ପରଜଙ୍ଗ, ୧୩।୩(ଡି.ଏନ୍.ଏ.): ଦୀର୍ଘ ୨୦ବର୍ଷ ପରେ ବଦଳିଛି ଢେଙ୍କାନାଳ ଜିଲା ପରଜଙ୍ଗ ପଞ୍ଚାୟତ ସମିତିର ରାଜନୈତିକ ସମୀକରଣ। ବିଜେଡି ଗଡ଼ ଭାବେ ପରିଚିତ ଏହି ବ୍ଲକର ସମିତି ଅଧ୍ୟକ୍ଷା ପଦବୀ ହାତେଇ ନେଇଛି ଭାଜପା। କଙ୍କଡ଼ାସୋଡ଼ା ପଞ୍ଚାୟତର ସମିତିସଭ୍ୟା ତଥା ଭାଜପା ନେତ୍ରୀ ଶର୍ମିଷ୍ଠା ଦଳବେହେରା ଅଧ୍ୟକ୍ଷା ଭାବେ ନିର୍ବାଚିତ ହୋଇଛନ୍ତି। କଙ୍କିଳି ପଞ୍ଚାୟତର ବିଜେଡି ସମର୍ଥିତ ସମିତିସଭ୍ୟା ମମତା ପାଣି ତାଙ୍କ ବିରୋଧରେ ପ୍ରାର୍ଥୀ ହୋଇଥିଲେ ମଧ୍ୟ ସେ ଶର୍ମିଷ୍ଠାଙ୍କଠାରୁ ୧୮-୧୧ ବ୍ୟବଧାନରେ ପରାସ୍ତ ହୋଇଛନ୍ତି। ଦୀର୍ଘ ଦୁଇଦଶନ୍ଧି ପରେ ବ୍ଲକ ଅଧ୍ୟକ୍ଷ ପଦବୀରୁ ବିଜେଡି କ୍ଷମତାଚ୍ୟୁତ ହେବା ପୂର୍ବତନ ମନ୍ତ୍ରୀ ତଥା ବିଧାୟକ ଡା. ନୃସିଂହ ଚରଣ ସାହୁଙ୍କ ପାଇଁ ଶକ୍ତ ଧକ୍କା ସଦୃଶ ହୋଇଥିବା ବେଳେ ଭାଜପା ଶିବିରରେ ଉତ୍ସାହ ଦେଖାଦେଇଛି।
ଅଧ୍ୟକ୍ଷ ପଦବୀରେ ନିର୍ବାଚନ ଲାଗି ଶନିବାର ବ୍ଲକ ସଭାଗୃହ ପରିସରରେ ସମସ୍ତ ପ୍ରସ୍ତୁତି ଶେଷ ହୋଇଥିଲା। ନିର୍ଦ୍ଧାରିତ ସମୟ ପୂର୍ବରୁ ଅଜ୍ଞାତବାସରେ ଥିବା ବ୍ଲକର ମୋଟ୍ ୨୯ ସମିତିସଭ୍ୟ ସିଧାସଳଖ ଆସି ପହଞ୍ଚତ୍ଥିଲେ। ଭାଜପା ନିକଟରେ ମ୍ୟାଜିକ୍ ସଂଖ୍ୟା ପାଇଁ ୧୭ଜଣଙ୍କ ସମର୍ଥନ ରହିଥିବା ସତ୍ତ୍ୱେ ବିଜେଡି ତରଫରୁ ମମତା ପ୍ରାର୍ଥୀ ହୋଇଥିଲେ। ନିର୍ଦ୍ଧାରିତ ସମୟରେ ଶର୍ମିଷ୍ଠା ଏବଂ ମମତା ନାମାଙ୍କନପତ୍ର ଦାଖଲ କରିଥିଲେ। ଶର୍ମିଷ୍ଠାଙ୍କୁ ୧୮ ଏବଂ ମମତାଙ୍କୁ ୧୧ ଖଣ୍ଡ ଭୋଟ ମିଳିଥିଲା। ଅଜ୍ଞାତବାସରେ ବିଜେଡି ଶିବିରରେ ୧୨ ସମିତିସଭ୍ୟ ଥିବା ବେଳେ ଜଣେ କ୍ରସ୍ ଭୋଟିଂ କରିଥିଲେ। ସବୁଠାରୁ ରୋଚକ କଥା, ବ୍ଲକ କାର୍ଯ୍ୟାଳୟ ବାହାରେ ଶର୍ମିଷ୍ଠାଙ୍କ ହଜାର ହଜାର ସମର୍ଥକ ରହିଥିବାବେଳେ ମମତାଙ୍କୁ ନୈତିକ ସମର୍ଥନ ଜଣାଇବାକୁ କୌଣସି ଦଳୀୟ ନେତା କି କର୍ମୀ ନ ଥିଲେ। ଆବଶ୍ୟକ ସମର୍ଥନ ନ ଥିବା ସତ୍ତ୍ୱେ ମମତାଙ୍କୁ ବିଜେଡି କାହିଁକି ପ୍ରାର୍ଥୀ କଲା ତାହାକୁ ନେଇ ଏବେ ସାଧାରଣରେ ଚର୍ଚ୍ଚା ଜୋର୍ ଧରିଛି। ବିଜୟ ପରେ ନବ ନିର୍ବାଚିତା ଅଧ୍ୟକ୍ଷା ଶର୍ମିଷ୍ଠା ନିଜ ପ୍ରତିକ୍ରିୟାରେ କୁହନ୍ତି, ଯୋଗ୍ୟ ହିତାଧିକାରୀଙ୍କ ନିକଟରେ ସରକାରୀ ଯୋଜନା ପହଞ୍ଚାଇବା ତାଙ୍କର ମୁଖ୍ୟ ଲକ୍ଷ୍ୟ। ଅବହେଳିତ ବର୍ଗଙ୍କୁ ସହାୟତା ଯୋଗାଇଦେବା, ସେମାନଙ୍କୁ ସରକାରୀ ଯୋଜନାରେ ସାମିଲ କରିବା ଦିଗରେ ସେ କାର୍ଯ୍ୟ କରିବେ ବୋଲି କହିଛନ୍ତି।
