ପାଟନା,୧୫ା୧୦: ମୁଙ୍ଗର ଜିଲାରେ ଜେଡିୟୁ ପ୍ରାର୍ଥୀଙ୍କ ସମର୍ଥନରେ ସାଧାରଣ ସଭାକୁ ଆସିଥିବା ସିଏମ୍ ନୀତୀଶ କୁମାରଙ୍କ ହେଲିକପ୍ଟର ଅବତରଣ ସମୟରେ ହଠାତ୍ ଏକ ଅଘଟଣ ଘଟିଛି। ହେଲିକପ୍ଟର ଅବତରଣ ସମୟରେ ଖୁବ୍ ଜୋର୍ରେ ପବନ ହୋଇଥିଲା। ଫଳରେ ସେଠାରେ ନିର୍ମିତ ସଭାମଞ୍ଚକୁ ଉଡ଼ାଇ ନେଇଥିଲା। ଘଟଣାସ୍ଥଳରେ ଉପସ୍ଥିତ ଥିବା ସୁରକ୍ଷା କର୍ମୀମାନେ ପରିସ୍ଥିତିକୁ ନିୟନ୍ତ୍ରଣ କରିବାରେ ସଫଳ ହୋଇଥିଲେ।
ଚଳିତବର୍ଷ ବିହାର ନିର୍ବାଚନ ପାଇଁ ମୁଖ୍ୟମନ୍ତ୍ରୀ ନୀତୀଶ କୁମାର ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି। ବୁଧବାର ସିଏମ୍ ମୁଙ୍ଗର ଜିଲାର ତାରାପୁର ବିଧାନସଭା ଆସନରୁ ଜେଡିୟୁ ପ୍ରାର୍ଥୀ ମେଭାଲାଲ ଚୌଧାରୀଙ୍କ ସପକ୍ଷରେ ରାଲି କରିବା ପାଇଁ ଯାଇଥିଲେ। ସିଏମ୍ ହେଲିକପ୍ଟର ଠିକ୍ ସମୟରେ ସମାବେଶ ସ୍ଥଳରେ ଆର୍ଏସକେ ହାଇସ୍କୁଲ ପଡ଼ିଆରେ ପହଞ୍ଚିଥିଲା। ଯେତେବେଳେ ହେଲିକପ୍ଟରଟି ସଭାସ୍ଥଳ ନିକଟରେ ଅବତରଣ କଲା, ହେଲିକପ୍ଟର ପଙ୍ଖା ପବନରେ ସଭାମଞ୍ଚଟି ଉଡ଼ିଗଲା।
ନୀତୀଶଙ୍କ ସଭାରେ ଯୋଗ ଦେଇଥିବା ଦୀପକ କୁମାର କହିଛନ୍ତି ଯେ, ସେ ସୌଭାଗ୍ୟବଶତଃ ବଞ୍ଚିଯାଇଛନ୍ତି। ଏଥି ସହିତ ମଞ୍ଚଟି ଠିକ ଭାବରେ ବନ୍ଧା ହୋଇ ନ ଥିବା କୁହାଯାଉଛି। ତେଣୁ ପ୍ରବଳ ପବନ ହେତୁ ଏହା ଉଡ଼ିଗଲା।
