ମୁମ୍ବାଇ: ସାପୁରଜୀ ପାଲୋନଜୀ ଗ୍ରୁପ୍ର ଦାୟିତ୍ୱ ସମ୍ଭାଳୁଥିବା ବିଲିୟନେୟାର ସାଇରସ୍ ମିସ୍ତ୍ରିଙ୍କ ଝିଅଙ୍କ ସହ ବ୍ୟାଙ୍କ ଠକେଇ ମାମଲା ସାମ୍ନାକୁ ଆସିଛି। କେହି ଅଜଣା ବ୍ୟକ୍ତି ସାଇରସ୍ଙ୍କ ଝିଅ ଲୈଲା ରୁସ୍ତମ ଜାହାଙ୍ଗୀରଙ୍କ ଆକାଉଣ୍ଟରୁ ୯୦ ହଜାର ଟଙ୍କା ଉଠାଇ ନେଇଛି। ଏ ନେଇ କୋଲାବା ପୋଲିସ ଷ୍ଟେଶନରେ ଏକ ସାଇବର ଠକେଇ ମାମଲା ରୁଜୁ କରାଯାଇଛି। ମାମଲା ସମ୍ପର୍କରେ ଜଣେ ପୋଲିସ ଅଧିକାରୀ କହିଛନ୍ତି ଯେ, ଲୈଲା ବର୍ତ୍ତମାନ ଦୁବାଇରେ ରହୁଛନ୍ତି। ଆକାଉଣ୍ଟ ପରିଚାଳନା ତାଙ୍କ ବାପାଙ୍କ ଅଧୀନରେ ରହିଛି। ୨୦୧୮ରେ ସାଇରସ୍ ମିସ୍ତ୍ରି ତାଙ୍କ କମ୍ପାନୀରେ ନିର୍ଦ୍ଦେଶକ ଭାବେ କାର୍ଯ୍ୟରତ ଫିରୋଜ ଭଟେନାଙ୍କୁ ଏହି ବ୍ୟାଙ୍କ ଖାତାର ପରିଚାଳନା ଏବଂ ଆର୍ଥତ୍କ ଗତିବିଧି ଦେଖାଶୁଣା କରିବାକୁ ଦାୟିତ୍ୱ ଦେଇଥିଲେ। ଭଟେନା ଏହି କାମକୁ ଡେପୁଟି ଜେନେରାଲ ମ୍ୟାନେଜର ଜୟେଶ ମର୍ଚ୍ଚାଣ୍ଟ ଦେଖିବାକୁ କହିଥିଲେ। ନିକଟରେ ଏହି ଆକାଉଣ୍ଟରୁ ଟଙ୍କା ଉଠିବା ନେଇ ଏକ ମେସେଜ ମର୍ଚ୍ଚାଣ୍ଟଙ୍କ ନିକଟକୁ ଆସିଥିଲା। ନେଣଦେଣ ଆଲର୍ଟ ଲାଗି ମର୍ଚ୍ଚାଣ୍ଟଙ୍କ ନମ୍ବର ବ୍ୟାଙ୍କରେ ଦିଆଯାଇଥିଲା। ଖାତାଟି ବହୁ ପୁରୁଣା ହୋଇଥିବା ବେଳେ କେବଳ ଚେକ୍ ଦ୍ୱାରା ହିଁ ନେଣଦେଣ ହେଉଥିଲା। ଟଙ୍କା ଉଠାଣ ନେଇ ମର୍ଚ୍ଚାଣ୍ଟ ବ୍ୟାଙ୍କରେ ପଚରାଉଚୁରା କରିବାରୁ ଡେବିଟ କାର୍ଡ ବ୍ୟବହାର ଦ୍ୱାରା ପ୍ରାୟ ୯୦ ହଜାର ଟଙ୍କା ଉଠାଣ ହୋଇଥିବା ଜଣାପଡିଥିଲା। ଏହି ମାମଲା ଉପରେ ପୋଲିସ ବର୍ତ୍ତମାନ ତଦନ୍ତ ଚଳାଉଛି।
