ଇସଲାମାବାଦ୍,୩୦।୪: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଏବେ ବି ଉତ୍ତେଜନା ରହିଛି। ଭାରତ ପାକିସ୍ତାନ ବିରୋଧରେ ଅନେକ କଠୋର ପଦକ୍ଷେପ ନେଇଛି। ଏହାର ଜବାବରେ, ପାକିସ୍ତାନ ଅନେକ ଥର ପରମାଣୁ ବୋମା ମାଡ଼ ଧମକ ଦେଇଛି। ଏବେ ପାକିସ୍ତାନର ପଞ୍ଜାବ ମୁଖ୍ୟମନ୍ତ୍ରୀ ମରିୟମ ନୱାଜ ମଧ୍ୟ ପରମାଣୁ ବୋମା ସମ୍ପର୍କରେ ଏକ ବୟାନ ଦେଇଛନ୍ତି।
ମରିୟମ ନୱାଜ କହିଛନ୍ତି, ଆଜି ଭାରତ-ପାକିସ୍ତାନ ସୀମାରେ ଉତ୍ତେଜନା ରହିଛି। ବିପଦ ମାଡ଼ି ଆସୁଛି, କିନ୍ତୁ ଚିନ୍ତା କରିବାର କୌଣସି ଆବଶ୍ୟକତା ନାହିଁ। କେହି ପାକିସ୍ତାନ ଉପରେ ଆକ୍ରମଣ କରିପାରିବେ ନାହିଁ।
ଆଲ୍ଲା ପାକିସ୍ତାନ ସେନାକୁ ଏତେ ଶକ୍ତି ଦେଇଛନ୍ତି ଯେ ଏହା ଶତ୍ରୁର ପ୍ରତ୍ୟେକ ଆକ୍ରମଣର ମୁକାବିଲା କରିପାରିବ। ଆଜି ପାକିସ୍ତାନର ଯେକୌଣସି ଶତ୍ରୁ ଆକ୍ରମଣ କରିବା ପୂର୍ବରୁ ଦଶ ଥର ଚିନ୍ତା କରିବ। ଏହାର କାରଣ ହେଉଛି, ଆଲ୍ଲାଙ୍କ କୃପାରୁ ପାକିସ୍ତାନ ପାଖରେ ପରମାଣୁ ବୋମା ଅଛି।
ମରିୟମ ନୱାଜ ତାଙ୍କ ପିତା ଏବଂ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ପ୍ରଶଂସା କରି କହିଛନ୍ତି, ନୱାଜ ସରିଫ ପାକିସ୍ତାନକୁ ପରମାଣୁ ଶକ୍ତିଶାଳୀ କରିବାରେ ଐତିହାସିକ ଭୂମିକା ଗ୍ରହଣ କରିଛନ୍ତି।
ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଥିଲା। ଏହା ପରେ ଭାରତ ପାକିସ୍ତାନ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରି ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ କରିଥିଲା। ଏହା ସହିତ ଆହୁରି କିଛି ନିଷ୍ପତ୍ତି ନିଆଯାଇଥିଲା। ଜବାବରେ, ପାକିସ୍ତାନ ମଧ୍ୟ ଭାରତ ପାଇଁ ତାର ଆକାଶପଥ ବନ୍ଦ କରିଦେଇଛି। ଏବେ ପାକିସ୍ତାନ ଭାରତକୁ ପରମାଣୁ ବୋମା ମାରିବାର ଧମକ ଦେଉଛି।
