କରାଚି,୨।୧: କ୍ରିକେଟରେ ଖେଳାଳିଙ୍କ ବୟସଜନିତ ଠକେଇ ବେଶ ଚିନ୍ତାର ବିଷୟ ପାଲଟେ। ବର୍ତ୍ତମାନ ସମୟରେ ପାକିସ୍ତାନ କ୍ରିକେଟର ଅନେକ ଖେଳାଳି ବୟସକୁ ନେଇ ରାଡାରରେ ଅଛନ୍ତି। ତେବେ ନିଜକୁ ୧୭-୧୮ ବର୍ଷ ବୟସର ବୋଲି ଦାବି କରୁଥିବା କିଛି ପାକିସ୍ତାନୀ ବୋଲର୍ ପ୍ରକୃତରେ ୨୭-୨୮ ବର୍ଷ ବୟସ୍କ ଅଟନ୍ତି ବୋଲି ପୂର୍ବ ଦ୍ରୁତ ବୋଲର ମହମ୍ମଦ ଆସିଫ ଦାବି କରିଛନ୍ତି।
କମରାନ ଅକମଲଙ୍କ ୟୁଟ୍ୟୁବ୍ ଚ୍ୟାନେଲରେ ଏକ ବାର୍ତ୍ତାଳାପରେ ଟେଷ୍ଟ କ୍ରିକେଟରେ ପାକ୍ ଦ୍ରୁତ ବୋଲର କ’ଣ ପାଇଁ ଏତେ ସଂଘର୍ଷ କରୁଛନ୍ତି ବୋଲି ପ୍ରଶ୍ନରେ ଆସିଫ କହିଛନ୍ତି, ସେମାନଙ୍କର ବୟସ ଅଧିକ ଥାଏ। କାଗଜପତ୍ରରେ ୧୭-୧୮ ବର୍ଷ ଲେଖାଯାଇଥାଏ ହେଲେ ପ୍ରକୃତରେ ସେ ୨୭-୨୮ ବର୍ଷ ବୟସ୍କ ହୋଇଥାଏ। ୨୦-୨୫ ଓଭର ଖେଳିବା ପାଇଁ ତାଙ୍କ ପାଖରେ ନମନୀୟତା ନ ଥାଏ। ଶରୀରକୁ କିଭଳି ବ୍ୟବହାର କରିବେ ତାହା ସେମାନେ ଜାଣନ୍ତି ନାହିଁ। ସେମାନେ କଠିନ ହୋଇଥାନ୍ତି। ୫-୬ ଓଭର ପରେ ସେମାନେ ପଡ଼ିଆରେ ଛିଡ଼ା ହେବାକୁ ସକ୍ଷମ ହେଉନାହାନ୍ତି।
୫ରୁ ୬ ବର୍ଷ ମଧ୍ୟରେ ପାକିସ୍ତାନର କୌଣସି ଦ୍ରୁତ ବୋଲର ଗୋଟିଏ ମ୍ୟାଚ୍ରେ ୧୦ଟି ଉଇକେଟ ନେଇପାରିନାହାନ୍ତି। ନ୍ୟୁଜିଲାଣ୍ଡର ପିଚ୍ ଦେଖିବା ପରେ ଆମ ପାଟିରୁ ଲାଳ ବୋହୁଥିଲା। ପାଞ୍ଚଟି ଉଇକେଟ ନେବା ପୂର୍ବରୁ ମୁଁ ବୋଲିଂରୁ ଓହରିବାକୁ ପସନ୍ଦ କରୁ ନ ଥିଲି। ହେଲେ ଆଜିର ପିଲାମାନେ ତାହା ଜାଣନ୍ତି ନାହିଁ। କେତେବେଳେ ଏକ ରନ୍ ଦେବାକୁ ହୁଏ ଏବଂ ଉଇକେଟରେ କିଭଳି ବୋଲିଂ କରିବା ଉଚିତ ତାହା ସେମାନେ ଜାଣନ୍ତି ନାହିଁ। ସେମାନଙ୍କର କୌଣସି ନିୟନ୍ତ୍ରଣ ନାହିଁ ବୋଲି ମଧ୍ୟ ଆସିଫ କହିଛନ୍ତି।
