ଭୁବନେଶ୍ବର,୬ା୯(ବ୍ୟୁରୋ):ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ ଘରୋଇ ଅନୁଷ୍ଠାନ ପକ୍ଷରୁ ଜୀବନବ୍ୟାପୀ ସାଧନା ପାଇଁ ପୁରସ୍କାର ମିଳିଛି। ଏହି ଉତ୍ସବରେ ଯୋଗଦେବାକୁ ବିଜେଡିର ବହୁ ଆଗ ଧାଡ଼ିର ଯୁବ ଓ ଛାତ୍ର ନେତାମାନେ ଦିଲ୍ଲୀ ଯାଇଥିଲେ। ସେଠାରେ କାର୍ଯ୍ୟକ୍ରମ ସରିବା ପରେ କେତେକ ଯୁବ, ଛାତ୍ର ନେତା ତଥା ବିଧାୟକଙ୍କୁ ମିଶାଇ ମୋଟ ୧୬ ଜଣ ରବିବାର ସାରେ ଭୁବନେଶ୍ୱର ଫେରୁଥିଲେ। ଦିଲ୍ଲୀ ବିମାନବନ୍ଦରରେ ସେହି ନେତାମାନେ ପହଞ୍ଚି ନିଜ ବେଗ୍ବସ୍ତାନିଗୁଡିକ ଚେକିଂ କରି ବିମାନ ଭିତରକୁ ଛାଡ଼ି ଦେଇଥିଲେ। ସେମାନେ ସା ୮ଟା ୨୦ ମିନିଟ୍ରେ ଇଣ୍ଡିଗୋ ଏ୩୨୦ ବିମାନରେ ଫେରିବାର ଥିଲା। ବିମାନ ଛାଡ଼ିବାକୁ କିଛି ସମୟ ବିଳମ୍ବ ଥିବା ଜାଣି ସେମାନେ ସେଠାରେ ଥିବା ଏକ ମଦ ବାର୍ ଭିତରକୁ ପଶିଯାଇଥିଲେ।
ଧରିତ୍ରୀକୁ ହସ୍ତଗତ ହୋଇଥିବା ତଥ୍ୟ ଅନୁଯାୟୀ, ମୁଖ୍ୟମନ୍ତ୍ରୀଙ୍କୁ ପୁରସ୍କାର ମିଳିବା ଖୁସିରେ ଉକ୍ତ ନେତାମାନେ ଆବଶ୍ୟକତାଠାରୁ ଅଧିକ ମଦ୍ୟପାନ କରିଦେଇଥିଲେ। ସେତେବେଳକୁ ସେମାନଙ୍କ ବେଗ୍ ଯାଇ ବିମାନ ଭିତରେ ରହିସାରିଥିଲା। ଅତ୍ୟଧିକ ମଦ୍ୟପାନ କରି ଯେତେବେଳେ ନେତାମାନେ ବିମାନକୁ ଯିବାକୁ ଚାହିଁଲେ ସେଠାରେ ସେମାନଙ୍କୁ ଚେକିଂ କରି ଅଟକାଯାଇଥିଲା। ସେମାନଙ୍କୁ ଆଉ ବିମାନ ଭିତରକୁ ଯିବାକୁ ଦିଆଗଲା ନାହିଁ। ଫଳରେ ବିମାନବନ୍ଦର ଭିତରେ ନିଶାସକ୍ତ ଅବସ୍ଥାରେ ସେହି ନେତାମାନେ ଏୟାରପୋର୍ଟର କେତେଜଣ ଅଧିକାରୀଙ୍କ ସହ ଯୁକ୍ତିତର୍କ ଆରମ୍ଭ କରିଦେଇଥିଲେ। ବିମାନରେ ଥିବା ଅଧିକାରୀ କିନ୍ତୁ ସେମାନଙ୍କୁ ନେବାକୁ ସିଧାସଲଖ ମନା କରିଦେଇଥିଲେ। ସେଠାରେ ଉପସ୍ଥିତ ଥିବା ଜଣେ ଯୁବ ବିଧାୟକ କିନ୍ତୁ ସମସ୍ତଙ୍କୁ ନେଇଯିବା ଲାଗି ଅଧିକାରୀଙ୍କ ସହ ପ୍ରବଳ ଯୁକ୍ତିତର୍କ କରିଥିଲେ, ହେଲେ ତାହାର କିଛି ସୁଫଳ ମିଳିଲା ନାହିଁ। ଏପରିକି ସେମାନଙ୍କ ବିରୋଧରେ ମାମଲା ରୁଜୁହେବା ଭଳି ପରିସ୍ଥିତି ମଧ୍ୟ ସୃଷ୍ଟି ହୋଇଥିଲା। ହେଲେ ଦିଲ୍ଲୀରେ ରହୁଥିବା କେତେଜଣ ବଡ଼ ନେତା ଏହି କଥାକୁ ଚାପିବା ଲାଗି ଉଦ୍ୟମ ଆରମ୍ଭ କରିଦେଇଥିଲେ। ହେଲେ ବିମାନରେ ସେହି ସମସ୍ତ ନେତା ଫେରିପାରି ନ ଥିଲେ। ଟିକେଟ ଥାଇ ସୁଦ୍ଧା ବିମାନଟି ୧୬ଟି ଖାଲି ସିଟ୍ ସହ ଭୁବନେଶ୍ୱର ଫେରିଥିଲା। ନେତାମାନେ ସିନା ଆସିପାରି ନ ଥିଲେ ହେଲେ ସେମାନଙ୍କ ବେଗ୍ କିନ୍ତୁ ଆସି ଭୁବନେଶ୍ୱର ବିମାନବନ୍ଦରରେ ପହଞ୍ଚିଥିଲା। ଫେରିପାରି ନ ଥିବା ନେତା ସୋମବାର ଭିନ୍ନ ଭିନ୍ନ ସମୟରେ ଫେରିଥିବା ସୂଚନା ମିଳିଛି।
