାନ ଦେଉଥିତ୍ବା ପ୍ରକାଶ କରିଥିଲେ।
ଅନ୍ତର୍ଜାତୀୟ କ୍ରିକେଟରେ ସଫଳତା ପରେ ପଠାନ ବ୍ରଦର୍ସ ତାଙ୍କ ସ୍ବପ୍ନର କ୍ରିକେଟ ଏକାଡେମୀ ୨୦୧୪ ସେପ୍ଟେମ୍ବର ୧୧ରେ ଶୁଭାରମ୍ଭ କରିଥିଲେ। ଗତ ୯ ବର୍ଷ ମଧ୍ୟରେ ଦେଶର ବିଭିନ୍ନ ସ୍ଥାନରେ ଇତିମଧ୍ୟରେ ୨୬ଟି ଏକାଡେମୀ କାର୍ଯ୍ୟକ୍ଷମ ହୋଇଛି। ଏକାଡେମୀର ଭୁବନେଶ୍ୱର ଶାଖାରେ ୨ଟି ଟର୍ଫ ମ୍ୟାଚ ପିଚ୍ ଏବଂ ୩ଟି ପ୍ରାକ୍ଟିସ ପିଚ୍ ରହିବ। ଫ୍ଲଡ୍ଲାଇଟ୍ର ସୁବିଧା ଥିବାରୁ ଛାତ୍ରୀଛାତ୍ରମାନେ ସ୍କୁଲ ଛୁଟି ହେବାପରେ ସନ୍ଧ୍ୟା ସମୟରେ ମଧ୍ୟ ଅଭ୍ୟାସ କରିପାରିବେ। ଲୟୋଲା ସ୍କୁଲ ପରିସରରେ କ୍ୟାପ୍, ଭୁବନେଶ୍ୱରର କାର୍ଯ୍ୟାଳୟ ରହିବ। ଏକାଡେମୀ ପାଇଁ ୩ ଜଣ କୋଚ୍, ସ୍ପୋଟର୍ସ ସ୍ପେଶାଲିଷ୍ଟ ଫିଜିଓ, ମାଲିସବାଲା, ସ୍ପୋଟର୍ସ ମେଡିସିନ ସ୍ପେଶାଲିଷ୍ଟ ରହିବେ। ଉଚ୍ଚ ପ୍ରତିଭାସମ୍ପନ୍ନ ଆର୍ଥିକ ଅନଗ୍ରସର ପିଲାଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା ରହିବ ବୋଲି ଏକାଡେମୀ ଭୁବନେଶ୍ୱର ଶାଖାର ମ୍ୟାନେଜର (ଅପରେଶନ୍ସ) ଆଜେଜା ଖାନମ୍ ପ୍ରକାଶ କରିଛନ୍ତି। ଖବରଦାତା ସମ୍ମିଳନୀ ଅବସରରେ ଟିମ୍ ଇଣ୍ଡିଆର ପୂର୍ବତନ ଅଲ୍ରାଉଣ୍ଡର ଇରଫାନ ପଠାନ ଏକ ଭିଡିଓ ବାର୍ତ୍ତା ମାଧ୍ୟମରେ ଶୁଭେଚ୍ଛା ଜଣାଇଥିଲେ। ଚଳିତ ମାସ ୨୫ କିମ୍ବା ୨୬ ତାରିଖରେ ଇରଫାନ ଓ ୟୁସୁଫ ଭୁବନେଶ୍ୱର ଆସିବା କାର୍ଯ୍ୟକ୍ରମ ରହିଛି ବୋଲି ଏକାଡେମୀ ଭୁବନେଶ୍ୱର ଶାଖାର ପରାମର୍ଶଦାତା ଶେଖ ଅବଦୁଲ ରାବ୍ ପ୍ରକାଶ କରିଛନ୍ତି।