ଲାଞ୍ଜିଗଡ଼,୧।୭(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ବେନଗାଁ ପଞ୍ଚାୟତରେ ୫ ମାସରୁ ଊଦ୍ଧ୍ୱର୍ର୍ ହେଲା ବାର୍ଦ୍ଧକ୍ୟ, ବିଧବା ଓ ଦିବ୍ୟାଙ୍ଗଙ୍କୁ ଭତ୍ତା ମିଳିନାହିଁ। ଏହାର ପ୍ରତିବାଦରେ ଗତ ୫ ଦିନ ହେଲା ପଞ୍ଚାୟତ ଅଫିସରେ ହିତାଧିକାରୀମାନେ ତାଲା ପକାଇଛନ୍ତିି। ପୂର୍ବରୁ ବୃଦ୍ଧାମାନଙ୍କୁ ନିୟମିତ ଭାବେ ଭତ୍ତା ଟଙ୍କା ପ୍ରତେକ ମାସରେ ପଞ୍ଚାୟତ କାର୍ଯ୍ୟାଳୟରେ ମିଳୁଥିଲା। ସରକାରଙ୍କ ନୂତନ ଗାଇଡ଼ ଲାଇନ ଅନୁସାରେ ଭତ୍ତା ଟଙ୍କା ନିଜ ନାମରେ ଥିବା ବ୍ୟାଙ୍କ ଖାତାରେ ଜମା ହେଉଛି। କିନ୍ତୁ ଏବେବି ଅନେକ ଲୋକଙ୍କ ବ୍ୟାଙ୍କ ଖାତାରେ ଭତ୍ତା ଟଙ୍କା ଜମା ହେଉନାହିଁ। ଫଳରେ ଶତାଧିକ ବୃଦ୍ଧବୃଦ୍ଧା ଭତ୍ତା ଟଙ୍କା ଅପେକ୍ଷାରେ ଚାହିଁ ବସିଛନ୍ତି। ବୃଦ୍ଧବୃଦ୍ଧାମାନେ ଏକତ୍ରିତ ହୋଇ ସୋମବାର ପଞ୍ଚାୟତ ନିର୍ବାହୀ ଅଧିକାରୀ ଯଦୁମଣି ନାଏକଙ୍କୁ ପଞ୍ଚାୟତ କାର୍ଯ୍ୟାଳୟରେ ଭତ୍ତା ଟଙ୍କା ସମ୍ପର୍କରେ ପଚାରିଥିଲେ। ଏଥିରେ ନିର୍ବାହୀ ଅଧିକାରୀ ନାଏକ ଉତ୍ତ୍ୟକ୍ତ ହୋଇ ବୃଦ୍ଧାମାନଙ୍କୁ ଦୁର୍ବ୍ୟବହାର କରୁଥିବା ହିତାଧିକାରୀମାନେ ଅଭିଯୋଗ ଆଣିଥିଲେ। ଏହାକୁ ନେଇ ଶତାଧିକ ହିତାଧିକାରୀ ପଞ୍ଚାୟତ କାର୍ଯ୍ୟାଳୟ ଘେରାଉ କରି ପଞ୍ଚାୟତ କାର୍ଯ୍ୟାଳୟ ତାଲା ପକାଇ ପ୍ରତିବାଦ କରିଥିଲେ। ଯେତେଦିନ ପର୍ଯ୍ୟନ୍ତ ବାକି ଥିବା ଭତ୍ତା ଟଙ୍କା ଦିଆ ନ ଯାଇଛି ସେତେ ଦିନ ପର୍ଯ୍ୟନ୍ତ ପଞ୍ଚାୟତ କାର୍ଯ୍ୟାଳୟ ବନ୍ଦ ରଖିବୁ ବୋଲି ଚେତାବନୀ ଦେଇଥିଲେ। ପଞ୍ଚାୟତ ଅଞ୍ଚଳରେ ୨୯ଟି ଗ୍ରାମ ରହିଥିବା ବେଳେ ଏହି ଗ୍ରାମରେ ଭତ୍ତା ପାଇଁ ପ୍ରାୟ ୫୫୦ ୁ ଅଧିକ ହିତାଧିକାରୀଙ୍କୁ ଚିହ୍ନଟ କରାଯାଇଛି। ଏମାନଙ୍କ ମଧ୍ୟରୁ ବହୁ ସଂଖ୍ୟକ ହିତାଧିକାରୀ ଆଜକୁ ୫ ମାସରୁ ଅଧିକ ହେଲା ଭତ୍ତା ପାଇ ନ ଥିବା ବେଳେ ପ୍ରାୟ ୧୦୦ ଜଣ ୬ ମାସ ଲେଖାଏଁ ହେଲା ନିଜ ଭତ୍ତା ପାଇବାରୁ ବଞ୍ଚତ୍ତ ଅଛନ୍ତି। ସେମାନେ ପଞ୍ଚାୟତକୁ ଦୌଡ଼ି ଦୌଡ଼ି ନୟାନ୍ତ ହେଲେଣି କିନ୍ତୁ ତାଙ୍କ ଗୁହାରୀ ଶୁଣିବାକୁ କେହି ନାହାନ୍ତି। ସରକାରଙ୍କ ନୁଆଁ ଗାଇଡ଼ ଲାଇନ ଅନୁସାରେ ପ୍ରତ୍ୟେକ ବୃଦ୍ଧାଙ୍କୁ ଯୋଗ୍ୟତା ଅନୁସାରେ ପ୍ରତ୍ୟେକ ମାସରେ ଭତ୍ତା ଟଙ୍କା ପ୍ରଦାନ କରାଯାଇଥାଏ। ସୂଚନାନୁସାରେ ବୁଧବାର ଲାଞ୍ଜିଗଡ ଜିପିଓ ସରୋଜ ପ୍ରଧାନ ବେନଗାଁ ପଞ୍ଚାୟତକୁ ଯାଇ ତଦାରଖ କରିଥିଲେ ଏବଂ ବୃଦ୍ଧବୃଦ୍ଧାମାନକୁ ବୁଝାଇବା ପରେ ବି କିଛି ସମାଧାନ ହେଇପାରି ନାହିଁ। ଶେଷରେ ନିର୍ବାହୀ ଅଧିକାରୀ ଯଦୁମଣି ନାଏକ ମଧ୍ୟ ବୃଦ୍ଧବୃଦ୍ଧାଙ୍କୁ ନେହୁରା ହୋଇ ମତେ କ୍ଷମା କର ଆଗକୁ ଆଉ ଏମିତି ଭୁଲ କରିବି ନାଇଁ ବୋଲି ଚୁକ୍ତି ନାମାପତ୍ର ଲେଖିଲା ପରେ ମଧ୍ୟ କୌଣସି ସମାଧାନ ହୋଇନାହିଁ। ଏ ନେଇ ଜିପିଇଓ ପ୍ରଧାନଙ୍କୁ ପଚାରିବାରୁ ଭତ୍ତା ଦାୟିତ୍ୱରେ ଥିବା ବିଏସଏସଓ ଅରବିନ୍ଦ ମହାପାତ୍ର ଛୁଟିରେ ଅଛନ୍ତି। ସେ ଶନିବାର ପଞ୍ଚାୟତକୁ ଆସି ତଦାରଖ କରିବା ପରେ ବକେୟା ଭତ୍ତା ଟଙ୍କା ଦିଆଯିବ ବୋଲି କହିଥିଲେ। ହିତାଧିକାରୀମାନଙ୍କ ବାକିଥିବା ଭତ୍ତା ଟଙ୍କା ଦେବା ପାଇଁ ତୁରନ୍ତ ବ୍ଲକ ଓ ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି।
