ପ୍ରେମ ଶାଶ୍ୱତ, ପ୍ରେମ ଚିରନ୍ତନ। ପ୍ରେମ ଧନୀ କି ଗରିବ କିଛି ମାନେ ନାହିଁ। ବିଶ୍ୱାସ ସହିତ ସ୍ନେହ ଓ ଉଭୟ ଉଭୟଙ୍କୁ ଦେଇଥିବା ପ୍ରତିଶ୍ରୁତି ହିଁ ପ୍ରେମ ସମ୍ପର୍କ ଡୋରିକୁ ଅଧିକ ସୁଦୃଢ କରି ଥାଏ। ଏହାର ଜ୍ୱଳନ୍ତ ଉଦାହରଣ ନିକଟରେ ପାକିସ୍ତାନରେ ଦେଖିବାକୁ ମିଳିଛି। ଏଠାରେ ଜଣେ ମହିଳା ଡାକ୍ତର ସଫେଇ କର୍ମଚାରୀ ତଥା ଚା’ ବିକାଳୀଙ୍କୁ ପ୍ରେମ କରି ଶେଷରେ ବିବାହ କରିଛନ୍ତି। ଆଜିକାଲି ସୋସିଆଲ ମିଡିଆରେ ଏହି ଦମ୍ପତିଙ୍କ କାହାଣୀ ଭାଇରାଲ ହେବାରେ ଲାଗିଛି।
‘ମେରା ପାକିସ୍ତାନ’ ୟୁଟ୍ୟୁବ ଚ୍ୟାନେଲରେ ହରିଶ ଭଟ୍ଟୀ ଏହି ଦମ୍ପତିଙ୍କ ପ୍ରେମ କାହାଣୀ ବିଷୟରେ ଶେୟାର କରିଥିଲେ। ଏହି ଦମ୍ପତି ପାକିସ୍ତାନର ଓକରା ତହସିଲର ଦିପାଲପୁରର ବାସିନ୍ଦା।
ମହିଳା ଡାକ୍ତର କିଶ୍ୱର କହିଛନ୍ତି ଯେ, ସେ ଶେହଜାଦଙ୍କ ବ୍ୟକ୍ତିତ୍ୱ ଦ୍ୱାରା ପ୍ରଭାବିତ ହୋଇଥିଲେ। ତାଙ୍କୁ ଦେଖି ସେ ଅନୁଭବ କଲେ ନାହିଁ ଯେ ସେ ଜଣେ ସଫେଇ କର୍ମଚାରୀ କିମ୍ବା ଚା’ ବିକାଳୀ। ଶେହଜାଦଙ୍କ ସରଳତା ଦେଖି ସେ ତାଙ୍କୁ ହୃଦୟ ଦେଇ ବସିଥିଲେ। ସେ ଶେହଜାଦଙ୍କ ପ୍ରତି ଏତେ ଆକର୍ଷିତ ହୋଇପଡିଲେ ଯେ, ନିଜ ମାତାପିତାଙ୍କୁ ନ ଜଣାଇ ତାଙ୍କୁ ପ୍ରପୋଜ କରିଥିଲେ।
ଅନ୍ୟପକ୍ଷରେ, ତାଙ୍କ ପ୍ରେମ କାହାଣୀ ବିଷୟରେ ଶେହଜାଦ କହିଛନ୍ତି, ସେ ତିନିଜଣ ଡାକ୍ତରଙ୍କ ପାଖରେ କାର୍ଯ୍ୟ କରୁଥିଲେ। ସଫାସଫି କରିବା ସହ ଏବଂ ଚା’ ଦେବା ପାଇଁ ସେଠାକୁ ଯାଉଥିଲେ। ଏହି ସମୟରେ କିଶ୍ୱର ତାଙ୍କୁ ନମ୍ବର ମାଗିଥିଲେ ଏବଂ କହିଥିଲେ ଯଦି ଆବଶ୍ୟକ ହୁଏ ତେବେ ମୁଁ ତୁମକୁ ଡାକିବି। ଏହା ଶୁଣି ଶେହଜାଦ ତାଙ୍କ ନମ୍ବର ଦେଇଥିଲେ। ଏହା ପରେ ଉଭୟଙ୍କ ମଧ୍ୟ କଥା ଆଗକୁ ବଢିଥିଲା। ଥରେ କିଶ୍ୱର ତାଙ୍କ ପ୍ରପୋଜ କରିଥିଲେ, ଶେହଜାଦ ଏହାକୁ ବିଶ୍ୱାସ କରିପାରି ନ ଥିଲେ। ସେ ଭାବିଲେ ଡାକ୍ତର ସାହିବା ଥଟ୍ଟା କରୁଛନ୍ତି। ଏହା ଶୁଣି ତାଙ୍କୁ କିଛି ଦିନ ଜ୍ୱର ମଧ୍ୟ ହୋଇଗଲା। ତା’ପରେ ସେ କିଛି ଦିନ ପାଇଁ ଡାକ୍ତରଖାନା ମଧ୍ୟ ଯାଇ ନ ଥିଲେ। କିନ୍ତୁ ପରେ ସେ କିଶ୍ୱରଙ୍କୁ ଭେଟିବାକୁ ଆସିଥିଲେ। ଜଣେ ଡାକ୍ତର ହେବା ସତ୍ତ୍ୱେ ସେ ମୋତେ ପ୍ରପୋଜ କରିବା,ଭାଗ୍ୟର ବିଷୟ ବୋଲି ଭାବୁଥିଲେ ଶେହଜାଦ।
ବିବାହ ପରେ କିଶ୍ୱର ଚାକିରି ଛାଡି ଦେଇଥିଲେ। ଏହାର କାରଣ ଥିଲା ଯେ ତାଙ୍କ ସାଙ୍ଗମାନେ କିଶ୍ୱରଙ୍କୁ ଅପମାନିତ କରୁଥିଲେ। ଏବେ ସେ ଏକ କ୍ଲିନିକ ଖୋଲିବାକୁ ଯୋଜନା କରୁଛନ୍ତି।
