ଗଜପତି,୨୦।୩ (ଗିରିଧାରୀ ପରିଛା):ବିଧାନସଭା ବର୍ତ୍ତମାନ ଚାଲିଥିବା ବେଳେ ପ୍ରଶ୍ନ ଉତ୍ତର କାଳରେ ପାରଳାଖେମୁଣ୍ଡି ବିଧାୟକ ରୂପେଶ କୁମାର ପାଣିଗ୍ରାହୀ ଲୋକଙ୍କ ସ୍ବାର୍ଥରେ ୨ଟି ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଇଛନ୍ତି ଏବଂ ତାହାର ଜବାବ ବି ମାଗିଛନ୍ତି । ସେ ପ୍ରଥମ ପ୍ରଶ୍ନ ଖାଉଟି ଓ ଯୋଗାଣ ମନ୍ତ୍ରୀଙ୍କୁ ପ୍ରଶ୍ନ କରିଥିଲେ, ରାଜ୍ୟରେ ଅନେକ ହିତାଧିକାରୀ ବର୍ତ୍ତମାନ ରାସନ କାର୍ଡ ପାଇବାରୁ ବଞ୍ଚିତ ଅଛନ୍ତି। ଅନେକ ହିତାଧିକାରୀ ନିଜ କାର୍ଡ ପାଇବା ପାଇଁ ପୋର୍ଟାଲ ମାଧ୍ୟମରେ ଆବେଦନ ମଧ୍ୟ କରିଛନ୍ତି । ତେବେ ସେମାନେ ନିଜ କାର୍ଡ଼ କେମିତି ପାଇପାରିବେ ଓ କେବେ ପାଇବେ ବୋଲି ପ୍ରଶ୍ନ କରିଥିଲେ। ଜବାବରେ ଯୋଗାଣ ଓ ଖାଉଟି ସୁରକ୍ଷା ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର କହିଛନ୍ତି ରାଜ୍ୟରେ ରାସନ କାର୍ଡର ସଂଶୋଧନ ପରେ ନୂତନ ଭାବେ ପୋର୍ଟାଲ ମାଧ୍ୟମରେ ୧୩,୭୭,୬୭୫ ଜଣ ନୂତନ କାର୍ଡ ଆବେଦନ କରିଛନ୍ତି । ସେମାନଙ୍କ ମଧ୍ୟରୁ ବର୍ତ୍ତମାନ ସୁଧା ୬,୮୦,୬୭୫ ପ୍ରଶାସନ ଦ୍ୱାରା ତର୍ଜମା ହୋଇ ହିତାଧିକାରୀଙ୍କ ତାଲିକା ସରକାରଙ୍କ ହସ୍ତଗତ ହୋଇଛି ଏବଂ ସମସ୍ତ ଜିଲାପାଳମାନଙ୍କୁ ନିର୍ଦେଶ ଦିଆଯାଇଛି। ଆବେଦନ କାରୀଙ୍କ ବାସ୍ତବିକ ସ୍ଥିତିକୁ ପରଖି ରିପୋର୍ଟ ଦେବାପାଇଁ ନିର୍ଦେଶ ଦିଆଯାଇଛି । ଖାଦ୍ୟସୁରକ୍ଷା ଆଇନ ରୂଲ ୨୦୨୦ ଅନୁସାରେ ୧୧ଟି ସ୍ବତଃ ଆନ୍ତର୍ଭୂକ୍ତ ପ୍ରଣାଳୀ ଓ ୧୦ ଅନ୍ୟ ଛାଡ କରିବା ପ୍ରକ୍ରିୟା ରୂଲ ଅନୁସାରେ ବଳକା ହିତାଧିକାରୀଙ୍କ ତାଲିକା ପ୍ରସ୍ତୁତ କରି ଯଥାଶୀଘ୍ର ହିତାଧିକାରୀଙ୍କ କାର୍ଡ ପ୍ରଦାନ କରାଯିବ ବୋଲି ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ଉତ୍ତର ରଖିଛନ୍ତି ।
ଏହି ପ୍ରଶ୍ନକାଳ ସମୟରେ ପାରଳାଖେମୁଣ୍ଡି ନିର୍ବାଚନ ମଣ୍ଡଳୀର କୃଷକଙ୍କ ପାଣି ସମସ୍ୟାକୁ ଦୃଷ୍ଟିରେ ରଖି ବିଧାୟକ ରୂପେଶ କୁମାର ପାଣିଗ୍ରାହୀ ସିଧାସଳଖ ମୁଖ୍ୟମନ୍ତ୍ରୀଙ୍କୁ ଅନ୍ୟ ଏକ ପ୍ରଶ୍ନ କରିଛନ୍ତି। ଜିଲାର କାଶୀନାଗର ବ୍ଲକରେ ୨ଟି ଜଳ ଉତ୍ସ ରହିଛି। ଗୋଟିଏ ବାଇଝାଲ ଓ ଅନ୍ୟଟି କାଶୀନାଗର ନିକଟସ୍ତ ପୁଲିଗୁମି ନାଳ। ୨ଟି ନାଳର ପାଣି ବ୍ୟବହାର ନହୋଇ ଶେଷରେ ବଂଶଧାରା ନଦୀରେ ମିଶି ଲୋକଙ୍କ ବ୍ୟବହାରରେ ଲାଗିପାରୁନାହିଁ ସେଥିପାଇଁ ଆନିକଟ କିମ୍ବା କେନାଲର ସୁବିନିଯୋଗ ପାଇଁ କୌଣସି ଯୋଜନା ପ୍ରସ୍ତୁତ କରାଯାଇଛି କି ବୋଲି ପ୍ରଶ୍ନ କରିଥିଲେ
ଉତ୍ତରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ ବାଇଝାଲ ଏବଂ ପୁଲିଗୁମି ନାଳ ଉପରେ ଜଳ ସେଚନ ବିଭାଗ ପକ୍ଷରୁ ଏହି ଦୁଇଟି ନାଳ ଉପରେ କୌଣସି ପ୍ରକଳ୍ପ ନିର୍ମାଣ ପାଇଁ ରଦ କରାଯାଇଛି। ତେଣୁ କାଶୀନଗର ବ୍ଲକର ଉପାପଦର ଗ୍ରାମ ନିକଟରେ ବଡ ନାଳ ଉପରେ ଗୋଟିଏ ଚେକ ଡ୍ୟାମ ର୍ନିମାଣ ପାଇଁ ୮୬ଲକ୍ଷ ଟଙ୍କା ଅର୍ଥ ମଞ୍ଜୁର କରାଯାଇଛି ଏବଂ ବାଇ ଝାଲ ନାଳ ଉପରେ ଅନ୍ୟ ଏକ ପ୍ରକଳ୍ପ ର୍ନିମାଣ ପାଇଁ ୮୮.୦୯ ଲକ୍ଷ ଟଙ୍କା ମଞ୍ଜୁର କରାଯାଇଛି। ଯଥାଶୀଘ୍ର ଏହି ଦୁଇଟି ପ୍ରକଳ୍ପ ପାଇଁ ଟେଣ୍ଡର ପ୍ରକ୍ରିୟା ସାରି କାର୍ଯ୍ୟ ଆରମ୍ଭ କରାଯିବ ବୋଲି କହିଛନ୍ତି।
