ଇସଲାମାବାଦ,୨୪।୪ : ପୂର୍ବତନ ପାକିସ୍ତାନୀ ସେନା ମୁଖ୍ୟ ଜେନେରାଲ କମର ଜାଭେଦ ବାଜୱାଙ୍କ ବିଷୟରେ ଜଣାଶୁଣା ଖବରଦାତା ହମିଦ ମିରଙ୍କ ଦ୍ୱାରା ରିପୋର୍ଟ ପ୍ରକାଶ ପାଇବା ପରେ ଦେଶରେ ରାଜନୈତିକ ଚର୍ଚ୍ଚା ଜାରି ରହିଛି। ଏକ ଭିଡିଓରେ ହମିଦ ମୀର ବାଜୱାଙ୍କ ବିରୋଧରେ କଶ୍ମୀର ବିକ୍ରି କରିଥିବା ଅଭିଯୋଗ ଆଣିଛନ୍ତି। ଏକ ଭିଡିଓରେ ମୀର କହୁଥିବାର ଶୁଣିବାକୁ ମିଳୁଛି ବାଜୱା କଶ୍ମୀର ନେଇ ଏକ ଡିଲ୍ କରିବା ସହିତ ଇଣ୍ଡୋ-ପାକ ଲାଇନ ଅଫ କଣ୍ଟ୍ରୋଲ (ଏଲଓସି) ରେ ଅସ୍ତ୍ରବିରତି ଉଲ୍ଲଂଘନ କରିଛନ୍ତି। କିନ୍ତୁ ଇମ୍ରାନଙ୍କ ସହ ଏହାର କୌଣସି ସମ୍ପର୍କ ନ ଥିଲା।
ଇମ୍ରାନ ଖାନ ଏପ୍ରିଲ ୨୦୨୨ ପର୍ଯ୍ୟନ୍ତ ପାକିସ୍ତାନର ପ୍ରଧାନମନ୍ତ୍ରୀ ଥିଲେ ଏବଂ ତାଙ୍କୁ କ୍ଷମତାରୁ ବହିଷ୍କାର କରାଯାଇଥିଲା। ବହିଷ୍କୃତ ହେବା ପରେ ଇମ୍ରାନ ବର୍ତ୍ତମାନର ସରକାରଙ୍କ ବିରୋଧରେ ବିଭିନ୍ନ ଅଭିଯୋଗ ଆଣିଥିଲେ ଏବଂ ତତ୍କାଳୀନ ପାକିସ୍ତାନୀ ସେନା ମୁଖ୍ୟ ଜେନେରାଲ କମର ଜାଭେଦ ବାଜୱାଙ୍କ ବିରୋଧରେ ମଧ୍ୟ ଏକ ମୋର୍ଚ୍ଚା ଖୋଲିଥିଲେ। ଇମ୍ରାନ କହିଛନ୍ତି, ତାଙ୍କ ସହ ଯାହା ଘଟିଲା, ତାହା ବାଜୱା କରିଛନ୍ତି। ଏଥି ସହିତ, ବର୍ତ୍ତମାନ ହମିଦ ମୀର ବାଜୱାଙ୍କ ବିଷୟରେ ଦେଇଥିବା ବିବୃତ୍ତି ପରେ ଇମ୍ରାନ ଖାନଙ୍କ ସମର୍ଥକମାନେ ପୁଣି ଥରେ ବାଜୱାଙ୍କ ବିରୋଧରେ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରିଛନ୍ତି।
ହମିଦ ମୀରଙ୍କ କହିବାନୁସାରେ, ସେନାଙ୍କ ସାମର୍ଥ୍ୟ ସମ୍ପର୍କରେ ବାଜୱାଙ୍କ ପକ୍ଷରୁ ଅନେକ ଦାବି କରାଯାଇଥିଲା। ବାଜୱା ବିଶ୍ୱାସ କରୁଥିଲେ ଯେ ପାକିସ୍ତାନୀ ସେନାର ପାରମ୍ପରିକ ଯୁଦ୍ଧ ପାଇଁ ଶକ୍ତି ନାହିଁ। ସେମାନଙ୍କର ଭାରି ଅସ୍ତ୍ରର ଅଭାବ ରହିଛି। ଏକ ଭାଇରାଲ ଭିଡିଓରେ ହମିଦ କହିଥିବାର ଶୁଣିବାକୁ ମିଳୁଛି, ଜେନେରାଲ ବାଜୱା ୨୫ ଗଣମାଧ୍ୟମକୁ କହିଛନ୍ତି, ପାକିସ୍ତାନୀ ସେନାର ଟ୍ୟାଙ୍କ କାମ କରୁନାହିଁ। ଡିଜେଲ ମହଜୁଦ ରଖିବା ପାଇଁ ସେନା ପାଖରେ ପର୍ଯ୍ୟାପ୍ତ ଅର୍ଥ ନାହିଁ ।
