Categories: Home Leftଖେଳ

୨ ବର୍ଷ ପରେ ଟେଷ୍ଟ ସିରିଜ ଜିତିଲା ପାକିସ୍ତାନ: ତଥାପି ତାଲିକାରେ ବଦଳିଲାନି ଭାଗ୍ୟ, ରହିଲା ଶେଷରେ…

ନୂଆଦିଲ୍ଲୀ, ୨୦।୧୧: ପାକିସ୍ତାନ କ୍ରିକେଟ ଟିମ ପାଇଁ ଶୁକ୍ରବାର ଦିନଟି ଭଲ ରହିଛି। ପ୍ରାୟ ଦୁଇ ବର୍ଷ ପରେ ଦଳ ଏକ ଟେଷ୍ଟ ସିରିଜ ଜିତିବାରେ ସଫଳ ହୋଇଛି। ଦଳର ଅଧିନାୟକ ବାବର ଆଜମଙ୍କ ବ୍ୟାଟରୁ ବଡ଼ ଇନିଂସ ଦେଖିବାକୁ ମିଳିନଥିଲେ ମଧ୍ୟ ପାକିସ୍ତାନ ଦୁଇ ଟେଷ୍ଟ ମ୍ୟାଚ ବିଶିଷ୍ଟ ସିରିଜରେ ଶ୍ରୀଲଙ୍କାକୁ ୧-୦ରେ ପରାସ୍ତ କରିଛି। ସିରିଜର ପ୍ରଥମ ମ୍ୟାଚ ଡ୍ର’ ରହିଥିଲା। ତେବେ ଏହି ବିଜୟ ପରେ ମଧ୍ୟ ପାକିସ୍ତାନକୁ ବିଶ୍ୱ ଟେଷ୍ଟ ଚାମ୍ପିୟନଶିପ (WTC) ପଏଣ୍ଟ ଟେବୁଲରେ ବିଶେଷ ଫାଇଦା ମିଳିନାହିଁ। ଦଳ ଏବେ ବି ତାଲିକାର ଶେଷ ସ୍ଥାନରେ ରହିଛି। ଅନ୍ୟପଟେ ଏହି ପରାଜୟ ଯୋଗୁ ଶ୍ରୀଲଙ୍କାର ପଏଣ୍ଟ ପ୍ରତିଶତ କିଛିଟା ହ୍ରାସ ପାଇଛି।

ଶ୍ରୀଲଙ୍କା ବିପକ୍ଷ ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜ୍ର ଦ୍ୱିତୀୟ ମ୍ୟାଚକୁ ପାକିସ୍ତାନ ୮ ଉଇକେଟ୍‌ରେ ଜିତି ନେଇଛି। ଏହା ସହ ସିରିଜ ମଧ୍ୟ ପାକିସ୍ତାନ ନାମରେ ହୋଇଛି। ମ୍ୟାଚର ପ୍ରଥମ ଇନିଂସରେ ଶ୍ରୀଲଙ୍କା ଦଳ ମାତ୍ର ୯୮ ରନରେ ଅଲଆଉଟ ହୋଇଯାଇଥିଲା। ଏହାର ଜବାବରେ ପାକିସ୍ତାନ ନିଜ ପ୍ରଥମ ଇନିଂସରେ ୩୨୫ ରନର ବଡ଼ ସ୍କୋର କରିଥିଲା।

ଦ୍ୱିତୀୟ ଇନିଂସରେ ମଧ୍ୟ ଶ୍ରୀଲଙ୍କା ଦଳ ବିଶେଷ କିଛି କରିପାରିନଥିଲା। ଦଳ ୩୧୬ ରନରେ ଅଲଆଉଟ ହୋଇଥିଲା। ଫଳରେ ପାକିସ୍ତାନ ସାମ୍ନାରେ ଶେଷ ଇନିଂସରେ ମାତ୍ର ୯୦ ରନର ବିଜୟ ଲକ୍ଷ୍ୟ ରହିଥିଲା। ପାକିସ୍ତାନ ମାତ୍ର ୨ଟି ଉଇକେଟ୍‌ ହରାଇ ଏହି ଲକ୍ଷ୍ୟ ହାସଲ କରିନେଇଥିଲା।

ଟେଷ୍ଟ କ୍ରିକେଟରେ ପାକିସ୍ତାନ ପୁଣିଥରେ ବାବର ଆଜମଙ୍କୁ ଅଧିନାୟକ ଦାୟିତ୍ୱ ଦେଇଛି। କିନ୍ତୁ ଏହି ସିରିଜରେ ତାଙ୍କ ବ୍ୟାଟରୁ ଆଶାନୁରୂପ ପ୍ରଦର୍ଶନ ଦେଖିବାକୁ ମିଳିନାହିଁ। ଦ୍ୱିତୀୟ ଟେଷ୍ଟର ପ୍ରଥମ ଇନିଂସ୍ରେ ସେ ମାତ୍ର ୮ ରନ କରିଥିଲେ। ଦ୍ୱିତୀୟ ଇନିଂସ୍ରେ ତାଙ୍କୁ ବ୍ୟାଟିଂ କରିବାର ସୁଯୋଗ ମିଳିନଥିଲା।

