ପାରାଦୀପ,୧୩।୨(ଶରତ ରାଉତ):ଜଗତ୍ସିଂହପୁର ଜିଲା ପାରାଦୀପ ବନ୍ଦର ସହରର ପ୍ରତୀକ ହେଉଛି ସମୁଦ୍ର କୂଳରେ ଥିବା ବତିଘର (ଲାଇଟ ହାଉସ)। ୩୬ ବର୍ଷ ହେଲା ଏହି ବତିଘର ସାମୁଦ୍ରିକ ନାଭିଗେସନ କ୍ଷେତ୍ରରେ କାମରେ ଲାଗୁଛି। ଏବେ ସୂଚନା ପ୍ରଯୁକ୍ତି ବିଦ୍ୟା ସଫଳତା ପରେ ବତିଘର ଆବଶ୍ୟକ ଆଉ ପୂର୍ବପରି ହେଉନାହିଁ। ଆସନ୍ତା ଫେବୃଆରୀ ୧୭ରୁ ଏହା ପର୍ଯ୍ୟଟକଙ୍କ ପାଇଁ ବ୍ୟବହାର ହେବ। ଅର୍ଥାତ୧୭ରୁ ସମସ୍ତେ ବତିଘର ଉପରେ ଚଢ଼ି ସମୁଦ୍ର ଦୃଶ୍ୟ ଉପଭୋଗ କରିବାର ସୁଯୋଗ ପାଇବେ। ପାରାଦୀପ ସମେତ ଓଡ଼ିଶାର ୧୦ ବତିଘର ଓ ଦେଶରେ ଥିବା ୭୫ ବତୀଘରକୁ ଲାଇଟ୍ ହାଉସ ଟୁରିଜମ ପ୍ରୋଜେକ୍ଟ ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିବାର କାର୍ଯ୍ୟକ୍ରମ ରହିଛି। ୧୭ରେ ଭର୍ଚ୍ଚୁଆଲ ଯୋଗେ ପ୍ରଧାନମନ୍ତ୍ରୀ ମୋଦି ଏହାକୁ ଉଦ୍ଘାଟନ କରିବେ ବୋଲି ବତିଘର ଇନଚାର୍ଜ ପ୍ରଦୀପ କୁମାର ଦତ୍ତଙ୍କ ସୂତ୍ରରୁ ଜଣାପଡ଼ିଛି। ୩ ଏକର ବିଶିଷ୍ଟ ବତିଘର ପରିସରରେ କେତେକ ଆକର୍ଷଣୀୟ କାମ ହୋଇଛି। ଯଥା ପିଲାଙ୍କ ଖେଳପଡିଆ, ଖେଳ ଉପକରଣ, ଶୁଦ୍ଧ ପାନୀୟ ଜଳ ବ୍ୟବସ୍ଥା, ଶୌଚାଳୟ, ପାଣି ଫୁଆରା, ଆଲୋକୀକରଣ ଆଦି ହୋଇସାରିଛି। ଉଦ୍ଘାଟନ ପରେ ନୂଆ ପର୍ଯ୍ୟଟକଙ୍କ ପାଇଁ ଅଧିକ ଆକର୍ଷଣୀୟ ବ୍ୟବସ୍ଥା କରାଯିବା ନେଇ ପ୍ରସ୍ତାବ ରହିଛି।
ସୂଚନାଯୋଗ୍ୟ, ୧୯୮୨ରେ ପାରାଦୀପ ବତିଘର ନିର୍ମାଣ ହୋଇଥିଲା।୧୯୮୮ ମାର୍ଚ୍ଚ ୨୫ରେ ଏହା ଲୋକାର୍ପଣ ହୋଇଥିଲା। ୧୬୮ ପାହାଚ ବିଶିଷ୍ଟ ଏହି ବତିଘରର ଉଚ୍ଚତା ୪୦ ମିଟର। ଏଥିରେ ଯେଉଁ ଲାଇଟ ଜଳିଥାଏ ତାକୁ ଦେଖି ନାବିକମାନେ ଜାଗା ସମ୍ପର୍କରେ ଅବଗତ ହୋଇଥାନ୍ତି। ଭାରତର ୭୫ ଲାଇଟ ହାଉସ ସମ୍ପର୍କରେ ବତୀ ଫ୍ଲାସ ଅନୁସାରେ ଆଇଏମଓ (ଇଣ୍ଟର ନ୍ୟାଶନାଲ ମେରିଟାଇମ ଅର୍ଗାନାଇଜେଶନ)ଦର୍ଶାଯାଇଛି। ଯଥା ପ୍ରତ୍ୟେକ ବତୀ ୩୦ ସେକେଣ୍ଡ ମଧ୍ୟରେ କେତେଥର ବନ୍ଦ ହୁଏ। ଯେମିତି ପାରାଦୀପ ବତିଘର ଫ୍ଲାସ ୩୦ ସେକେଣ୍ଡ ମଧ୍ୟରେ ୩ ଥର ବନ୍ଦ ହୁଏ। ସେତେବେଳେ କୌଣସି ପଣ୍ୟବାହୀ ଜାହାଜରେ ଆଜି ଭଳି ଜିପିଏସ(ଗ୍ଲୋବାଲ ପୋଜିଶନିଂ ସିଷ୍ଟମ) ନ ଥିଲା। ସେଥିପାଇଁ ଅଧିକ ବତୀଘର ଆବଶ୍ୟକତା ହେଉଥିଲା।ଏବେ ପ୍ରତ୍ୟେକ ଜାହାଜରେ ଆଧୁନିକ ବୈଷୟିକ ପ୍ରଣାଳି ବ୍ୟବହାର ହେଲାଣି। ତଥାପି ବତିଘର ଏଥିପାଇଁ ବ୍ୟବହାର କରାଯାଉଛି ଯେତେବେଳେ ଟେକ୍ନୋଲୋଜି ଫେଲ ରହିବ ସେତେବେଳେ ଏହା କାମରେ ଆସିବ। ବତିଘରକୁ କଳା ଧଳା ରଙ୍ଗ କରାଯାଇଥାଏ।ସେଥିରେ ମଧ୍ୟ ପ୍ରତ୍ୟେକ ରଙ୍ଗର ବ୍ୟବଧାନ ପ୍ରତି ବତିଘର ପାଇଁ ଅଲଗା। ବତିଘର ଭାଷାରେ ଏହାକୁ ବ୍ୟାଣ୍ଡ କୁହାଯାଇଛି। ଏବେ ଏହି ବତୀଘର ଐତିହ୍ୟ ଆସନ୍ତା ୧୭ ତାରିଖରୁ ନୂଆ ପରିଚୟ ପାଇବାକୁ ଯାଉଛି।
