ଇସଲାମାବାଦ,୨।୫: ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫଙ୍କ ପରେ ପାକିସ୍ତାନ ପିପୁଲ୍ସ ପାର୍ଟି (ପିପିପି) ଅଧ୍ୟକ୍ଷ ବିଲାୱାଲ ଭୁଟ୍ଟୋଙ୍କ ବୟାନ ସାମ୍ନାକୁ ଆସିଛି। ଆତଙ୍କବାଦ ଉପରେ ଖ୍ବାଜା ଆସିଫଙ୍କ ବୟାନକୁ ବିଲାୱଲ ଭୁଟ୍ଟୋ ନିଶ୍ଚିତ କରିଛନ୍ତି। ପହଲଗାମ ଆକ୍ରମଣ ପରେ ଖ୍ବାଜା ଆସିଫ ତାଙ୍କ ବୟାନରେ କହିଥିଲେ ଯେ ପାକିସ୍ତାନରେ ଆତଙ୍କବାଦୀମାନେ ବଢୁଛନ୍ତି।
ଏହା ପରେ ଏବେ ବିଲାୱାଲ ଭୁଟ୍ଟୋ କହିଛନ୍ତି, ଏହି ମାମଲାରେ ପାକିସ୍ତାନର ନିଜସ୍ବ ଅତୀତ ଅଛି। ପୂର୍ବତନ ବୈଦେଶିକ ମନ୍ତ୍ରୀ ସ୍ବୀକାର କରିଛନ୍ତି ଯେ ପାକିସ୍ତାନ ଆତଙ୍କବାଦୀ ଗୋଷ୍ଠୀଗୁଡ଼ିକୁ ସମର୍ଥନ କରିବାରେ ସାମିଲ ଅଛି।
ସ୍କାଏ ନ୍ୟୁଜର ୟାଲଦା ହାକିମଙ୍କ ସହିତ କଥାବାର୍ତ୍ତାରେ ଭୁଟ୍ଟୋ କହିଛନ୍ତି: ‘ପ୍ରତିରକ୍ଷା ମନ୍ତ୍ରୀ ଯେପର୍ଯ୍ୟନ୍ତ କହିଛନ୍ତି, ମୁଁ ଭାବୁନାହିଁ ଯେ ଏହା କୌଣସି ଗୁପ୍ତ କଥା ଯେ ପାକିସ୍ତାନର ଏକ ଅତୀତ ଅଛି ଏବଂ ଫଳସ୍ବରୂପ, ଆମେ ଦୁଃଖ ଭୋଗିଛୁ। ପାକିସ୍ତାନ ଦୁଃଖ ଭୋଗିଛି। ଆମେ ଉଗ୍ରବାଦର ଏକ ଲହରୀ ଦେଇ ଗତି କରିଛୁ। କିନ୍ତୁ ଆମେ ଯାହା ଦେଇ ଗତି କରିଛୁ ତାହାର ପରିଣାମ ସ୍ବରୂପ, ଆମେ ଆମର ଶିକ୍ଷା ମଧ୍ୟ ଶିଖିଛୁ। ଏହି ସମସ୍ୟାର ସମାଧାନ ପାଇଁ ଆମେ ଆଭ୍ୟନ୍ତରୀଣ ଉନ୍ନତି କରିଛୁ।’
ଭୁଟ୍ଟୋ ଆହୁରି କହିଥିଲେ, ‘ଯେପର୍ଯ୍ୟନ୍ତ ପାକିସ୍ତାନର ଇତିହାସର କଥା, ଏହା ଇତିହାସ ଏବଂ ଏହା ଏପରି କିଛି ନୁହେଁ ଯେଉଁଥିରେ ଆମେ ଆଜି ଭାଗ ନେଉଛୁ।’ ଏହା ଏବେ ସବୁ ଇତିହାସ ହୋଇଗଲାଣି, ଏବଂ ଆମେ ଆଉ ଏଥିରେ ଜଡିତ ନୁହଁ।
ଗୁରୁବାର ମୀରପୁର ଖାସରେ ଏକ ରାଲିକୁ ସମ୍ବୋଧିତ କରି ଭୁଟ୍ଟୋ ପୁଣି ଥରେ ଦାବି କରିଛନ୍ତି ଯେ ପାକିସ୍ତାନ ଶାନ୍ତି ଚାହୁଁଛି କିନ୍ତୁ ଭାରତ ଦ୍ୱାରା ଉସୁକାଇଲେ ଯୁଦ୍ଧ ପାଇଁ ପ୍ରସ୍ତୁତ।
