ନୂଆଦିଲ୍ଲୀ,୨୭।୧: ସେପ୍ଟେମ୍ବର ୧୯୬୦ର ସିନ୍ଧୁ ଜଳ ଚୁକ୍ତିରେ ସଂଶୋଧନ ପାଇଁ ଭାରତ ପାକିସ୍ତାନକୁ ଏକ ନୋଟିସ ଜାରି କରିଛି। ଶୁକ୍ରବାର ଆଇଡବ୍ଲ୍ୟୁଟିର ଧାରା ଏକ୍ସଆଇଆଇ(୩) ଅନୁଯାୟୀ ଏହି ନୋଟିସ୍ ଦିଆଯାଇଥିବା ସୂଚନା ଦିଆଯାଇଛି। ଜାନୁୟାରୀ ୨୫ରେ ସିନ୍ଧୁ ଜଳ ପାଇଁ ନିଯୁକ୍ତ କମିଶନରଙ୍କ ମାଧ୍ୟମରେ ନୋଟିସ ଦିଆଯାଇଥିଲା। ସୂତ୍ରରୁ ଜଣାପଡିଛି ଯେ, ପାକିସ୍ତାନର କାର୍ଯ୍ୟକଳାପ ଆଇଡବ୍ଲ୍ୟୁଟିର ବ୍ୟବସ୍ଥା ଏବଂ ଏହାର କାର୍ଯ୍ୟକାରିତା ଉପରେ ପ୍ରତିକୂଳ ପ୍ରଭାବ ପକାଇଛି ଏବଂ ଆଇଡବ୍ଲ୍ୟୁଟିର ସଂଶୋଧନ ପାଇଁ ଭାରତକୁ ଉପଯୁକ୍ତ ବିଜ୍ଞପ୍ତି ଜାରି କରିବାକୁ ବାଧ୍ୟ କରିଛି।
ସୂଚନାନୁସାରେ, ୨୦୧୫ରେ ପାକିସ୍ତାନ ଭାରତର କିଶଙ୍ଗଙ୍ଗା ଏବଂ ରାଟଲେ ହାଇଡ୍ରୋ ଇଲେକ୍ଟ୍ରିକ ପ୍ରୋଜେକ୍ଟ (ଏଚ୍ଇପି) ଉପରେ ଏହାର ବୈଷୟିକ ଆପତ୍ତି ଉପରେ ଅନୁସନ୍ଧାନ କରିବାକୁ ନିରପେକ୍ଷ ବିଶେଷଜ୍ଞ ନିଯୁକ୍ତ କରିବାକୁ ଅନୁରୋଧ କରିଥିଲା। ୨୦୧୬ରେ, ପାକିସ୍ତାନ ଏକପାଖିଆ ଭାବରେ ଏହି ଅନୁରୋଧ ପ୍ରତ୍ୟାହାର କରି କୋର୍ଟ ଏହାର ଆପତ୍ତି ଉପରେ ବିଚାର କରିବାକୁ ପ୍ରସ୍ତାବ ଦେଇଥିଲା। ସୂତ୍ରରୁ ପ୍ରକାଶ ଯେ ପାକିସ୍ତାନର ଏହି ଏକପାଖିଆ କାର୍ଯ୍ୟ ଆଇଡବ୍ଲ୍ୟୁଟିର ଧାରା ଆଇଏକ୍ସର ଉଲ୍ଲଂଘନ କରୁଛି। ତଦନୁସାରେ, ଭାରତ ଏକ ନିରପେକ୍ଷ ବିଶେଷଜ୍ଞ ନିଯୁକ୍ତି କରିବାକୁ ଅନୁରୋଧ କରିଥିଲା। ସେପ୍ଟେମ୍ବର ୧୯, ୧୯୬୦ରେ ଭାରତ ଏବଂ ପାକିସ୍ତାନ ସିନ୍ଦୁ ଜଳ ଚୁକ୍ତି ସ୍ବାକ୍ଷର କରିଥିଲେ।
