ଭୁବନେଶ୍ୱର,୨୫ା୮(ରବିନାରାୟଣ ଜେନା): ବରିଷ୍ଠ ପ୍ରଶାସନିକ ଅଧିକାରୀ ପଦରୁ ସ୍ବେଚ୍ଛାକୃତ ଅବସର ନେଇଥିବା ସୁଜାତା କାର୍ତ୍ତିକେୟନ ରାଉତ ରାଜ୍ୟର ପ୍ରମୁଖ ବିରୋଧୀ ଦଳ ବିଜେଡିର ମଙ୍ଗ ଧରିବା ନେଇ ଚର୍ଚ୍ଚା ଲାଗି ରହିଛି। ରବିବାର ସୁଜାତାଙ୍କ ଏକ ଭିଡିଓ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହେବା ଏହି ଚର୍ଚ୍ଚାକୁ ଖୋରାକ ଯୋଗାଇଛି। ବିଜେଡି ସୁପ୍ରିମୋ ନବୀନ ପଟ୍ଟନାୟକ ଅସୁସ୍ଥ ହେବା ପରେ ତାଙ୍କୁ ଦଳୀୟ ନେତା, ଭାଜପାର ବରିଷ୍ଠ ନେତୃବୃନ୍ଦ ଓ ମନ୍ତ୍ରୀଙ୍କ ସାକ୍ଷାତ ପରେ ଏବେ ବିଜେଡିରେ ନେତୃତ୍ୱ ତଥା ଉତ୍ତରାଧିକାରୀ କଥା ସାମ୍ନାକୁ ଆସିଛି। କେତେକ ସାମାଜିକ ଗଣମାଧ୍ୟମରେ ଏଭଳି ଚର୍ଚ୍ଚା ମଧ୍ୟ ହେଲାଣି, ସୁଜାତା ଖୁବ୍ଶୀଘ୍ର ଦଳର ନେତୃତ୍ୱ ନେବେ। ତେବେ କଥାଟା ଯେତିକି ଗୁରୁତ୍ୱ ରଖୁଛି ତାକୁ ବଳ ଯୋଗାଇଛି ବିଜେଡିର ବୈଠକ।
ବିଜେଡି ବୈଠକରେ ସୁଜାତାଙ୍କ ଉପସ୍ଥିତି ଯେମିତି ସବୁ କିଛି ବୟାନ କରୁଛି। କିଛିମାସ ପୂର୍ବରୁ ସୁଜାତା ଆଇଏଏସ୍ ପଦରୁ ଅବ୍ୟାହତି ନେବା ରାଜ୍ୟବାସୀଙ୍କୁ ଯେତିକି ଆଶ୍ଚର୍ଯ୍ୟ ଚକିତ କରିଥିଲା ଏବେ ତାଙ୍କର ବୈଠକରେ ଉପସ୍ଥିତ ରହିବା ତାକୁ ଅଧିକ ରଞ୍ଜିତ କରୁଛି। ସାମାଜିକ ଗଣମାଧ୍ୟମରେ ଯେଉଁ ଭିଡିଓ ଘୂରି ବୁଲୁଛି ତାହା ନ କହିଲେ ବି ସବୁ ବୁଝାଇ ଦେଉଛି। ତେବେ ଭିଡିଓରେ ବିଜେଡିର ବରିଷ୍ଠ ନେତା ତଥା ଉପସଭାପତି ଦେବୀ ପ୍ରସାଦ ମିଶ୍ର, ବରିଷ୍ଠ ନେତା ସଞ୍ଜୟ ଦାସବର୍ମା, ପ୍ରଣବ ପ୍ରକାଶ ଦାସ ଓ ଅତନୁ ସବ୍ୟସାଚୀ ନାୟକ ପ୍ରମୁଖ ଉପସ୍ଥିତ ରହିଛନ୍ତି। ବୈଠକରେ କ’ଣ ସବୁ ଆଲୋଚନା ହୋଇଛି ତାହା ସ୍ପଷ୍ଟ ଜଣାପଡୁ ନ ଥିଲେ ହେଁ ଆଗାମୀ ଦିନରେ ଦଳରେ କିଛି ନୂଆ ସମୀକରଣ ହେବାକୁ ଯାଉଥିବା ସଙ୍କେତ ଦେବା ସହ କିଛି ଗୁପ୍ତ ମନ୍ତ୍ରଣା ଚାଲିଥିବା ଜୋର୍ଦାର୍ ଚର୍ଚ୍ଚା ହେଉଛି। ତେବେ ବିରୋଧୀ ଦଳ ପକ୍ଷରୁ ଚର୍ଚ୍ଚାକୁ ଖଣ୍ଡନ କରାଯାଇ ନାହିଁ କିମ୍ବା କୌଣସି ପ୍ରକାର ସ୍ପଷ୍ଟୀକରଣ ମଧ୍ୟ ଦିଆଯାଇନାହିଁ।
ଉଲ୍ଲେଖଯୋଗ୍ୟ, ପୂର୍ବରୁ ବିଜେଡିରେ ନେତୃତ୍ୱ ପରିବର୍ତ୍ତନ ନେଇ ଯେତେବେଳେ ଚର୍ଚ୍ଚା ଜୋର ଧରିଛି, ସେତେବେଳେ ସଭାପତି ନବୀନ ତାକୁ ହାଲୁକା ଢଙ୍ଗରେ ନେଇଛନ୍ତି। ଭବିଷ୍ୟତରେ ଦଳର ମଙ୍ଗ କିଏ ଧରିବ ତାହା ରାଜ୍ୟବାସୀ ନିଷ୍ପତ୍ତି ନେବେ ବୋଲି ନବୀନ କହି ଆସୁଥିବାରୁ ଆଗାମୀ ଦିନରେ ବିଜେଡି ରାଜନୀତି କେଉଁ ଆଡ଼କୁ ଯାଉଛି ତାହା ଉପରେ ସମସ୍ତଙ୍କ ନଜର ରହିଛି।
