ହାଇଦ୍ରାବାଦ,୫।୨ : ଭାରତ ବିରୋଧରେ ପାକିସ୍ତାନର ବଡ ଆତଙ୍କବାଦୀ ଷଡଯନ୍ତ୍ରର ପର୍ଦ୍ଦାଫାଶ ହୋଇଛି। ହାଇଦ୍ରାବାଦରେ ଲୋନ ଓଲ୍ଫ ଆଟାକ୍ ପାଇଁ ପ୍ରସ୍ତୁତି ଚାଲିଥିଲା। ହାଇଦ୍ରାବାଦରୁ ଗିରଫ ହୋଇଥିବା ଆତଙ୍କବାଦୀଙ୍କୁ ପଚରାଉଚରା ବେଳେ ଏହା ଜଣା ପଡ଼ିଛି। ଆଇଏସଆଇ ଏବଂ ଲଶ୍କର-ଇ-ତୋଏବା ଲିଙ୍କ ମଧ୍ୟ ସାମ୍ନାକୁ ଆସିଛି। ଗିରଫ ଆତଙ୍କବାଦୀ ଅବଦୁଲ ଜାହିଦ ପାକିସ୍ତାନରେ ବସିଥିବା ହ୍ୟାଣ୍ଡେଲରଙ୍କ ସହ ଯୋଗାଯୋଗରେ ଥିଲେ ଏବଂ ତାଙ୍କୁ ହ୍ୟାଣ୍ଡ ଗ୍ରେନେଡ ଯୋଗାଇ ଦିଆଯାଇଥିଲା।
ସୂଚନା ଅନୁଯାୟୀ, ସେ ହ୍ୟାଣ୍ଡେଲଙ୍କ ନିର୍ଦ୍ଦେଶରେ ଅନେକ ଲୋକଙ୍କୁ ମଧ୍ୟ ଆତଙ୍କବାଦୀ ସଂଗଠନରେ ନିଯୁକ୍ତି ଦେଇଥିଲେ। ଏକ ରାଲି କିମ୍ବା ସର୍ବସାଧାରଣ ସ୍ଥାନ ଉପରେ ଆକ୍ରମଣ କରିବାକୁ ଯୋଜନା ପ୍ରସ୍ତୁତ ହେଉଥିଲା। ପାକିସ୍ତାନର ନିର୍ଦ୍ଦେଶରେ ଏହି ସବୁ ଘଟୁଥିଲା। ଭାରତରେ ସାମ୍ପ୍ରଦାୟିକ ସମନ୍ବୟକୁ ଭଣ୍ଡୁର କରିବା ପାଇଁ ଏକ ଷଡଯନ୍ତ୍ର କରାଯାଇଥିଲା।
ଆତଙ୍କବାଦୀଙ୍କ ନିକଟରୁ ହ୍ୟାଣ୍ଡ ଗ୍ରେନେଡ, ନଗଦ ଟଙ୍କା ଏବଂ ଫୋନ ଉଦ୍ଧାର କରାଯାଇଛି । ଆତଙ୍କବାଦୀ ଜାହିଦଙ୍କ ଲୁଚି ରହିଥିବା ସ୍ଥାନରୁ ୨ ଟି ହ୍ୟାଣ୍ଡ ଗ୍ରେନେଡ, ପ୍ରାୟ ୪ ଲକ୍ଷ ଟଙ୍କା ଏବଂ ଦୁଇଟି ମୋବାଇଲ ଉଦ୍ଧାର କରାଯାଇଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ଆତ୍ମଘାତୀ ବୋମା ବିସ୍ଫୋରଣ ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ଜାହିଦଙ୍କୁ ୨୦୦୫ରେ ଗିରଫ କରାଯାଇଥିଲା, କିନ୍ତୁ ପ୍ରମାଣ ଅଭାବରୁ ୨୦୧୭ ରେ ମୁକ୍ତ କରାଯାଇଥିଲା।
ଏନଆଇଏ ଅନୁଯାୟୀ, ଜାହିଦ ତାଙ୍କ ଗ୍ୟାଙ୍ଗ ସଦସ୍ୟଙ୍କ ସହ ହାଇଦ୍ରାବାଦ ସହରରେ ବିସ୍ଫୋରଣ ଏବଂ ଲୋନ ଓ୍ବଲ୍ଫ ଆଟାକ୍ ଭଳି ଆତଙ୍କବାଦୀ କାର୍ଯ୍ୟକଳାପ କରିବାକୁ ଷଡଯନ୍ତ୍ର କରିଥିଲେ।
ଗତ ବର୍ଷ ଜାହିଦଙ୍କୁ ଗିରଫ କରାଯାଇଥିଲା।
ଏନଆଇଏ କହିଛି ଯେ ଏହା ମଧ୍ୟ ଜାଣିବାକୁ ମିଳିଛି ଯେ ଜାହିଦ ତାଙ୍କ ହ୍ୟାଣ୍ଡେଲରଙ୍କଠାରୁ ହ୍ୟାଣ୍ଡ ଗ୍ରେନେଡ ଗ୍ରହଣ କରିଛନ୍ତି ଏବଂ ସାମ୍ପ୍ରଦାୟିକ ଉତ୍ତେଜନା ସୃଷ୍ଟି କରିବା ପାଇଁ ସହରର ସାଧାରଣ ସଭା ତଥା ଶୋଭାଯାତ୍ରାରେ ସେମାନଙ୍କୁ ଫୋପାଡିବାକୁ ଯୋଜନା କରୁଛନ୍ତି। ସୂଚନାଯୋଗ୍ୟ, ୨ ଅକ୍ଟୋବର ୨୦୨୨ ରେ ହାଇଦ୍ରାବାଦ ପୋଲିସ ଅବଦୁଲ ଜାହିଦ, ମହମ୍ମଦ ସାମିଉଦ୍ଦିନ ଏବଂ ମେଜ ହାସନ ଫାରୁକଙ୍କୁ ସାଧାରଣ ସଭାରେ ଗ୍ରେନେଡ ଫିଙ୍ଗିବା ଷଡଯନ୍ତ୍ରରେ ଗିରଫ କରିଥିଲା।
