ଇସଲାମାବାଦ,୧୦ ।୨: କର୍ନାଟକ ଉଡୁପି ଜିଲାର ଏକ ସରକାରୀ କଲେଜରୁ ଆରମ୍ଭ ହୋଇଥିବା ହିଜାବ ବିବାଦ ଏବେ ଦେଶର କିଛି ରାଜ୍ୟକୁ ବ୍ୟାପିଲାଣି । ପାକିସ୍ତାନ ବି ଏହି ଘଟଣା ଉପରକୁ ଲମ୍ଫ ମାରିଛି । ହିଜାବ ବିବାଦକୁ ନେଇ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ଶରିଫଙ୍କ ଝିଅ ମରିୟମ ଶରିଫ ଏକ ଟୁଇଟ କରିଛନ୍ତି ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ଏହି ଘଟଣାକୁ ନେଇ କର୍ନାଟକର ଯେଉଁ ଛାତ୍ରୀ ମୁସକାନ ହିଜାବ ପିନ୍ଧି ଆଲ୍ଲା ହୁ ଆକବର ସ୍ଲୋଗାନ ଦେଇଥିଲେ ସେହି ଛାତ୍ରୀଙ୍କ ଫଟୋକୁ ମରିୟମ ନିଜ ଟୁଇଟର ହ୍ୟାଣ୍ଡେଲରେ ଶେୟାର କରିଛନ୍ତି । ଏହାକୁ ନେଇ ସେ ତାଙ୍କର ପ୍ରୋଫାଇଲ ଫଟୋ ବି ବଦଳାଇ ଦେଇଛନ୍ତି । ସେ ପ୍ରୋଫାଇଲରେ ମୁସକାନଙ୍କ ଫଟୋ ରଖିବା ସହ ଲେଖିଛନ୍ତି ହ୍ୟାସ ନିୟ୍ୟୁ ପ୍ରୋଫାଇଲ ପିକ୍ ।
ସୂଚନାଯୋଗ୍ୟ, ଏବେ ହିଜାବ ବିବାଦକୁ ନେଇ ମୁସକାନଙ୍କ ବୟାନ ସାମ୍ନାକୁ ଆସିଛି । ସେଥିରେ ସେ କହିଛନ୍ତି, ଦେଶରେ ସବୁ ଧର୍ମ ସବୁ ଜାତିକୁ ସ୍ୱାଧିନତା ଦିଆଯାଇଛି, ତେଣୁ ହିଜାବ ପିନ୍ଧିବାକୁ ନେଇ ଏତେ ବିରୋଧ କାହିଁକି କରାଯାଉଛି । ଛାତ୍ରୀ ଜଣଙ୍କ କହିଛନ୍ତି ମୁଁ ଏସାଇନମେଣ୍ଟ ପାଇଁ କଲେଜ ଯାଇଥିଲି, ହେଲେ କେତେଜଣ ଲୋକ ମୋତେ ଆଗକୁ ଯିବାକୁ ଦେଇ ନ ଥିଲେ । କାରଣ ମୁଁ ବୁରଖା ପିନ୍ଧିଥିଲି । ସେମାନେ କହିଥିଲେ ପ୍ରଥମେ ବୁରଖା ଖୋଲ ପରେ ଭିରତରକୁ ଛଡାଯିବ । ହେଲେ ମୁଁ ଯେତେବେଳେ ଆଗକୁ ଯାଇଥିଲି ସେତେବେଳେ ସେମାନେ ଜୟ ଶ୍ରୀ ରାମ ସ୍ଲୋଗାନ ଦେଇଥିଲେ ।
