ଇସଲାମାବାଦ୍,୩୧।୭: ଚାଇନା ସହାୟତାରେ ପାକିସ୍ତାନ ଏକ ବଡ଼ ସଫଳତା ହାସଲ କରିଛି। ଏହା ଏକ ରିମୋଟ ସେନ୍ସିଂ ସାଟେଲାଇଟ (PRSS-01) ଉତକ୍ଷେପଣ କରିଛି। ଏହାକୁ ଚାଇନାର ଜିଚାଙ୍ଗ ସାଟେଲାଇଟ ଲଞ୍ଚିଂ ସେଣ୍ଟର୍ରୁ ଉତକ୍ଷେପଣ କରାଯାଇଥିଲା। ପାକିସ୍ତାନର ବୈଦେଶିକ ମନ୍ତ୍ରଣାଳୟ ଗୁରୁବାର ଏକ୍ସରେ ଏକ ପୋଷ୍ଟ ଶେୟାର କରି ଏହି ସୂଚନା ପ୍ରଦାନ କରିଛି। ମନ୍ତ୍ରଣାଳୟ କହିଛି ଯେ, ଏହି ସାଟେଲାଇଟ ସାହାଯ୍ୟରେ ଅନେକ ଅଞ୍ଚଳର ହାଇ-ରିଜୋଲ୍ୟୁସନ ଚିତ୍ର ୨୪ ଘଣ୍ଟା ଉପଲବ୍ଧ ହେବ। ଏହା ଚାିନା-ପାକିସ୍ତାନ ଅର୍ଥନୈତିକ କରିଡର୍ ଉପରେ ମଧ୍ୟ ନଜର ରଖିବ।
ପାକିସ୍ତାନର ବୈଦେଶିକ ମନ୍ତ୍ରଣାଳୟ ଏକ ପ୍ରେସ ରିଲିଜ ମାଧ୍ୟମରେ କହିଛି, ପାକିସ୍ତାନ ମହାକାଶ ଜଗତରେ ଏକ ବଡ଼ ସଫଳତା ହାସଲ କରିଛି। ଚାଇନାର ଜିଚାଙ୍ଗ ସାଟେଲାଇଟ ଲଞ୍ଚିଂ ସେଣ୍ଟରରୁ ଏକ ରିମୋଟ ସେନ୍ସିଂ ସାଟେଲାଇଟ ଉତକ୍ଷେପଣ କରାଯାଇଛି। ଏହି ସାଟେଲାଇଟ ପାକିସ୍ତାନକୁ ୨୪ ଘଣ୍ଟା ଉଚ୍ଚ-ରିଜୋଲ୍ୟୁସନ ଇମେଜ ପ୍ରଦାନ କରିବ। ଏହା ସହରାଞ୍ଚଳ ଯୋଜନା, ଭିତ୍ତିଭୂମି ବିକାଶ, ବିପର୍ଯ୍ୟୟ ପରିଚାଳନା, କୃଷି ତଦାରଖ, ଖାଦ୍ୟ ସୁରକ୍ଷା, ପରିବେଶ ସୁରକ୍ଷା ଏବଂ ଜଳ ସମ୍ପଦ ପରିଚାଳନା ଭଳି କ୍ଷେତ୍ରଗୁଡ଼ିକ ଉପରେ ନଜର ରଖିବାରେ ସାହାଯ୍ୟ କରିବ।
ବୈଦେଶିକ ମନ୍ତ୍ରଣାଳୟ କହିଛି ଯେ, ପାକିସ୍ତାନର ଜାତୀୟ ମହାକାଶ ସଂସ୍ଥା SUPARCO ଚାଇନାର CETC ଏବଂ MICROSAT ସହଯୋଗରେ ଏହାକୁ ଉତକ୍ଷେପଣ କରିଛି। ଏହି ସଫଳତା ସହିତ, ପାକିସ୍ତାନ ମହାକାଶ କ୍ଷେତ୍ରରେ ନିଜର ସ୍ଥିତିକୁ ମଜଭୁତ କରିଛି।
ପାକିସ୍ତାନ ଏବଂ ଚାଇନା ମଧ୍ୟରେ ଏପର୍ଯ୍ୟନ୍ତ ବହୁତ ଭଲ ସମ୍ପର୍କ ରହିଛି। ଚାଇନା ପାକିସ୍ତାନର ଅନେକ କ୍ଷେତ୍ରରେ ନିବେଶ କରିଛି। ଚାଇନା ପାକିସ୍ତାନର ସାଟେଲାଇଟ ଉତକ୍ଷେପଣ କରି ନିଜର ସହଭାଗୀତାକୁ ଆହୁରି ମଜଭତ କରିଛି। କୁହାଯାଏ ଯେ, ଭାରତର ଅପରେଶନ ସିନ୍ଦୁର ସମୟରେ ମଧ୍ୟ ଚାଇନା ପାକିସ୍ତାନକୁ ବହୁତ ସାହାଯ୍ୟ କରିଥିଲା।
ଚାଇନା ଏବଂ ପାକିସ୍ତାନ ମଧ୍ୟରେ CPEC ପ୍ରକଳ୍ପ ବଡ଼ ପରିମାଣରେ ଚାଲିଛି। ଚାଇନା-ପାକିସ୍ତାନ ଅର୍ଥନୈତିକ କରିଡର (ସିପିଇସି) ଏକ ଆର୍ଥିକ ଏବଂ ଭିତ୍ତିଭୂମି ବିକାଶ ପ୍ରକଳ୍ପ, ଯାହା ଦୁଇ ଦେଶ ମଧ୍ୟରେ ରଣନୈତିକ ସହଭାଗୀର ଏକ ଅଂଶ। ଏହା ଚୀନ ର ବେଲ୍ଟ ଆଣ୍ଡ ରୋଡ ଇନିସିଏଟିଭ (ବିଆରଆଇ)ର ଏକ ପ୍ରମୁଖ ଅଂଶ, ଯାହାର ଲକ୍ଷ୍ୟ ଆଞ୍ଚଳିକ ସଂଯୋଗୀକରଣ, ବାଣିଜ୍ୟ ଏବଂ ଆର୍ଥିକ ସହଯୋଗକୁ ବୃଦ୍ଧି କରିବା।