ଯଦି ହମିଦଙ୍କୁ ବିଶ୍ୱାସ କରାଯାଏ, ତେବେ ବାଜୱା ଗଣମାଧ୍ୟମ ଆଗରେ ସ୍ବୀକାର କରିଥିଲେ, ପାକିସ୍ତାନର ସେନା ଯୁଦ୍ଧ ପାଇଁ ଯୋଗ୍ୟ ନୁହେଁ। ବାଜୱାଙ୍କ ସମସ୍ୟା ବଢ଼ାଇଥିବା ହମିଦଙ୍କ ଏହି ତଥ୍ୟକୂ ନେଇ ବର୍ତ୍ତମାନ କେବଳ ପାକିସ୍ତାନ ନୁହେଁ ଭାରତରେ ମଧ୍ୟ ଆଲୋଚନା ହେଉଛି। ଅନେକ ଲୋକ ସୋସିଆଲ ମିଡିଆରେ କହୁଛନ୍ତି, ବାଜୱା ସତ୍ୟକୁ ଗ୍ରହଣ କରିଛନ୍ତି। ଏଥିସହ ଅନେକ ପାକିସ୍ତାନୀ ବାଜୱ ା କଶ୍ମୀର ବିକ୍ରୟ କରିଥିବା ଅଭିଯୋଗ କରିଛନ୍ତି।
ସେ କହିଥିଲେ ଯଦି ଭାରତ ସହ ଅସ୍ତ୍ରବିରତି ଉଲ୍ଲଂଘନ ହୁଏ ତେବେ ୨୦୨୧ ମସିହା ଏପ୍ରିଲରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାକିସ୍ତାନ ଆସିବେ। ମୀରଙ୍କ କହିବାନୁସାରେ, ଯେତେବେଳେ ପାକିସ୍ତାନର ତତ୍କାଳୀନ ବୈଦେଶିକ ମନ୍ତ୍ରୀ ଶାହ ମେହମୁଦ କୁରେଶି ପ୍ରଧାନମନ୍ତ୍ରୀ ମୋଦିଙ୍କ ଗସ୍ତ ବିଷୟରେ ଜାଣିବାକୁ ପାଇଲେ, ସେତେବେଳେ ସେ କ୍ରୋଧିତ ହୋଇଥିଲେ। ତା’ପରେ ଇମ୍ରାନ କହିଥିଲେ ବାଜୱା ଏବଂ ପୂର୍ବତନ ଲ୍ୟୁଟନାଟ ଜେନେରାଲ ଫୈଜ ହମିଦ କ’ଣ କହୁଛନ୍ତି ସେ ବିଷୟରେ ମୁଁ ଅଧିକ ଜାଣେ ନାହିଁ।
ଏଥି ସହିତ, ଅନେକ ଇମ୍ରାନ ସମର୍ଥକ କହିଛନ୍ତି, ବାଜୱା ଇମ୍ରାନଙ୍କୁ ଅନ୍ଧାରରେ ରଖିଥିଲେ, ତାଙ୍କୁ ଅଧିକ କିଛି କହି ନ ଥିଲେ। ବାଜୱା ଇମ୍ରାନଙ୍କ ସହ ଭୁଲ କାର୍ଯ୍ୟ କରିଥିଲେ ଏବଂ କାଶ୍ମୀରବାସୀଙ୍କୁ ମଧ୍ୟ ପ୍ରତାରଣା କରିଥିଲେ। ଭିଡିଓରେ ହମିଦ କହିଛନ୍ତି, ବାଜୱା କଶ୍ମୀରବାସୀଙ୍କ ପ୍ରତି ବିଶ୍ୱାସଘାତକତା କରିଛନ୍ତି।
