ଟିଟିଲାଗଡ୨୭।୭(ଶରତ ମିଶ୍ର): ବୁଝିଲେନି ସମ୍ପର୍କ। ୨୦ ହଜାରରେ ଶିଶୁ କନ୍ୟାଙ୍କୁ ବିକ୍ରି କରିଦେଲେ ମା’ବାପା। ଏଭଳି ଘଟଣା ଟିଟିଲାଗଡ ବ୍ଲକର ବାଗଡେର ଗାଁରେ ଦେଖିବାକୁ ମିଳିଛି। ଏକ ଦମ୍ପତ୍ତି ନିଜ ଶିଶୁ କନ୍ୟାକୁ ୨୦ ହଜାର ଟଙ୍କା ରେ ବିକ୍ରି କରିଥିବା ଅଭିଯୋଗ ହୋଇଛି ।
ମିଳିଥିବା ସୂଚନାନୁସାରେ, ବାଗଡେର ଗାଁର ନୀଳ ରଣାଙ୍କ ପ୍ରଥମ ସ୍ତ୍ରୀରୁ ୩ଟି ଶିଶୁ କନ୍ୟା ଥିଲା। ଉଭୟଙ୍କ ମଧ୍ୟରେ ଗଣ୍ଡଗୋଳ ହେବାରୁ ପ୍ରଥମ ସ୍ତ୍ରୀ ନୀଳ ରଣାଙ୍କୁ ଛାଡି ମା ଘରକୁ ପଳାଇ ଯାଇଥିଲେ । ଏହାପରେ ନୀଳ ୨ୟ ବିବାହ କରିବା ପରେ ୨ୟ ସ୍ତ୍ରୀଙ୍କ ମଧ୍ୟ ପ୍ରଥମ ଝିଅ ହୋଇଥିଲା ଓ ପରେ ୨ୟ ଝିଅ ହେବା ପରେ ୨ୟ ଝିଅକୁ ୨୦ ହଜାର ଟଙ୍କାରେ ୁ ବିକ୍ରି କରିଥିବା ନୀଳ ରଣା ଓ ପତ୍ନୀ କନକ ରଣା ସ୍ବୀକାର କରିଛି । ନୀଳ ରଣା ଓ କନକ ରଣା ଏକ ଗରିବ ପରବାର ଶ୍ରେଣୀର ହୋଇଥିବାରୁ ବର୍ଷର ଅଧିକାଂଶ ସମୟ ଦାଦନ ଖଟି ଯାଇଥାନ୍ତି। କନକ ଗର୍ଭବତୀ ହେବା ପରେ ଟିଟିଲାଗଡ ହସ୍ପିଟାଲରେ ଭର୍ତ୍ତି ହୋଇଥିବାବେଳେ ଶିଶୁ କନ୍ୟାଟି ଜନ୍ମ ହୋଇଥିଲା। ହସ୍ପିଟାଲରୁ ନବଜାତ ଶିଶୁ କନ୍ୟା ଓ କନକ ଘରକୁ ଆସିବା ପରେ ୭ ଦିନ ମଧ୍ୟରେ ପାଇକମାଲର ଏକ ଗାଁର ଦମ୍ପତ୍ତିକୁ ୨୦ ହଜାର ଟଙ୍କାରେ ବିକ୍ରି କରିଥିବା ନୀଳ ଓ କନକ ସ୍ବୀକାର କରିଛନ୍ତି ।
ଗରିବ ଶ୍ରେଣୀର ଲୋକଙ୍କୁ ସହାୟତା ପାଇଁ ସରକାରଙ୍କ ପାଖରେ ଅନେକ ଯୋଜନା ହେଲେ ଏହି ସମସ୍ତ ଯୋଜନାରୁ ବାଦ୍ ପଡିଛନ୍ତି ଏହି ଗରିବ ପରିବାର। ଭଙ୍ଗା ଦଦରା ଘରେ ରହିବା ଅସମ୍ଭବ । ଏପରିକି ରାଶନ ମିଳୁନଥିବାରୁ ଏମାନେ ଅନେକ କଷ୍ଟରେ ଚଳୁଛନ୍ତି। ସରକାରର ସମସ୍ତ ଯୋଜନାରୁ ବାଦ ପଡିଥିବା ସହିତ ଅତି ଗରିବ ହୋଇଥିବାରୁ ଶିଶୁ କନ୍ୟାକୁ ବିକ୍ରି କରିଥିବା କହିଛନ୍ତି ଏହି ଦମ୍ପତ୍ତି ।