ପ୍ରଥମ ଇନିଂସରେ ସେ ତିନି ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ଦ୍ୱିତୀୟ ଇନିଂସରେ ପାକିସ୍ତାନର ଦୁଇଟି ଉଇକେଟ୍‌ ପଡ଼ିଥିଲେ ମଧ୍ୟ ସେ ବ୍ୟାଟିଂ ପାଇଁ ଆସିନଥିଲେ। ସିରିଜର ପ୍ରଥମ ଟେଷ୍ଟର ପ୍ରଥମ ଇନିଂସରେ ସେ ୫୦ ରନ କରିଥିବା ବେଳେ ଦ୍ୱିତୀୟ ଇନିଂସରେ ୩୪ ରନ କରି ଆଉଟ ହୋଇଥିଲେ। ଅର୍ଥାତ୍‌ ଦୁଇଟି ଟେଷ୍ଟରେ ବାବର ଆଜମ ମାତ୍ର ଗୋଟିଏ ଅର୍ଦ୍ଧଶତକ ହାସଲ କରିପାରିଛନ୍ତି।

ଉଲ୍ଲେଖଯୋଗ୍ୟ ଯେ, ପାକିସ୍ତାନ ପ୍ରାୟ ଦୁଇ ବର୍ଷ ପରେ କୌଣସି ଟେଷ୍ଟ ସିରିଜ ଜିତିବାରେ ସଫଳ ହୋଇଛି। ଏହା ପୂର୍ବରୁ ୨୦୨୪ ଅକ୍ଟୋବରରେ ନିଜ ମାଟିରେ ଇଂଲଣ୍ଡ ବିପକ୍ଷରେ ଟେଷ୍ଟ ସିରିଜ ଜିତିଥିଲା ଦଳ। ଏହା ପରେ ଦଳର ପରାଜୟ ଧାରା ଆରମ୍ଭ ହୋଇଥିଲା, ଯାହା ଏବେ ଯାଇ ଶେଷ ହୋଇଛି।

ତେବେ ଏହି ବିଜୟ ପରେ ମଧ୍ୟ ପାକିସ୍ତାନକୁ ବିଶ୍ୱ ଟେଷ୍ଟ ଚାମ୍ପିୟନଶିପ୍ର ପଏଣ୍ଟ ଟେବୁଲରେ ବିଶେଷ ଫାଇଦା ମିଳିନାହିଁ। ଏହି ମ୍ୟାଚ ପୂର୍ବରୁ ପାକିସ୍ତାନର ପଏଣ୍ଟ ପ୍ରତିଶତ (PCT) ୩.୩୩ ଥିବା ବେଳେ ବିଜୟ ପରେ ଏହା ୧୨.୧୨କୁ ବୃଦ୍ଧି ପାଇଛି। ତଥାପି ଦଳ ନବମ ତଥା ଶେଷ ସ୍ଥାନରେ ରହିଛି।

ଅନ୍ୟପଟେ ଏହି ପରାଜୟ ଯୋଗୁ ଶ୍ରୀଲଙ୍କାର PCT ମଧ୍ୟ ହ୍ରାସ ପାଇଛି। ମ୍ୟାଚ ପୂର୍ବରୁ ଦଳର PCT ୧୫.୪୮ ଥିବା ବେଳେ ଏବେ ଏହା ୧୩.୫୪କୁ ଖସିଆସିଛି। ତଥାପି ଶ୍ରୀଲଙ୍କା ଅଷ୍ଟମ ସ୍ଥାନରେ ରହିଛି।
ଏହି ଦୁଇ ଦଳଙ୍କ ପାଇଁ ଚଳିତ WTC ଚକ୍ରର ଫାଇନାଲରେ ପହଞ୍ଚିବାର ଆଶା ଶେଷ ହୋଇଥିବା ରିପୋର୍ଟରେ କୁହାଯାଇଛି। ଅନ୍ୟପଟେ ଦକ୍ଷିଣ ଆଫ୍ରିକା ୭୫ PCT ସହ ପଏଣ୍ଟ ଟେବୁଲର ଶୀର୍ଷ ସ୍ଥାନରେ ରହିଛି।

 

Dharitri – Odisha’s No.1 Odia Daily

Share
Tags: PAKISTAN